Июльданул 10-нний МахIачкъалалив, Дусшиврул къатрал Экспозиционно-выставочный залдануву, хьунни цIа дурксса художник, чичу, «Дагъусттан» журналданул хъунама редактор, Гъази-Гъумучатусса Марат ХIажиевлул «Аьссал Ххуллу» («Млечный Путь») тIисса цIанилусса выставка тIитIлатIисса шадлугъ.
Шикку ихтилатру бувна ванал даврил уртакьтурал, дустурал, ванал творчество ххираминнал. Вай цинявппагу чIурчIав дуллай бия Маратлувусса цимивагу гьунарданий, ванал дуллалимунил ляличIишиврий. ДакI мяш хъанай бия хIакьинусса Маратлул давуртту ххал дигьлан нанисса, чIярусса шиннардивун ялун диянтIисса никирттай.
Выставкалий дирхьуну дур Маратлул усттарну чичрурду дурсса чинилул тIахIунттив – личIи-личIисса журардал ва лагрулул.
Марат цуварив тIий ур:
– Аьрщарахсса, чинилухсса ччаву ттуву цакуну хIасул хьуна. Вайннуха зий дуссукъатлуву 90-ку шиннардий на дирчусса цалчинсса хьхьурду дия шану бакъасса. Хьхьурайгу чинилул бушкъапру ттул иттала къалагайва. Вайннуя ахирданий ци хьунтIиссарив тачIав кIулнугу къабикIайва, цал-цал пачливу вяртIа-кIичIу пIякь кунугу лагайва, ганиннин цимирагу хьхьуну бувсса захIматгу ратIух гьан буллай. Цимурцаннуву аьркинну бикIай опыт, цувгу шиннардивун бучIайсса. Вай гьантрай жул цалчинсса дуссукъатлун хьуссар 30 шин. Ва иширан хасну жу лугума буккан буварду. Чинилул, аьрщарал винна ччимур дувансса каши дуллай дур. Фарфор, керамика – ва анжагъ декоративно-прикладной искусство дакъар, ванияргу гихуннайсса затри, караматшивур. Инжилданий чивчумуний бувну, аьрщарая увну ур инсан. Аьрщарая хIакьинугу дуллай бур къатри ва чIярусса цаймигу затру. Усттарнал кIунттихьхьун ларсъсса аьрщарая дуван бюхълай бур ччимур карамат, – тIий ур Марат ХIажиев.
Выставка зунтIиссар июльданул 28-ннийнин.
Бадрижамал Аьлиева
