Дуккаврил кьимат мудангу бивкIссар ва бикIантIиссар. Чансса бакъар кIулшивурттал хъирив багьсса, республикалул кьатIувсса вузирдаву ххуйну дуклакаврицIун, жяматийсса оьрмулул иширттавухгу чялишну хIала бухлахисса, лакрал хьхьичIунсса студентътал.

Астраханнай паччахIлугърал медициналул университетраву дуклакисса Абакарова СалихIатгу вай гьантрай лайкь хьунни вузрал ректорнал, медициналул элмурдал доктор Сергей Поройскийл цIаниятусса Барчаллагьрал чагъарданун. «СалихIат Абакарова вузрал ца яла чялишмур активистка бур, укун дуккавривугу, гьар-мунивугу хьхьичIунсса студентътуралли вузрал цIагу гьаз дуллалисса», – увкунни ректорнал, Барчаллагьрал чагъар буллай.
СалихIат лечебный факультетрал 3-мур курсрай дуклай бур. Ва 1-мур ЦIувкIратусса ХIасаннул (документирттай ХIусайннул) ва Варайми шяравасса, ЦIуссалаккуй хъунма хьусса Жаннатлул душри.
СалихIат уттинингу цимилагу лайкь хьуну бур грамотарттан, Барчаллагьрал чагъардан. КIицI лаганна, вайннал хъунмур душ Шамсиятгу. Астраханнай вава медициналул вузгу къуртал бувну, ккарччал хIакинну зий бушиву. ОьрчIал бюхъу-хIарачатран ххуйсса кьимат бищаву нитти-буттангу, гъан-маччаминнангу тирхханнур. Вайгу, цуппа СалихIатгу барча буллай, чIа тIий бура дуккавриву хьхьичIуннайшиву, оьрмулуву тIайлабацIу!
ПатIимат Рамазанова