Дагъусттаннал Муфтиятрал вакил МухIаммад Майрановлущалсса ихтилат

– МухIаммад, вил къу­ллугъру ччя-ччяни баххана шай, утти­гъанну куна Муфтиятрал Юждаграйсса вакилну уссияв, уттигу МахIачкъалаливнай зана увунна.
– Ми дахханашивуртту жун хайрданунссар. Хасну ттун тту­ннагу мюнпатрансса шай. Гьарманан кIулссар цува ца даврий лахъи къалагантIишиву, мудан чялишну зун аьркиншиву, гьунттий-сарану дува­нна тIисса тарап къадикIан аьркиншиву. Сантирай ва дирисса бущилий зурча, даврил лябуккугу бикIайшиву. Мунияту, чIун-чIумуй баххана бувайссару жу Муфтиятрал. ЦIусса даву тапшур дурсса чIумал, вихшала цIакь дуван, инсан цувагу цIусса бюхъу-хъитлищал хIарачат бу­ллалиссар. Мяйжанссар, бикIай ишру, масалдаран, имам аххана улларчан, жу ва имамнайн аьдат хьуну буру тIий, жямат миннат буллалисса. ЦIуну ивт­ма имам цуксса ххуйсса ухьурчагу, хьхьичIваманайн аьдат хьуну буру, жун ва пулан итира тIисса. Амма цIуну ивтма имамгу агьалинан мюнпатраннурхха зунтIисса, цуксса хIарачатрай зузисса ухьурчагу, ца кIанай лахъи лавгманаяр цIуну ивтма гъирарай зунтIиссар, цIусса пикри-зикрирду бартбигьлан­сса хIарачатрай. Ца хъунмур никиращал маз лякъин гьунарсса икIай, вама – жагьилтал лагма лаган бан кIулсса, тама – кулпатран маслихIат бан усттарсса, гьарманал цала-цала гьунар бикIай. АцIра, ацIния ххюра шинай цава-ца инсан имамну зурча, мунал иттавсса гъирарал цIу, цIай лещан бюхъайссар, гьарманан цавувасса бюхъу-гьунар ккаккан бувансса ххуллу буллалиссар. Вари нагу чIяруну даву даххана дуллалаврил багьана-савав. Ттун цалчинмур суал ми дахханашивурттацIун бавхIусса къабикIансса ххива.

– Вил миксса чIявусса къуллугъру бурхха, муниятур суал бакIрайва хIасул хьусса. Буси виламур оьрмулул ххуллия, исламравун кIункIу шаврия.
– Исламрал даврий зий ттул 14 шинни. Вузравун дуклан уххайх­тува, на архIала зийгу усси­яв. ЗахIматсса 2 шин дуссия, ахттайннин дуклай, ахттая махъ 2-3 даврий зузисса. 2009-ку шинал на дуклан увхссара Дагъусттаннал Шяраваллил хозяйствалул институтравун экономикалул факультетрайн, уттисса Аграрный университетри. 2011-ку шинал увхра Дагъус­ттаннал исламрал институтравунгу. Цуксса захIматну бунугу, та чIумул на хъинну хъит учин увссара. Зу нукIува буллусса суалданул цIанакул пикри буван унна: агана нава цава-ца кIанай зий ивкIссания, инсантуращал­сса даврил ваксса авадансса опыт къашайссия. На жура-журасса инсантуращал зий ивкIра, личIи-личIисса менталитетирттащалсса. Дуккавугу, давугу архIал нани даврилгу ттун чIявусса затру лахьхьин бунни, хъит учин, итххяххан унна.

– Ина диндалул ххуллийн та увкра, оьрчIнияцIара дин дуссияв?
– АлхIамдулиллагь, оьрчIнияцIава диндалия архсса бакъая жул кулпат. Нину-ппу, диндалул ххуллу-ххуттай цIакьну бавцIусса бакъанугу, диндалул аьдатирттал хIурмат бусса бия. Ттатта ва бава исламрал гьанурду лахьхьин бу­ллан бикIайва, алхIам, Кьурандалул цаппара сурарду кIулссия оьрчIнийва. Школалийн занан ивкIсса ппурттуву тIайлану чак бан лавхьхьуссия. Исламрал литература ккалан гъира бикIайва. На нава увссара Гъумук. Бу­ттал ппу Ххюлусматуссар. Буттал ниттил мархри Куматуссар. Нину Ахъушиял райондалияссар.

– Цумур шяравасса?
– ТIантIиял шяравассар. КIира шинавун ияннин яхьуссара Гъумук. Яла жу МахIачкъалалив бивзссияв, амма на тачIав мархрая ят къаувцссара. Зунттавун лагайссияв гьар канику­ллал чIумал. Буттащал ихтилат ла­кку мазрай байссия. Къуртал бувссия МахIачкъалаллал 36-мур школа. Директоргу лакку инсан бикIайва –Ульяна Аьлиевна. Уттигу тава школалий зий буссар. Мадрасалувугу дуклай ивкIссара университетравун ухханнин. Султанат Оманнайгу ивкIссара ца шинайсса, маз, ишла буллай, итххяхханшиврул. Цалчинсса зузи кIанумур – Кумав имамну зий ивкIссара. Му ттул гъинттулсса практика дия. На Гъази-Гъумучиял имамнал хъиривчуну зузи­­сса чIумал, МухIаммад Саламов (Буршиялма) уссия Гъумучиял имамну зий. Яла зий ивкIссара МахIачкъалаллал муххал ххуллийсса Сайпуллагь-Кьади Башларовлул цIанийсса мизитрал имамнугу. Ванийн «лакрал мизит» учай. КIира шин дурссар ва мизитрал имамну. Исламрал университетрал преподавательну зий ивкIссара маркIачIан чIумал. Вай кьатIаллил билаятрайн гьаннинсса зузи кIанттур. Оманная зана хьуну мукьах МахIачкъалаллал Хъунмизитрал имамнал хъиривчуну зий ивкIссара.

– Вин му ппурттуву цими шин дия? Ина Муфтиятрал советрал яла жагьилма председатель унуккара…
– Хъун-мизитрал имамнал хъиривчуну зузийни ттун 26 шин дия. Муфтиятрал советрал председательну зузийни 28-29 ши­ннал оьрмулуву уссияв. Хъунмизитраву на хъунмурчIин кулпатрал тематикалуха зий ивкIра, маслихIатру буллай, ташу баврил, личIи шаврил масъалартту шариаьтрайн бувну, бувчIин буллай. Яла МахIачкъалаллал просвещениялул отделданул хъунаману зий ивкIра, хъирив – вава шагьрулул Имамтурал советрал хъунаману. Гихунай ивтунав Дагъусттаннал Муфтинал кумагчину, хъиривману. Яла Юждаграйн гьан увнав – Дарбант, Дагестанские Огни ва цаймигу 12 район дагьайсса кIанайн. Тичча МахIачкъалаливнай зана увну, Муфтиятрал председательну цIакь увссара, ялагу цIуницIа Юждаграйн увтссара. Юждаграя мукьах Лакрал райондалул имамну зий ивкIра. ЦIуницIа Муфтиятрал Юждаграйсса вакилну гьан увнав, уттигъаннунин микку зий ивкIра. Гьаннайсса, шамийла увтссара Юждаграйн. Уттигъанну, МахIачкъалалив зана увну, ивтунна Республикалул Муфтиятрал просвещениялул отделданий.

– Ми давуртту даххана даву Муфтиятрал ишрив?
– Масалдаран, на ивтунав Лакрал райондалул имамну. Гьар шяраву имам муфтинал къаитайссар. Мунал буссар кумагчитал, хъиривми, полпредтал-вакилтал. Мукьра округ дуссар: Центральный, Южный, Северный ва Зунтталмур. Гьар округрай уссар Муфтиятрал вакил. Миннайн буккайссару цIуххинсса, мяйжан буван аьркинсса иш бухьурча. Аьркиншиву духьурча, миннал муфтинай бишайссар суаллу. Муфтинал цала кумагчитал, хъиривми, вакилтал цала битайссар. Районнаймур иш вакилтурайн тапшур бувайссар. Гьа­ннайсса, куннал куннайн вихшала дуну, маслихIатрай, бавкьуну дувайссар даву. Гьарма цала кIанай жаваблувшиву кIулну щуруй уссар.
– Ина хIажлийн нанисса группалул каялувчинугу икIара, буси му давриягу. Гьашину хIажлийнсса хIадуршинна цукун най дур?
– ХIажлилсса, оьмралулсса буллалиссар «Марва-Тур» тIисса идаралул. Расмийсса турагент вари. Вай Муфтиятрайн бу­ккайссар, группалул каялувчиталну битанми маслихIат бувара тIий. Инсантуращал маз лякъин, зун кIулсса, опыт бусса. Нагу кIункIу увара му давривун.

– Вил группалувун багьаншиврул ци бан аьркинссар?
– ХIажлийн ягу оьмралийн гьан ччими «Марва-Турданийн» буккайссар. Агар оьмралийн най бухьурча, миннал къулайсса чIун язи дугьайссар. Цува щищал гьан ччай уссарив мяълум бувайссар. Мукунма щил группалуву ччай уссаривгу. Нагу ттула мажал бусса чIун ккаккан дувара, соцсетирдайсса ттул подписчиктуран, на кIулминнан хавар бикIайссар на ккаккан дур­сса кьинилия. «Марва-Турданий» миннал яла, ва кьини гьан ччай ура, МухIаммад Майрановлул группалувун утияра учай­ссар, агар ттущал ччай бухьурча. ЦучIав кIулсса акъаналгу, кIицI лавгсса компаниялул зузалтрал группалул хъунаману цу маслихIат увайрив цIуххайссар.
– Хьун бюхъайсса ишрив ина цу-унугу вила гру­ппалувун кьамул къауваву?
– Цалвагу мукунсса иш къавхьуссар. Ялунгума, ттул группа щаллуну бикIайссар, гьар мудан 49 инсан икIайссар, автобусравун миксса лагайсса буну тIий. ХIатта 50 инсангума икIай. ЛичIи-личIисса инсантал багьай группалувун, кIири бичайсса, хъювсул буккайссагу багьай. Гьарманащал маз лякъин шай. Группалул хъуниминнан аьраб маз кIулну бикIан аьркинссар, иш багьний цIухху-бусу буван.

– Вин ххуйну кIуллив ­аьраб маз?
– Гъалгъа бан шай, цIакьсса «3» бишинну.
– Гьар шинах сенатор Сулайман Керимовлул хIажлийнсса путевкарду машан ласай. Ми цукунминнайх дачIайссар?
– ЛичIи-личIину дачIай. Гьашину Сулайман Керимовлул МуфтиятрайхчIин къадунни, хьхьичIва Муфтиятрайн уккай­ва, вайксса путевкарду машан ласав учайва. Муфтиятрал кумаг байссия группардал хъунимигу лякъин, гьан буванмигу личIи бан. КIунурду буккай­ссия. ТIалавшиннагу дикIайссия, бюхъавай маэшатрал кIюлами, хIажлийн гьан ччай бунугу, гьансса каши дакъами личIи байсса.

– КIунурду буккаврил даву тIайлану, марцIну шайссарив?
– Жува аьдат хьуну буру, Дагъусттаннай тIайлану, марцIну цичIар къадайссар тIий. Масалдаран, на Лакрал райондалул имамну зузисса ппурттуву, агьалинал аьдадрах бурувгун, 2 путевка дуркIуна. Ккуллал райондалийн — 1 путевка. Халкь чIявуми районнайн путевкардугу чIяруссар. Жу баян бувссия Сулайман Керимовлул ихIсандалул хIажлийнсса путевкалул кIунурду буккантIишиву. ХIажлийн гьан ччиминнал заявкарду булуншиврул. Так тIалавшинна дуссия, кьатIаллил билаятирттайн лага-бучIан ихтияр дуллалисса паспорт аьркиншиву. Му паспорт бакъа, инсаннаща гьан къавхьуну, путевка ратIух къагьаншиврул. На маслихIат бувссия, кIиягу адамина ягу кIивагу хъамитайпа гьан къабаншиврул, 1 путевка хъа­ннин, 1 арамтуран дуван. Мукун бугу бувссия. Гъумучатусса хъамитайпагу лавгссия, Кьукниясса адаминагу. Махъсса ппурттуву цIакь хъанай дур диндалул мероприятиярттай оьмралийнсса розыгрышру душиву. Мероприятиялийн бувкIминнахьхьун булайссар номерду, яла кIунурду бичайссар, цуманал номер тIайла бавцIурив, мунан оьмралийн ачинсса тIайлабацIу хъанахъи­ссар.

– Путевкалухсса багьа щилли булайсса?
– Мероприятие хIасул дурманал. Масалдаран, на мероприятиялий кIуну буккантIишиву баян буллай ухьурча, лякъин аьркинссар путевка машан ласунсса спонсор.
– Сулайман Керимов акъасса, бурив ялагу инсантал хIажлийн тIайла буккайсса меценатътал?
– Му масштабрайсса цаманая ттун къабавунни. БикIай цала шярава, тухумрава 10 инсаннан хIажлийнсса харж бишин хIадурсса инсантал. БикIай кIуну буккавривугу сахаватлувну 9-10 путевка ласун махъаллил къахъанахъиссагу. Спонсорнал ка кIидахIаврил иш бур.
– ЧIярусса хъами дуцаврийн бучIанну. Утти­гъанну жул редакциялийн бувкIунни къюву­сса суал, ниттил ци­лла къумашиву аьч дуллалисса. Арс, ца кулпатвагу ххуйсса даражалий ябан къабюхълай унува, кIилчинмур щарссагу дуцин ччай ур, щар­сса ва оьрчIру му иширал муттаэтал бунугу тIисса. Ссай ядуванна тIисса суалданухьхьунгу «Аллагьнал дулунтIиссар» тIисса жаваб дур тIисса.
– Агар жува исламраву тIийкунсса чIярусса хъами дуцаврия гъалгъа тIурча, микку так плюсрур бусса. Мяйжанссар, хъаннил ревность (щак-щук тIутIаву) дакъа дуван къахьунтIиссар, МухIаммад Идавсил (с.аь.в.) хъаннилгума диркIссар му. МуницIухва, муния ливчуну махъгу, гьарица хъамитайпалул хажалатрансса тема дур, жунма му бувчIлай бур цинявннан. Цуксса захIмат-жапасса иш бунугурив, социал-экономикалул тагьар хIисавравун ларсун гъалгъа тIурча, кIира щарсса ядувансса каши дакъама дуцинна тIутIаву къабикIан аьркинсса ишри. Алла­гьнал дулунтIиссарив? Аллагьнал дулунтIиссар, агарда Аллагьнал тIийкун къуццу тIурча, исламрал ххуллу-ххуттай цIакьну авцIуну ухьурча. Аллагь­наллихха низам дирхьусса. Ва пулан зий урив, зузиманан нагу дулунна тIиссар Аллагь. Агар инсан цува къазий, цаманай бурттий ччай ухьурча, мукун къабучIиссар, Аллагьгу мукунминная къарязи­ссар. На мудангу маслихIат буллан икIара: урав дахху-ласулуха зун ччай, лахьхьи шариаьтрайн бувну цукун къуццу тIун аьркинну бурив, яла инава бунагьралул къаагьаншиврул. Урав оьрчIру тарбия буллан ччай, лахьхьи ми цукун тIайлану тарбия буллан аьркинссарив. Урав кIилчинмур щарсса дуцин ччай, лахьхьи шариаьтрай ци тIий бурив. КIилчинмур щарсса дуцин бучIи буллалиссар, агар адаминал духьурча каши, щарсса ялувсса магъул, къатрал, дуки-хIачIиялул ва чIумул сезондалул лаххиялул дузал дуван бюхълай ухьурча. Гьар чIумух бурувгсса лаххиялул дузал буванссар тIалавшинна. Умар ибн Хаттаблул (р.а), Аллагьнахух лавгсса кIилчинма халипанал, кьинил кьинибархан мизитирттава къабуклакисса жагьилтал лихъан бувайсса бивкIссар, бизияра утти, зун насияра, Кьуран ккалансса, чаклинсса чIун ккаккан дурсса дикIайссар тIий. Мунияту, хъами дуцаврил хIакъиравугу ду­ссар тIалавшинна. Къатри цува заллусса дакъахьурча, лаякъатрайгу яхъанан бучIиссар, так багьа буллан аьркинссар адамина. Мукунма гьар чIумух щар­ссанин яннагу машан ласлан, цIу дуккан дуллан, дукиялулгу дузалшинна дуллан. Мунияту на ссурваврахь икIара, агар адамина, шариаьтрал тIийкун, зу аьркинмунил дузал буллай ухьурча, кIира щарсса дуцаврийн циван данди буклай буру тIий.
– Ялун щарсса дуцаву щарссанин кьамулну бакъахьурча?
– Шариаьтрайн бувну, лас щарссанил рязишиврух, ихтияр дулаврих ялугьлан къааьркинссар. Ласнал буржри щарссаних хъинчулий уруглан, нукIува увкусса куццуй, гьармунил дузал дурну, рязи дуван.
– ОьрчIругу муттаэтал бухьурча ялун щарсса дуцаврил?
– ОьрчIаягу рязишиву, ихтияр ласун аьркинсса тIалавшинна дакъассар. Адамина кулпатрал заллур, хъунамари. ОьрчIругу, щарссагу кулпатрал залуннал рязишиврух хьуну бикIан аьркинссар. Амма ласнан щар­ссанил рязишиву къааьркинссар тIутIаврил, щарссанин къаччан бикIан буллан бучIиссаргу къатIиссар. Мяърипатрал, зана-кьала хъанахъаврил духIи-дуцингу агьамссар. КIилчинмур щарсса дуцин ччай ухьурча, щарссания ихтияр къаласурчагу, адаминал буржри щарссанин бувчIинну бувчIин буван, цува циван дуцлай уссарив, дуцинсса ци чарабакъашиву ду­ссарив ва дуцаврийну цалчинмуних аякьа чан къахьунтIишиву. Цаннал бюхъай, щарссагу чIарав щяриртун, кIукIлуну, къа­ччан къабикIанну бувчIин бан, гаманаллив, кьацIгу лакьича, щядикIу куну чIу лахъ бан. Гьаннайсса, щарссанищал маз лякъинсса, ххуллу лякъинсса чара­нну жура-журассар. Ци бухьурчагу, Идавсилгу (с.аь.в.) увкуну бакъарив: «Зуватусса яла ххуйми цала хъаннищал ва оьрчIащал ххуймири» куну. Так ххуймири куну бакъархха, ххуйминнавугу ххуймири, яла ххуймири увкуну бур. (Шикку чIурчIав, щияргу ххуймири тIий, «лучшие» тIисса мукъуйри. – БувчIин баву авторнал). На 2018-ку шиная шинай кулпатрал тематикалувусса инсан ура, кIилчинмур щар дуцин сукку хьуминнахьгу учара, хъинну жаваблувсса давур, цал азарийла пикри бувара куну. Циванни чIярусса хъами дуцаврил хIакъираву жучIава оькки­сса аваза бусса? КIира щарсса дуцаву дуну тIий бакъарча, му ишираву тIайладакъашиву дуну тIийри. ЧиваркIуннал «неправильное многоженстволул» къатIайласса эбрат ккаккан ду­ллай буну тIийри. КIилчинмур щарсса дурцувкун, къалмакъал хьуну, я цалчинмуния личIи хьусса ягу кIилчинмур кьариртсса ишру хъанай буну тIийри. ТалихIрайн хьул бивхьуну винна хьусса щарсса личIи дуллай ура цалчинмур щарссания нигьаувсун. КъатIайлассара. ЧIяру хъами дуцаврий ттангъа хьун дуллалиссар зул гъалатIирттал. Царагу щарссанил ихтияр ссуссукьу дуллан къааьркинссар дуцайхту. ОьрчIалссагу. Яла агьаммур ва ишри. Цавайннайрагу къия хьун къаритаву. ЦукунчIав ласнал ва щарссанил къалмакъал оьрчIайн щилан къааьркинссар. Ттун кIулли тамансса арамтал, адаврай ва ххуллий къуццу тIутIисса, кIи-кIира хъамигу дурцуну яхъанахъисса. Мукунминная аваза бакъассар. Циван? ТалихIран рахIатшиву ччиссар. Ва ялагу. КIилчинми хъами дуцлациссагу кIилчинми хъамину щар хьун рязисса душру буну тIийри.

– Хиджабирттавусса душру хъатIайгу бикIай, къавтIунгу бизай. Мукунсса ишру чIалай, диндалия, дакI дурккун, арх бувцсса ишругу шайхьунссар. Ми эбратну бикIан аьркинсса бакъарив?
– Жува оьрмулул кьаралдания, багьу-бизулул низамрая гъалгъа тIий бухьурча, жува Кьурандалийн, Идавсил (с.аь.в.) хIадисирттайнну чул бишлан аьркинсса. Бусурманнал тIуллайн, багьу-бизулийн къабуклай. Жува къаучарухха, бусурманчу къатIайлану къуццу тIий ухьурча, мукун бикIангу аьркинссар куну. Буссар бусурманнавугу къатIайлану къуццу тIутIиссагу. Хиджабирттал хIакъиравурив, на хиджабир­ттавусса ва къахиджабирттавусса душру куну, кIибачIаврил тарап къадугьара. На гьарца ссил хIурмат бувара ттулва ссиха кунма. Гьарца ниттирссил, буттар­ссил хIурмат бувара, хиджабраву буну-бакъа личIи къабуллай. Циняв ттул ссурвалли. Мяйжанссар, хиджаб лаххан ялув­ссар бусурман душнил. Му хиджаб ларххун занай буну-бакъа, мунин цинма кIулну бикIан аьркинссар лаххансса тIалавшинна Заннаятусса душиву. Кув лаххан аьркиншиврийн бучIан чIал хъанай бикIай, кувгу – ларххун. Ялун бурган, исламрал тIийкун бушивриврий, янналуву бакъассар иш. Инсан бюхъайссар тIакьа (тюбетейка – аьщуйн щун баву авторнал) дирхьуну занан, дин дуллалима куна къуццу тIун, мунал дакIниву ци иш буссарив жунма къакIулли. Мукунма хиджабравусса душгу. Агар душ хиджабраву бухьурча, чIа учинну мунин цуппа циван кIучI хьуну буссарив тIайлану бувчIаву. Цийрасса тIалавшиннагу кIулну, махъми ссурваврангу эбратну къуццу тIутIаву. Амма, хIакьину хиджаб къалархсса душ бухьурча, мугур жулва ссу, мунингу чIа учинну хиджаб лаххан аьркиншиву бувчIаву, исламрал хху­ллий цIакьну бацIаву. Хиджабравумур ххуймурди, къахиджабравумур къаххуймурди учин къашайссар, учавугу къатIайлассар. Цумурдив ххуймур, так Аллагьнанни кIулсса. ХIакьину хиджаб къалархмунил сара-кьияну ла­ххан бюхъайссар. Агар хиджабравусса душ къатIайлану къуццу тIий бухьурча, махъмигу миннуя лахьлан къааьркинссар. ХъатIал хIакъиравурив, ттун щийчIав аьй-бювкьу дуллан ччай ба­къар. На къалагара хъатIайн, ттул маччахъул лагай, амма на ми дащуй бихьлан къаикIара. БучIи-къабучIишиврул хIакъиравурив, зунмагу чIалай бур хIакьинусса хъатIайн буттахъал аьдатрур учин къахьунтIишиву. Дагъус­ттаннал хъатIив Европанал зумуну буллай бушиву. Жува циняв­ппагу бунагьралун къабагьанмур буллан аьркинссару.

– Музыка къадагъассарив?
– КуртI хъанарча, му гьартасса, дазу-зума дакъасса майданни. КутIану жаваб дулурча, бу­ссар музыкалул къадагъасса инструментру, буссар бучIи буллалиссагу. Музыкалул хIакъираву исламрал аьлимтурал дянив шай гужсса бяст-ччаллисса ихтилатру. Балайрду, балайрдал махъру — личIисса темар, музыкалул инструментру – личIисса. Жунма кIулли, уттизаманнул элмулул исват буллалишиву, пулансса музыкалул инсаннал хасиятрайн, дакIнил тагьарданийн бияла бушиву. ХIатта, музыкалул пулансса журалул инсан цала цува аьс увангума гьуз учин айшиву. КIусса рок ласурча, ванил инсантал ялун бурганмагума баххана байссар. Хасиятиртталгу баххана шайссар. Мудан пашмансса балайрдах вичIи дихьлан ччисса инсантурал дакIру кIюла дуккайссар. Психологтал бур укун тIий. Балайрдал мукъурттил хIакъиравугу, агар ми махъру мяърипатрайн, адаврайн щилащисса бакъахьурча тIисса, хIучча буссар. Махъсса ппурттуву, масалдаран, Заннаятусса тема дуссар, макьаннугу дурцуну, балай тIий буссар. Мунияту, аьмну ххал къабигьлай, гьарца иш личIи-личIину ххал бигьин аьркинсса буссар. Аьщуй-дазуй бавцIуну, цумур музыкалия бурив ихтилат, цумур балайлия бурив, мукъурттил мяъна-мурадрай ва цаймигу хIисавравун ласун аьркинмуний. ХIакъи-хIисавртту чIяруссар. БакIрайва учавхха, куртI хъанарча, захIмат-жапасса темар. Ци-бухьурчагу, диндалул жунма лахьхьин буллалиссар цумур-бунугу бунагьрая арх уцан. Дакъассар жухьра ихтияр инсан ккавккун къаччансса, лухIину чIалансса. Аьйкьлакьима, лагьу-лахъунтту, гьужумру къабуллай, хIурматрай, кIукIлуну бувчIин буллай, бакIрай ацIан уван аьркинссар. Жулва мурад бикIан аьркинссар бувчIинну бувчIин бувансса.

– НикIабру дахIаврил хIакъираву вилмур тарап цукунссар?
– Ттул позиция Муфтият­рацIун бавкьуссар. Муфтиятрал фетвардал отделданул, шариаьтрал текстругу хъирив лавну лавхьхьуну, ххал бувну, никIабру дахIлансса къадагъа дувансса чарабакъашиву дакъашиву бувчIин бунни.

– Ахирданий, спортрайн бучIанну. Ина спортрахунгу машхул хьуну ура. Спортрал цумур жура къакьамулссар дин дунан?
– Йога къадагъассар. Му спортгу дакъарча, физкультурар. Гимнастика, физиологиялулмур чул хIисаврай, йогагу чурх таза-куклу буллали­сса зарядкар. РувхIаниймур чул хIисавравун лавсун, на йога лахьлан щинчIав маслихIат къабавияв. Медитациярду, аьламращал дахIаву дуссар тIутIисса хаварду, цай иман дишин Зал ляхъан уваву – вай цимур-ца исламрая архсса затрур. Къадагъасса журардал хIакъиравурив, на навагу хьхьичIа боевой самболухун агьну уссияв, спортрал мастер хьунсса кандидатра. Ва каругу, ччаннугу щилан бучIисса журар. Рищай спортри. Мадрасалувун уххайхту, кьариртссия самбо. ХIабиблул буттачIан, Аьбдулманап НурмахIаммадовлучIан, тренировкарттайн занай уссияв, лачIун уккаврихун, джиу-джитсулухун агьссияв. Ттул оьр­мулувусса цалчинмур спортрив – боксри. Шинай боксрайн занай уссияв Аслан КъажлаевлучIан, ялагу ца шинайсса Аьдил МахIаммадов тIисса тренерначIан. Гьаннай­сса, ттулмур спортрал гьану боксри. Яла боевой самболухун агьну ивкIра 4 шинай. 2022-ку шинал Бразилиянал джиу-джитсулул Дунияллул чемпион хьуссара. Рищай спорт диндалун къакьамулссар, амма чIявусса инсантал кьувтIуну бур мивун, «бои без правил» машгьурну дур. Жу миннухун багьминнащалгу маслихIатрай гъалгъа тIун бикIару, машгьур хьуну, цIа-кьини бюхттул шайхту, дакI хъуншиву къадурну, хьхьичIун бурувгун зана-кьулу хъанахъияра тIий. Зу зулла шяраваллил, миллатрал вакилталлу, зух бурувгун буссар, ялун наниминнан эбрат ккаккан дуванну къуццу тIутIияра тIий.

ПатIимат Рамазанова