Агар инава ххуйсса инсанна тIий ухьурча, ххуймур буллалу ва ххуймур баврия ххарину, бувнайнгу барчаллагьрай икIу. Инсаннал адаврал, мяърипатрал кьимат ва ца ххуттаву кIицI лавгсса кунмагума бищун хьунссар.

Жунма кIулли Рамазан барз так зума дугьаврил барз ба­къашиву, инсан, цалва ялув цува авцIуну, рувхIанийсса даву дуллалисса, цалла хасият ххуй дуллали­сса, ххуймур буллалисса барз бушиву. РувхIанийсса ххуйшиврунсса ххуллу гьарза-гьарта буллалисса барз бушиву. Инсантурал хIарачатгу бикIай ва зуруй ххуйсса давуртту дуван. Масалдаран, жу ялапар хъанахъисса къатраву лаякъатрай яхъанай бур Ватан кьаритан багьсса, мушакъатсса хъамитайпа. Мяълум буванна, Украиннавасса. Ва коляскалий бикIай. Жагьилссагу бакъар. Загълунссагу бур. Коляска дачин дувангу захIматну бушиву чIалан бикIай. Мяйжанссар, оьрчIру мудангу, ваничIан лечлай, коляска дачин дуван кумаг буллан бикIай. Барча­ллагьри вай оьрчIал нитти-буттангу ххуйсса тарбия дулаврихлу.
Ва хъамитайпа укун коляска дачин дуллай, оьгь-чаплий къабитайссар куну, чIаххуврал хIукму бувна ванин электроколяска ласун. КIюрххил чIаххуврал социал сетьраву сбор баян бувну, маркIачIаннин дартIуна аьркинссаксса арцу. Ванил цилва бувсмунийн бувну, электроколяска ванин къадагьайсса дур. Амма дагьавай дуллумур коляска, кумагчи акъа, дачин дуллан хъанай бакъар. ДакIру ххуйсса чIаххуврал, ца кьинилул мутталий укун чумартсса даву дурну, дузал дунни арцу, тIалав дунни коляска кьатIаллил билаятрая.
Чун нанисса ихтилатри учирча, инсантураву инсаншиву цIакьну душиврийнсса гьимри. Рамазан зурул хIурмат личIиссава бушиврийнсса гьимри. БикIай, Рамазан зуруй бакъа ххуймур-хъинмур буллан бурж бакъассарив тIиссагу. Гьар кьини Рамазан барз бусса куна къуццу тIутIима инсаншиврул бюхттулсса даражалийн гьаз хьумари. Гьаз хьун хъитвагу тIунссар. Хъиншивурттугу гьар зуруйгу, гьар чIумалгу дулларча, барачатгу буссар. Масалдаран, жул Цалчинмур ЦIувкIуллал жяматрал Палестиннал агьалинан дуки-хIачIия, бачIи миллиондалуха ливчусса арцу дартIун, тIайла дурккунни, шамийлва-мукьийлва чIявусса инсантал дукралул дузал бунни. Ва так ца мисалли. Дагъус­ттаннал агьалинал ядурну дур инсаншиву. Ила бивчусса туристътурахьгу цIуххара, ца зумату кунма, буссар халкьуннал ххуйшиврий, сахаватлувсса бушиврий хIайранну буру тIий. Сахаватлувшиврул дургьусса чIун къадикIайссар. Хъинбалдарал чIун гьар муданнассар. Амма Рамазан зуруй личIиссава хъитгу, личIиссара чялиш буккавугу дикIай агьалинал хъиншивуртту дуллан. Гьаннайсса, Аллагьнал жунма ккаккан бувсса куццуй къуццу тIун. ЦачIун бавтIун, ца урцIух ккуркки лавгун зума ритаврия бакъар ихтилат. Цашивриягу бакъар. Мигу ххуйшивуртту дунугу. Ихтилат дакI марцI дуккаврияр, хъиншивурттал ххуллий цIулагаврияр. Ца шачIанттул унугу инсан гьаз хъанай ушиврияр. ДукIу-кIурссану, Рамазан барз къуртал хъанахъисса чIун гъан хъанахъисса чIумал, ттул дакI буслай бусан къашайсса къумашиврул дугьлай дачайва. Ваца язисса хъамаличувнацIа хъана­хъисса кунмасса асар бикIайва. Хаснува дакI къума лаглан дикIайва Рамазан зурул барачатрайну чанна лархъсса хьхьурдай. Ттун бувчIлай бия, ттула нава барча бан бучIисса чIун дуркIшиву. Ттулла дакIниву иман цIакь хъанай душиву. Цуксса зун хъунмахъну чIаларчагу. Уттигъа­нну ттул коллегагу бур, цукуннивсса пашманшиву дур дакIниву, Рамазан барз къуртал хъанай тIий. На коллега барча бував иман цIакь хъана­хъаврищал. Ца шачIанттул бунугу гьаз хьушиврущал.
Ва лавгсса Рамазан зурул барачатрайну бала-апатIру, азарду арх даннав, дунияллий дакьаву хьуннав. Бувсса цадакьартту, дурцири дуаьрду ва цаймигу хъиншивур­тту Аллагьнал кьамулгу дурну, ми­ннухсса чири хIат-хIисав дакъа ххи баннав!

ПатIимат Рамазанова