Августрал 23-нния 25-ннийн Оьргърал шяраву хьунтIиссар халкьуннал творчествалул щалагу Аьрасатнал лагрулийсса «Кубачи» тIисса фестиваль. Ванил хIакъиравусса пресс-конференция хьунни августрал 14-нний «Дагъусттан» РИА-лий. Фестиваль дуллалиссар Оьргърал художествалул комбинатран 100 шин хъанахъаврин хасну.
Фестивальданий цукунсса ци давуртту дикIантIиссарив, цIанасса чIумал ва иширал хьунин ци хIадуршинна дуллай буссарив бусан бувкIун бия ДР-лул туризмалул ва халкьуннал художествалул промыслирдал министрнал хъиривмур Анна Безрукова, «Кубачинский художественный комбинат» ГУП-рал директор Мурад ХIажияхIияев, халкьуннал творчествалул щалагу Аьрасатнал «Кубачи» фестивальданул каялувчи Асият Аьбдуллаева, «Народные художественные промысли Дагестана» ДРОО-лул исполнительный директор Сяид Ниналалов.
Фестивальданул сакиншинначи – Дагъусттан Республикалул Туризмалул ва халкьуннал художествалул промыслирдал министерство. Уртакьтал: Дахадаевский райондалул администрация, Оьргърал шяраваллил администрация, «РемесловЪ» тIисса цIанилусса художествалул дуссукъатта (ш. МахIачкъала).
Фестивальданий гьуртту хьун вай гьантрай жулла республикалийн бучIантIий бур Къалмукьнавасса, Чувашиянавасса, Татарстаннаясса, Астраханнал, Нижегородуллал, Челябинскаллал, Самарскаллал, Краснодардал ва Аьрасатнал цаймигу областирдаясса хъамал. Гьуртту хьунтIиссар жулла республикалул районнаясса усттарталгу. Цинявппагу хIисав бувну, фестивальданий цалла карунних дурмур ккаккиялун дишин най бур 60-нния ливчусса усттартурал.
Фестиваль тIитIлатIисса шадлугърайсса батIаву хьунтIиссар августрал 23-нний Оьргърал художествалул комбинатрачIа. Аьрасатнал усттартурал каруннил дурмур ккаккан дуллантIиссар 40 чятирдануву. Хъирив халкьуннал къавтIавурттал ва балайрдал коллективирттал ккаккан дувантIиссар концерт.
Фестиваль нанисса шанмагу гьантлий хьунтIиссар личIи-личIисса шадлугъру, халкьуннал канил пишардал мастер-классру, творчествалул конкурсру, Оьргърал художествалул комбинатрал тарихраясса ихтилатру, оьргърал хъаннил янналул дефиле, тяхъашивуртту, оьргърал тIуркIурду, хъамаллурансса экскурсиярду ва чIявусса цаймигу ишру.
Ва кьинисса хъамаллурал бусаврийн бувну, фестиваль лавайсса даражалий, ванил гьурттучитуран ва хъамаллуран дакIний личIансса куццуйсса хьуншиврул хIадур хъанай, зий дусса дур хъуннасса команда. Ва ишираву республикалул каялувшиндарал чулухагу багьайсса кумаг бусса бур.
КомбинатрачIа тIитIин най бур цIусса музейгу, ванийну жулла республикалий ца музей ххишала хьун най бур. Шиву ккаккан бувну ва бувсун бикIантIиссар комбинатрал гьану бизлай бивкIминная, шикку ттуршра шинал мутталий хъанай бивкIмуния, комбинатрал тарих чичлай бивкIминная.
Пресс-конференциялий ялагу хьуна Оьргърал художествалул комбинатрал къатрал ремонтрайн багьайсса, комбинат цIу буккан баврийн, хьхьичIрасса хъинсса аьдатругу дурурччуну, ва ляличIисса касмулуха зузиминнан мюнпатрансса цIуми ххуллурдугу лявкъуну, хьхьичIунмай бачаврийн багьайсса гьарта-гьарзасса ихтилатру.
Бадрижамал Аьлиева
