Къюллул ЦIувкIуллал шяравасса Супиян Оьмаров чIявучин кIулли. Ванал усттарну бачин бай лакралгу, лакрал бакъассагу мажлисру, икIай чIявусса хъатIай-хъиншивурттай тямадану. Уттигъанну Супияннул итабавкьунни «Абадлийсса тирхханну» тIисса лакку мазрайсса жуж.
Луттираву бувсун бур цала оьрмулуву ряхцIаллий ххюра шин там хьуннин ккавкмуния, бавмуния, агьаммур бавтIун. Ванива чIалай бур чивчума лагма-ялттусса гьарзатрах хъуннасса къулагъас дусса ушиву. Лакку мазрай буккин шайма гъирарай ккалай, бумур ххал бигьлай, луттирал тамансса сий хьунни. Шиву дур чIалай лакку мазрахса ччаву, Лакку билаятрай дакI цIуцIаву. Гьарицагу шаэр айишай ниттиха шеърирду чичлай, аьшукь — ниттиха балай тIий. Зат вив бишайсса инсаннан гьарицаннангу кьутIин аьркинни, ялу-ялун хъун хъанахъисса, баявур хъанахъисса буттал кIанттул ялгъузшиву. Айиширчагу шаэр хьхьичIва-хьхьичI цанма ччан хьусса душниха чичлай, мунийгу аьй къадувавияв. Гьарцаннаву чантI къачайссар марцIсса асарду. Цайминнан ялттутува хьурчан эшкьи-ччаврил асарду, шаэрнан хъиннува куртIну, дакIнил вирдакI сукку хьунну шайссар. Ххуйсса махъру ца-цаннан канихьсса ярагъну, марцIсса гьаванугума бацIайссар. Ххуйну хIисав дарчан, ванал оьрмулуву гьарицагу шачIану бур эбратрансса.
Супиян увну ур магьиршиврул чулуха цIа дунияллийх ларгсса шяраву. Ва увну ур хIакьсса захIматгу, чIумуха лархьхьусса кIулшивугу архIал дачин дурсса кулпатраву. Ттатта Оьмар (буттал чулухасса) ивкIун ур къалайчи, цала захIматрайну ччатI ляхълай, амма жяматран ва бусрав хьуну ур кIурукъатлий, хаснува язи дургьусса кьинирдай, аьракьи хIачIан къадагъа дирхьуну диркIун тIий. Аманатгу бувнутIий му къадагъа дуруччин. Буттал бава – дарзи. Хъинсса, хIалимсса. Гьарица инсаннал оьрмулуха лархьхьуну янна дуруххан шайсса.
Ванал луттирава чIалай бур ва цана цува шанна шин хьуния шихунай дакIний ушиву. Ниттил чулухасса ттатта ивкIун ур Хъун дяъвилул гьурттучи. Гьарица каснан эбратран ишин бучIисса. Ниттил нинугу диркIун дур захIмат ххирасса инсан. Ванал ппу ивкIун ур оьрус мазрал учитель. Му бакъассагу, музыкагу ххирасса, оьрчIругу ххирасса, цанма кIулмургу оьрчIан лахьхьин буллалисса, цIакьсса тарбиячи. Ганан пагьламаннал касму кьюркьуну чIалай къадиркIун дурча, му касмулий гьашиву дан аьркин бакъассар тIий ивкIун ур. Цанма кIулмур цайминнал иширттаву, цайминнан хайрну ишла буллай ивкIун ур. Пагьламантурал школа цала бачин бувну унугу, ганан школалул оьрчIаву цайми гьунардугу чантI увкуну ччай бивкIун бур.
Пагьламаннал гьунар бунугу, ца жегъирххуллия тамунийн учIлай, гамунил сант рутлай, хьуну ур Супияннуя шаэр. Бувккун бур ванал цанма гьарица мачча-гъаннава магьиршиврул ва кIулшилул мархри. Бувгьуну бур ванал яла бюхттулмур пиша канил. Дунияллийх цIа ларгсса пагьламантурал ялттугу лавхъун, ваная хьуну ур шаэр. Мигу щия-бунугу къашайссар, ми караматсса халкьри, чявхълувух алмазру кунма, Аллагьнал дунияллийн буккан бувсса. Агар ми дакIниву хIусудшиву дусса, ка марцI дакъасса, чумарт бакъасса, щилчIав чIарав къабацIайсса, мазрал чапалсса бухьурчан, ми шаэртал бакъар. Супияннул шеърирду бур чIявуми буттал кIанттуха. Бюхъайссар му буттал кIанттухсса ччаврилгу чантI учин бувну бикIан ванаву шаэрнал тунну. Дур ванал назмурду чIумуха, инсаннаха, даражалуха, тагьардануха лархьхьусса. Хъанай дунутIий ччаврил къювугу, ххаришивугу, къаччан бикIаврил къащигу, ххув шаврил ххаллилшивугу, даражалул хъуншивугу, дусшиврул гъилишивугу, хаиншиврул къаччан бикIавугу ца дакIниву ядан. Я цучIав, я цичIав хъамабивтун бакъар ва луттираву аьч бан. Цаппарассаннал цал буккирчагу, цаппарассаннал, кIура-кIура баллай, гай цанма яла язи бивзми кIанттурду бур цIунилгу ккалай.
Бур ванал цала нитти-буттая, мачча-гъанная тамансса чивчуну.Ккаккан бувну бур вай га чIумуха лавхьхьуну хIалимсса, эбратран бишин бучIисса инсантал бивкIшиву. КъабивкIссания ми мукунсса, къауккантIиссия миннал дянива Супиян кунасса инсан.
Лакрал халкьуннал буссар учала: «МарцI урттуй мечI къаххяххайссар», – тIисса. Буккулт бур Супиян лявхъусса кулпат, агьлу, гьанна, га чIумух бурувгун, марцI урттуха лащан буллай. Ниттил аьзизшиврия, буттал агьамшиврия чивчумур ккалаккийни, буккултрал иттав макь дияй. Бур луттирай тIабиаьтрахагу тамансса чивчуну. Щаращив, нехру, кьунну, дарарду, кьанну, зунттурду хьхьичI бацIай ванал шеърирду ккалаккиний. Ччаврищал архIал мудан най дуссар къювугу, дукIлай, лихълай дуссар тирхханнугу.
Хъуна хьуну тIий цува ххаллилсса кулпатраву, Супияннул цаламур кулпатрахгу дур лайкьсса аякьа. Дур ванал назмурдаву, «Ттулва Дианан» тIисса, аьзизмунин хас дурсса назмугу. Му бакъассагу, вай чирчуцири назмурдал, вай жула вирттал бикIу, аьлимтал бикIу, учительтал бикIу, шяравусса, шагьрулийсса оьрму бикIу, тIайламунил, мяйжаншиврул мугьру бивщусса кунма ккаккан бувну бур.
Супиян Расулович! Уттиния тихунмайгу чIявусса луттирду чичлансса кьудрат дулуннав. Буккулт бур вихьгу, цила ххуйшиву, ххаллилшиву вин дурчIин дан хьусса вил Дианахьгу хъунмасса барчаллагь тIий. Зул оьрмурду лахъи баннав. Зул кюру Аллагьнал кашилийну хъиннува цIакь хьуннав, халкьуннал хьхьичI эбратрайнува, бусравнува личIаннав.
Ханича Аьлиева,
ш.Ккурккул
