Октябрьданул 12-нний МахIачкъалалив хьунни «Справедливая Россия – За Правду» Дагъусттаннал региондалийсса партиялул отделениялул конференция. Ва дачин дурну ия партиялул Бюрорал советрал каялувчи, ДР-лул Халкьуннал Мажлисрал председательнал хъиривчу Камил Давдиев.

Шикку гьуртту хьуна республикалул 10 шагьрулиясса ва 44 райондалиясса партиялул отделениярттал вакилтал. ХIакьинусса кьини «Справедливая Россия – За Правду» циняв партиярдаву кIилчинмур ххуттай душивруцIун, депутатътурал сияхIгу ларайсса дур.
Заседаниялий хьхьичI ххуттай бивхьусса масъаларттавасса ца бия октябрь зурул 25-нний Москавлив хьунтIисса ва партиялул XIV-мур Съездрайнсса делегатътал бувчIаву. Ваний гьурттушинна дан бувчIуна Камил Давдиев, ДР-лул Халкьуннал Мажлисрал Культуралул, спортрал, жагьилтурал иширттал, спортрал ва туризмалул комитетрал председатель Мурат Пайзуллаев, Партиялул хъунмур советрал вакилтал Марат Аьлияров ва Валерий Степаненков, Партиялул советрал хъунмур палаталул вакил, ДР-лул Халкьуннал Мажлисрал депутат Шамил Оьмаров. Заседаниялий ихтилатру бувна Камил Давдиевлул, Мурат Пайзуллаевлул, Марат Аьли­яровлул, Шамил Оьмаровлул, НурмахIаммад ХIабибуллаевлул, Артур АхIмадовлул ва цайминнал.
Партиялул председатель Камил Давдиевлул бувсуна Дагъусттаннал региондалийсса Партиялул советрал дурсса даврил хIасиллая.
Партиялул советравун цIуну кьамул бувсса активистътуран буллуна партиялул билетру. Барчаллагьрал чагъарду буллуна Советрал иширттавух чялишну гьурттушинна дуллалисса партиялул вакилтуран.
Имара Саидова