Июнь зурул 2-нний МахIачкъалалив уттигъанну тIивтIусса, профессор Эса Аьбдуллаевлул цIанийсса Лакку маз лахьхьин буллалисса центрданий Цалчинсса занг рирщунни.
Жу хьхьичIвагу балжину бувсъссия ва тIитIинсса сиптачину хьушиву ДР-лул Жяматийсса палаталул хъунаманал хъиривчу Ссапарбаг Аьбдуллаев, центрданун цува заллусса помещениягу ванал буллушиву ( Цалчинма Петрдул цIанийсса проспект, 32-мур къатта). Ва даву щаллу даврил ххуллий диялсса даву дурссия МахIачкъалаллал 16-мур школалул лакку мазрал учительница ПатIимат Аьлиевал.
Центрданийсса Цалчинсса занг рирщунни ОьрчIру буруччаврил кьинилул шадлугърай. БавтIцири ва лакрал миллат барча буллалисса махъру лавхъунни Ссапарбаг Аьбдуллаевлул, Чичултрал союзрал лакрал секциялул каялувчи Супиян Оьмаровлул, Ниттил мазру лахьхьаврил центрданул хъунмур Марина ХIасановал, Ниттил мазру лахьхьин буллалисса ассоциациялул хъунмур Зухра Дибировал, А. Тахо-Годил цIанийсса институтрал (ДНИИП) ниттил мазурдил секторданул элмийсса хъунмур зузала Светлана Мутаевал, Нитти-буттал комитетрал хъунама Жабир Абакаровлул ва цаймигу бусравсса хъамаллурал.
ПатIимат Аьлиеващал архIал кабинетрал оформление лавайсса даражалий дуван захIмат бивхьусса Супиян Оьмаровлул кIицI лавгунни ва ххарисса кьини дучIаннин чIявусса инсантал ссавур дакъа ялугьлай бивкIшиву, лакку маз лахьхьин ччисса чIявусса бушиву, жува циняв ххари буллалисса иш бушиву ва гъирарай мукунминнан кумаг буллантIисса даву дайдирхьушиву.
Шадлугърал бутIа къуртал шайхту, ПатIимат Аьлиевал дирхьунни цалчинсса дарс, кIул бунни бавтIцири расписаниялущал. Гъинтнил шанмагу зуруй утти уква лакку маз лахьхьин буллантIиссар центрданийн заназиминнан. Ванил бувсунни шиккун занан ччиминнал сияхIрай 112 ученик ушиву цалсса. Вайннава яла чIаваманан дур 5 шин, яла хъунаманан – 67, яла чIявуми 15 шинавун бияннинсса бур, 9 инсан 65 шинавун ияннинсса ур, 28 инсан тIурчарив 30 шинавун ияннинсса ур.
Барачатсса дайдихьу хьуннав, хIасиллаягу ххари хъанай, жулва наслу ва центрданул 50 шинал юбилей дуллалисса чIунгу лакрал тарихраву нясивну лякъиннав!
