ЦIуссалакрал райондалул бакIчи МаматIи ХIамзатовлул сипталий, ОьрчIру буруччаврил кьини райондалий хьунни ляличIисса аякьалийн лавсъсса оьрчIачIан шаппа-шаппай заназисса акция.
КIюрххила райондалул администрациялул, Культуралул ва КIулшивуртту дулаврил управлениялул зузалт, мукунма шяраваллил бакIчитал шаппа-шаппай лавгунни 14 шинавун бияннинсса оьрмулувусса, шанийн багьсса ва нину-ппу бакъасса оьрчIачIан. Мукунма вай бивунни хасъсса аьралий операциялул гьурттучитурал оьрчIачIан. Хъамаллурал бахшиш бунни вайннан нахIу-нацIурду дусса кьуцуртту. ОьрчIру ххари хьунни бахшиширттацIа, нину-ппугу барчаллагьрай бия вайннах дурсса аякьалухлу.
КIицI лаган, ЦIуссалакрал райондалий укунсса акциярду аьдатравун дагьну дуссар. Хъамаллурал цIухху-бусу бунни нитти-буттахь хьунабакьлакьисса масъаларттал хIакъираву.
Ва кьинисса акциялувух хIала бувххунни депутатъталгу. Райондалул Мажлисрал депутат, ЦIуссамехельтIиял шяравасса МахIаммадхIабиб Саидовлул бунни шяраваллил оьрчIан арцуйнусса кумаг.
«Хъинсса чIаххул»
ЦIуссалакрал райондалул Культуралул управлениялул зузалтрал «Единая Россия» партиялул кIанттул отделениялул вакилтуращал цачIу кIицI дунни «Хъинсса чIаххул» тIисса байран.
Ва акция, чIявусса инсанталгу лагма лавгун, ялу-ялун гурну лагай. Байрандалул сакиншинначитурал тIивтIунни авадансса ссупра чIаххуврал лази-ларкьусса хIаятраву, оьвкунни чIаххув-чIарахнайн.
Къатрал заллу, ЗахIматрал ветеран, райондалул цIуллу-сагъшиву дуруччаврил хIурматлувсса зузала, пенсионер Сиянат Аполлонскаял дакI тIиртIуну кьамул бунни хъамал.
Хъамалу оьвкуну бия райондалул администрациялул, Культуралул управлениялул зузалтрайн, ДЮСШ-лул ва «Единая Россия» партиялул кIанттул отделениялул вакилтурайн. НахIу-нацIулул авадансса ссупралух хьунни аьчухсса ихтилатру. Цинявппагу кIицI лаглай бия укунсса байран-дуссухаллил чIаххув-чIарахми, шяраваллил жямат кунначIан кув гъан байшиву, укунсса щябикIавурттайну яхьунтIишиву ва цIу дуккантIишиву зунттал халкьуннал хъамал кьамул баврил аьдат.
Ва кьини, цинявппагу чIаххул хIала бувххун, увкунни ххаллилсса лакку балайрду, бивзунни къавтIун. Ва хьунни дакIний личIансса щябикIаву.
Андриана Аьбдуллаева
