Ва ххуллухь «Илчи» кказитрал редакциялийн хъамалу увкIунни хасъсса аьралий операциялул гьурттучи, Рамазаннул арс Руслан Рамазанов. Ванал ппу ур ЦIуссаккуллал шяравасса, нину — ГьунчIукьатIатусса. Къизгъинсса талатавуртту нанисса хасъсса аьралий операциялул иширттаву аьралий гьалмахтал ххассал буллай ур тIий цимилгу бавссия жун ваная.

Увну ур Руслан 1979 шинал Каспийск шагьрулий. ГьунчIукьатIув лавгун ур ва цалчинмур классравун.
ЛичIлулсса, дарсру лахьхьайсса, низам дусса унутIий ва ххирасса ивкIун ур учительтуран .
– ДакIний бур, нава школалия нанисса чIумал, ттула цалчинсса учитель Абакар ххуллухъин учин увкIсса куц. «Ттул яла итххявхма ученик циван уцлай буру», — тIий, аьратталгу увккун, къурушрал кагу дургьуну тIайла увкссара. Шилун увкIсса чIумалгу ЦIуссаккуллал школалий Саржанат Оьмаровнал: «Ачу, бавал, щяикIу», — тIий, ца ниттил куннасса аякьагу дурну, кьамул увссара школалийн, – буслай ур Руслан.
Хъуна хьуну ур Руслан ЦIуссалакрал райондалийсса ЦIуссаккуллал шяраву. ЦIуссаккуллал дянивмур даражалул школагу къуртал бувну, лавгун ур аьралуннаву къуллугъ буллан. Къуллугъ буллай ивкIун ур Архангельский областьрай­сса ракетный войскалуву.
Гьуртту хьуну ур Руслан 1999 шинал Дагъусттаннайн Шамил Басаев ва Хаттаб бакIчисса къачагътурал кьюкьри ххярхсса дяъвилул иширттавух. Та ппурттуву Русланнухьхьун къачагътурал боеприпасру дусса кIану биривну, ми цамур кIанттай ладиртун диркIун дур. Пурсат бирияйхту, цала лабивтсса ярагъ жуламиннахьхьун буллуну бур. Танива ивкIун ур ва кьянкьа-кьурчIисса, нигь-ццах дакъа­сса жагьил. ЦIуссалакрал райондалий дяъвилул ишру нанисса чIумал Руслан 19 шинавусса жагьил ивкIун ур.
Хасъсса аьралий операциялийн гьаннин дальнобойщикну зий ивкIун ур.
Украиннал аьрщарай хасъсса аьралий операция баян бувсса ппурттуву Руслан уссия гуманитар кумагру батIлай ва ми аьралийтурачIан биян буллай. Шамийла лавгун ур СВО-лийн кумагру биян бан. Аьралий иширттаву аьдат бакъасса жагьилтал оьрмурдацIа хъанахъисса ишру асар хьуну, Ватангу дуруччин, жула оьрчIахлу кьисасгу ласун гьансса пикри хьуну бур ванан.
Русланнун «Ахмат» спецназравун гьансса маслихIат бувну бур, битан лахьхьин баврил ва аьралий иширттаву сасан баврил цIанихсса инструктор, ЧIарттал шяравасса Марат СутIаевлул. Шиккува бусан, Маратлул тамансса кумагру бувссар жула аьралийтуран техникалущал зун ва битаврил опыт лахьхьин буллай.
2022 шинал ссутдайдихьулий Руслан увххун ур «Ахмат» спецназрал «Восток» батальондалувун. Сивсусса, кьянкьа-кьурчIисса ушиву чIалай, Донецкаллал областьрай Еленовка ва Новомихайловка тархъан буллалийни разведчикну ивтун ур. Донецкалия вайннал батальон гьан бувну бур ца яла захIматсса ва дяъвилул цIу къизгъинну нанисса Запорожский областьрайн Работинолийн. Шикку ванал полкрал шанна контрнаступление дацIан дурну дур. Гьуртту хьуну ур Руслан Луганскаллал областьрайсса Орехово тIисса шяраву нанисса оьсса талатавурттаву. Аьралий иширттал опыт бусса унутIий ивтун ур штурмовой взводрал отделениялул командирну.
Цайва бивхьусса бигарду лавайсса даражалий бартбигьаврицIун, Руслан, ккуллардал цIаравух увххун, щавурду дирсса гьалмахтал ххассал буллай, медициналул цалчинсса кумагру буллай ур.
– Ца ппурттуву, щавурду дирсса оьрчIру госпитальданийн бувцуну увкIсса чIумал, махIаттал хьуну ивкIра, ттикку ттула хъинирву, архIал школалий дуклай бивкIсса Альбина Къапланова хьунабавкьуну. Альбина бур хасъсса аьралий операция нанисса зоналий аьралийтурал оьрмурду ххассал бу­ллай. Уздансса хъамитайпа, кIива оьрчIал нину Альбинал кьянкьашиврул ва сисаврил хIайран буллай бур цинявппа. ХIакьину ва бур СВО-лийсса Каспийскаллал флотилиялул медициналул занази батальондалул операционный сестрану. Цалва коллегахъащал вайннал кьинилун 50-хъул операцияртту буллай бур щавурду дирсса аьралийтурай, – буслай ур Руслан.
ЦIанасса ппурттуву Руслан ур АьФ-лул Обороналул министерствалул 150-мур мотострелковый дивизиялул взводрал командирну. Аьралий бигарду би­ттур буллай ур Луганскаллал областьрай.
Аьралий бурж лавайсса даражалий бартбигьлагьисса, вихшала дишинсса, хьхьичIунсса аьралийчу хIисаврай, Русланнун цала оьрчIал, кулпатрал ялун иянсса ххишаласса гьантри булайсса бур.
Гьарица кIанттай кунма, хасъсса аьралий операциялул иширттавугу хьхьичI ххуттай бур жула оьрчIру.
– ЧIалачIисса куццуй, цIанасса аьралий ишру личIисса журалул бур. Донецкалий бусса чIумал гьаваллавух дронная фосфор бичлан бивкIуна. Ми чурххайн багьарчан, га цIана базу ччуччин буллан бикIайва, хIатта ишла бан къадагъа дирхьусса бунугу, бичлай бия. Душманнал артиллериялул, цукунсса ци гьужумру буллай, ци даражалул техника ишла дуллай бухьурчангу, жула аьралийтал ца шаттирал махъунмай къавхьуну талай буссар, – буслай ур Руслан.
ЦIакьсса дахIаву дур Русланнул аьралий гьалмахтуращал. ЦIухлай, кIул буллайна ур цуманан ци аьркинну дуссарив.
Тайннал рациярттал жула аьралийтурал ихтилатру ашкара буллай, вичIи дихьлай бушиврийн бувну, группардаву жула мазрай чичлай, буслай, мугъаятну бикIан аьркинну бур тIий ур.
– Гьай-гьай, бигьасса бакъар хасъсса аьралий операциялул ишру. ЧIявусса оьрчIал жанну дуллунни. Жущалва архIал ца къувилуву щябивкIун бивкIсса оьрчIру махъунмай зана къавхьукун цукун бикIанссар. Шавай отпускрай увкIсса чIумалгу, ттула гьалмахтал дакIния къабуклай, макIрагу ккаклайнма бикIай. «Жу шикку оьрмулул ва бивкIулул ххуттай бавцIуну буру, ина мийх ци дуллай ура?» – тIий, чичлан бикIай. Пайда бакъа, отпуск къуртал хьуннин, ттула мюрщисса оьрчIругу кьабивтун, махъунай ачин багьай, – тIий ур ва.
Русланнул бусласимунийн бувну, тайннал чIявуми инсантал цивппа та оьсса режимрая тархъан баврия рязину бушиву бувчIин буллан бикIайсса бур. Кувгу, тайннал чул бувгьуну, жула аьралийтурал хъирив бивзун, вайннаясса информация цаламинначIан гьан буллан бикIайсса бур.
КутIасса чIумуй СВО-лий ккаккан дурсса къучагъшиврухлу Руслан лайкь хьуну ур «За храбрость» 1-мур ва 2-мур даражалул медальлан, Донецкаллал Халкьуннал Республикалул 4-мур даражалул «За храбрость» медальданун, Аьрасатнал Федерациялул Минобороналул медальданун ва Луганскаллал Халкьуннал Республикалул «Доброволец» медальданун.
– Дагъусттанная, хаснува ЦIуссалакрал райондалия, чIявусса оьрчIру гьуртту хьунни ва тамансса оьрчIал виричушиврий жанну дуллунни хасъсса аьралий операциялул иширттаву. Ватандалул мурадру буручлай бивкIсса къучагътурая ялун нанисса никирангу кIулну бикIаншиврул ххуйну хьунссия райондалий СВО-лул гьурттучитуран хас бувсса музей ягу «Аллея Боевой Славы» тIитIирчан. Мукунсса сипталущал райондалул каялувчитурайн оьвчаву дан­сса пикрилий бур хасъсса аьралий операциялул гьурттучитал, – увкунни Русланнул.
Хъуннасса хъар лахълай бур хIакьину хасъсса аьралий операциялий гьуртту хъанахъиминнал кулпатру, ниттихъул. Русланнул кулпат Динарангу кIия арс тарбия ан бигьану бакъар.
– Телефон канища щяв къадишара оьвчиннин ялугьлай. Русланнул оьвчайхту, бигьа лагара, рахIат буккара. Связь дакъаний навагу лагара ванан ххирасса дукрардугу дурну, аьралийтурансса ссайгъатругу лавсун. Асар хъанан бикIай аьралий гьалмахтурал дянив Руслан ххишала акъа хIурмат-кьиматрай ушиврия, – буслай бур Динара.
Барчаллагь Руслан , жущал хьунаакьин учIаврихлу.
Ватандалул мурадру буручлачисса аьралийтал цIуллуну-сагъну зана хьуннав ссавур дакъа цахва ялугьлагьисса ичIувациринначIан.
Имара Саидова