ЧIурттащиял шяраву хъу-лухччинуха ва ризкьи-кьинилуха зузисса кулпатраву Хасаев ЩайхмахIаммадлул ва Рукьижатлул тIювай увсса оьрчI АхIмадулбадави ляличIисса тарбиялулгу, дуккаврилгу лавайсса пагьму-гьунарданул заллу ия.

Щала цала оьрму ванал хас бувну бия дуккаврин, цала кIулшивуртту ларай дуллай ва къашайшалт хъин буллай. АхIмадулбадави жул шяраваллингу, махъсса халкьуннангу, ца мусил ттарцIну авцIуссар.
Къашай хьуми, жул шяравамигу, цайми-цайми миллатирттаяссагу муначIанъя кIункIу тIун бикIайсса. Хасиятрал авкьусса, дакI хъун дакъасса, къашайшалал тIутIимур вив итабакьайсса ва анаварсса кумаг бан бюхъайсса, щихачIав къалавхьхьусса хъуннасса ссавурданул заллу ия ва.
Кьинибархан цала захIматсса даврий зий увхсса инсан цукунчIав махъаллил къашайва къашайшалт шаппагу кьамул буван, оьвкунийнгу гьан, лехха-личIаву дунийнгу иян. Шяравун увкIнийгу, ияйва гьарца къашайшалачIан, оьрмулул бугьараминначIан, кьамул байва консультация бан.
Ванан хъамакъабитайва бив­кIу-буккулийн иян, чIявуну хъа­тIив-хъиншивурттугу ванайнъя тапшур дайсса.
Хасаевхъал тухум жул шяраву дурккусса, итххявхсса, аьркиннал чIарав бацIайссаннан ккаллиссар.
АхIмадбадавинал уссу Исрапилгу гьарцаннал чIарав ацIайсса уссия.
Мунал ссурахъал, миннал оьрчIру ХIажиев Юсуп, Аьв­дурахIман, арс Аьвдурашид, ссурахъу Хасаев Аьраби ва мунал оьрчIру Аьли, ХIусман, Муса, ссурахъал Миясат, Субайбат, Асият, арснал оьрчIру ва душру хъинну дурккусса, тарбия дусса бивзунни, вай цинявппагу цала хъунмяммаха лавхьхьуну зузисса бур.
АхIмадулбадавинал, паракьатну цала хозяйствагу дачин дурну, буттая ЩайхахIмадлуя, ниттия Рукьижатлуя ларсъсса ххуйсса хасиятирттал заллушивугу дурну, хъиривмур чIяру дунни.
Кулпат Зайнаб, арс Аьбдурашид, арснал кулпат Гульшан ва махъсса гъан-маччами лагма лавгун кумаг хьуссар АхIмадулбадави ва даражалийн лахъан. Ва ишираву дакIнин къаувтун къабучIир ванал ниттиуссу ХIажиев МахIаммад, Хъун дяъвилул чIумал Дагъусттаннал «Маслопромрал» хъунама технологну зий ивкIсса, цIакьсса зузала, Москавлив та захIматсса чIумала «Институт красной профессуры» бувккусса, фронтран накIлил продукциялул щаллушинна дуллай бувсса захIматрахлу хъунисса бахшиширттан (орденнан) лайкь хьусса. Ванал бияла хъунмасса бивкIссар.
Оьрмулуву цала ниттиуссиха лавхьхьусса ия АхIмадгу. Ванал бивкIу цинявннан бювхссар ва дакIнийнува буссар.
АхIмадулбадави хIурматрай икIайва Медакадемиялул коллективравугу, каялувчитурачIагу. Ванал цIуллу-сагъшиврух хъинну урувгун икIайва та чIумалсса ректор С.Н. Маммаевгу, махъмигу.
Медициналул хъунисса титуллал залуннан хъамакъабитайва цала буттал шяраваллил къайгъурдалсса буван, жямат цачIун буван, буруччин. Шяраваллил кьини учIан къахьурчангума, телеграмма дучIайва жямат барча буллалисса.
Буттахъал мина зия къадан АхIмадулбадавинал цIусса къатри дуруна. Ванал хъирив 15-20-ра къатри дуруна шагьрурдая бувкIун цайминналгу.
«Дараччи» клубрал президент Мариян Илиясова бив­кIуну, мунин кIанай цала арснал щар Гульшан Хасаева бувчIукун, АхIмадулбадавинал ванил ичIаллил къайгъурду къатлувуминнайх бавчIуну, Гульшаннун жяматийсса иширттаха зунсса чIунгу, кумаггу, тархъаншивугу дуллуна.
Ттул пикрилий, АхIмадул­бадави хъамакъаитансса лишан ттинин дурну дакъахьурчан, бучIия ва зий ивкIний, яхъанай ивкIний дишин.

ХIусайн Давыдов,
ш. ЧIурттащи