Къуртал хьунни Рамазан барз. ЦIимилул, рувхIанийшиврул, хIалал битаврил ва хъиншиврул барз. Амма ванил мяъна-мурад, ца зуруйсса зума дургьуну, чирилунсса цIимилул давуртту дурну, гьарца учайсса мукъулгу, ласайсса шаттиралгу ялув бавцIуну, бунагьмуний къадагъа дирхьунугу бивкIун, ливчIми зурдардий баччи бакъа оьрму бутлатаву бакъар.

Ванил мурад инсан ца ва зуруй акъагу муданагу дакI марцIну къуццу тIутIавур, АллагьначIан гъан шавур. Рамазан зурул чIалачIи дувайссар инсаннал дакI, мунал дуллалимур дакIнийхтунусса диркIун дурив дакъарив. Рамазан барз къуртал шаву му марцIсса диндалуцIун дархIусса аьдат-эбадатру, цIимилул давуртту дуллалаврил ахир дакъар. Му инсан, мунал хIал, дакI-аьмал ххал бавур, инсан марцI уккансса, тIайла ацIансса кашир. Рамазан барз лавгнугу, Хъунасса Заннаясса нигьгу, бунагьмур къабувансса хIарачатгу, ахIвал-хIал кIюламиннахсса, мюхтажминнахсса къулагъасгу мудангу жущалла личIан аьркинссар.
Рамазан барз къуртал шавривун дуркIссар чIун жухьва жува цIуххин: «Цири жувура даххана хьусса?» ХIакьсса инсангу, бусурманчувгу дунияллийсса цалва гьарцагу гьантта ва зуруй кунма бутлатимари.
Рамазан барз къуртал хьунугу, къуртал къахьуннав, чан къахьуннав Хъунасса Аллагьнаясса цIими. Кьамулну лякъиннав ва зуруй жура дургьусса зумарду, бувсса хъинбаларду, дияннав Хъунасса ЗанначIан жура ­дурсса дуаьрду.
Уттигу чIярусса шиннардий Рамазан барз хьунабакьлансса, ва цалнияр цал лайкьсса даражалий тIайла буклансса, Зумаритавал байран дуллансса цIуллушиву, каши-кьудрат дулуннав Аллагьнал жунна.

Бадрижамал Аьлиева