Булбул Оьмариева

Ниттил маз

Ттул дакIнил балайгу,
Назмурдал ххагу,
Уздансса лакку маз,
Виватур найсса.

Ирсирай нанисса
Хазнану бацIлай
Буттахъая бивсса
Ттиркьюкьал мазрай.

Зунттал алвагьшиву
Бусан бюхъайсса,
Зярчарияр зярсса
ЧIукIа бан шайсса.

Щаращал къявхъливух
Баллан бикIайсса.
Щищар дуцин шайсса
Вил мукъул дуцин.

Вил чIурдай экьинай
Дуссар ратIругу,
НахIусса гьаварал
НахIалалухун.

Ци духлагарчагу
Ва дунияллий,
КъадухлагантIиссар
Жул вихсса ччаву.

ДакIнил куртIнивусса
Ттула асарду,
Ниттил маз, на мудан
Вийну аьч бара.

Лелуххантрал мурхь

Дустал, жучIа буссар
Лелуххантрал мурхь.
Зу вих къахьунссару,
Ва бур карамат.

Ахъулссаннун кIанай
Къяртрай бур чIелмулт,
Бачирала бурган
Алжаннул багърах.

МахIатталсса иш бур
Хъюртул мурхьирай –
Хъюртун кIанай дуссар
Шярултрал къюмай.

Къепригу, ххяпригу –
ЯтIулсса тIутIив.
Кюрттаву иминну
МюрщитIулт шанай.

Ххарил аьтIунссару,
Ххал хьурча хъару,
Яруннин кIанайгу —
Мюрщисса хъюрув.

ЧIалай дур мурхьирай
Азарда хIисав,
Азарва журасса
ЧIелмултрал массав.

Вамур къяртлуй буссар
Исулмур кюру,
Тинмайну чIаххуврай –
Ччиккулмур кюру.

Къяртрал дянивугу –
Вяркъулмур кюру,
Кюрттараву тIурча –
Къягъулми оьрчIру.

Укун буссар гьарми
ХIала-гьурттуну,
Цаннищал ца лехлай
Уссу-ссурвалну.

Макьанну дуцайссар
Булбул чIелмуллул
Щалла щар дуцIайссар
Дармансса чIурдал.

Самолет лерххун най дур

ЧIалай бурив кIа майдан,
Ачу самолет къур дан.
Данну ца-кIира ккуруг,
БакIру гьанагьи буван.

Бурхха ссурулккурттагу
Зунттуйх зунххи бивхьуну,
КIа оьрчIи-кIури ламуйх
Лахъанссару кIиягу.

– Нагу, нагу учIанна,
ТIанкI учинна ссавния.
Ца лелуххул хъа хьуну,
Зунттул хъачIрай ликканна.

Лавгуна вай шамагу,
Цаннал хьхьичIун ца уклай:
Аьли, Вали, Пиркъули –
Ссавний гьунарду буллан.

Да, гьурра, да, гьурра,
Да, гьурра, дустал,
Ссурулккуртлуйх лавхъун
Най ур ца инсан…

Вана чIалай гьарнан
Бюхттулний къучагъ,
Лелуххул хъа куна,
ПпарашутIращал.

Гьанай дур самолет
Ккуругру дуллай,
КIаних ялугьинал
Бур гьуя-гьарай.

Ххаришиву гьарнал –
Хъанай бур хIайран,
Виричунал гьунар
Хъанай бур мяйжан.

Ццах къачарув, оьрчIрув,
Зу ттуруллая,
КIаксса лахъсса зунттал
МицI-муруллая.

ТIанк увкунни цаннал
ПпарашутIращал,
Дус хьунни бюхттулний
Зунттал барзущал.

Гьурра, дустал, гьурра,
Ссавруннал лачинт.
Гьарцаннал дакIниву –
Шадлугъ дансса иш.

Мукъурттил ссинигъру

ВичIилуссал
ЧIанну тIартIун,
ВичIив дуссар
Тти микIларчIун.

КIулли бугьай
КIуллал къатIа
Хьуну бур тIар
Бакъа-къатIа.

Ччитул самул
Ччитри бахIлай,
Ччитул бархIру
Бур тIар лахIлай.

Ккаччил мечIал
Ккурчгу дурну,
Ккаччил яла
ЭнчIгу дунни.

Ччиккул усру
Ччаннаяту
Ччиккумяврал
ХIайп цир ликкан..

Яттил нисру
НахIу дизлай,
Ттуккул нисру
Бур къаканай.

КIуллул аьрщи
ДакIнин дагьлай,
КIулли буссар
Зат къаканай.

КъячIи-тIутIал
Къюмай дишин,
Къарил дур тIар
КъячIи ласлай.

Ххялцул чухълул
Гьухъа барча,
Гьухъа битан
Къабитай тIар.

Дуснащалсса ихтилат

– Валий, ина чунайра?
– Базаллувун чай найра.
– Ци дахханна, ци ласунна,
Къабусарча, ца ччан щунна…

– Ттуккул нисру дарххуну,
Яттилми нис ласунна,
ЛачIал ччатI ва яттил нис
Ахттайнссаннун дуканна.

Синттул усру дарххуну,
ВичIилусру ласунна,
Гайгу ссин пишкаш дурну,
Ттула ссу ххари банна.

Ца ласапIитIгу ларсун,
Ссур буллай ссуссин данна,
Яла, машай дирхьуну,
Ца машина ласунна.

ОьрватIал хъатIи

Кьяр-кьяргу тIий, оьрватIи
ОьнтIуллува бур оьвтIий,
ХъатIи буллай буруча,
Най бурув, бакъарув тIий.

Зюннав-дачIу дав-дав тIий,
Гюргу тIий бур гюнгутIив,
Щинавусса оьрватIив –
Щакъалиххавай къавтIий.

ХъатIигу хъатIи бур тIий,
ХъатIригума бур къавтIий,
ОьрватIачIан бияйхту –
Ца бюхттулну балай тIий.

ГьайтIа, гьурра, гьарсса тIий,
Ник ришлай, къутри дуллай,
КъавтIисса куц верчIичIу,
Вяркъущал архIал цачIу.

ОьрватIул оьрчI къудурсса,
КъавтIала пагьму бусса,
Бярнил лагма магьирну
Дунни увинтру гурсса.

Ччикку ва барзу ччалли
«Мархьбищулий» бувккунни,
Нихъри мусилсса къавтIалт
«Урминдалий» бивзунни.

Лелуххантрал дунни хор,
ЧIев-чIевлул макьант дуцлай,
Вай оьрватIал ччавриха
Буссар лахъну балай тIий.

ЧIелмултрал макьаннахун,
ГъангъаратIул дачIухун,
Наврузбаг ва жалин бур
Къиссу буллай булувкьун.

Ласира, оьрчIрув,дачIу,
Рищара зюннав-дачIу,
Лагма-ялтту зунттурдал
Ласунссар макьаннал чIу.

ЯтIул мусил оьрчIшиву

Хьунабакьлайнма бура
На ттигу оьрчIшиврущал:
Гъараллащал, тIутIащал
Зунттал неххал щинащал.

ЧIалачIисса аькьилну
Лухччайх заназавугу,
БачIва ччаннах урттувух,
Хьхьем дюхлулсса дунугу.

Оькъавкунува бучIай
Пикрирду ва асарду,
Ливчунийн чару кунма
Лечлачисса навагу…

ЦIунилгу дакIнин багьай
ХъатIив ва ссувхIатругу,
Щяв къалаллай къавтIисса
Щарнил мюрш жагьилталгу.

КIачливу лархъсса цIугу,
ЦIарал ялув кIункIургу,
ЦIияллая пуркIугу,
ЦIарайх бувсса нувщигу.

Хъун шагьрулий чIалъаьрдай
Дунугу эмаратру,
Жула бюхттул зунттащал
АрхIал дацIан дан къашай.

ЯтIул мусил оьрчIшиву
Ттиркьюкьах чичлай бура,
ТIутIавух лечай оьрму
Щугълурдай щашлай бура.

Аьйша ва Шамай

Аьйшал даймур
Ххуйну дувай,
Шаппай бувхни,
Къатта башай.

Лакьай, лишай,
Шюшай, дукьай,
Ванил кару
Мусил дур чай.

Шамай тIурча,
Шаппай бучIай,
Багьну шанийн,
Шанан бикIай.

Дукьан, лакьин
КъакIулли чай,
Шамайл кару
Карав дур чай.

Ттул кацIа

Авай, ккаккан ттул кацIа,
Пахру бур ттун ваницIа.
ДакI цIимину ланцIа тIий,
ХьхьичIун буккай цIир-цIир
тIий.

Ттул кацIлун маз кIулния,
ЦIухланссия ци-цигу,
ЦIитI бивкIун ттул иттавгу,
Бусланссия хаварду.

Вайми ккаччив кIяв-кIяв тIий,
Оьванма бикIай хIап тIий,
Ттул кацIамур, огьо-гьой,
ЧIелму кунма, тIанкIа тIий…

КацIай, кацIай, ттул кацIай,
Лечлачисса къабацIай.
Авай, ккаккан ттул кацIа,
Пахру бур ттун ваницIа.

 

Ажари ва аьнакIи

Ажари:
– Ттул аьнакIий,ттул жалин,
Арцул къеп, авур лажин,
Хъахъи дарайлул гьухъай,
Ттул аьнтIикIай, ттул ккариш,
Пишкаш данна вин каниш.

АьнакIи:
– Ва ажарий, ажарий,
Ттул къучагътурал бакIчий,
БакIрай мусил таж бусса
Ттул пахрулул щаращий,
Банна на вин щайини.

Ххалав

Урттун палцI тIий дур гьанну.
ЦIана тиккунгу гьанну,
Гьухъа ританнин ттиликI,
ПалцI банну чIиви чIиникI.
Уртту-тIутIал халича
Кувссая бизан буллай,
Цулуцала Ханича
Бия хIарачат буллай.
Каниву кьалан кунма,
ХхиртIтIи бувну байлаххи,
Дишин дурну ссиличIайн,
ХьхьичI най ур чIиви ХIусайн.
ПатIил канихь ххялаххи
Хханссар хъунма лелуххи,
Ванил дурцусса макьан
Гьа хьунни ххулув кьакьан.
Аьлил дурну аьрава
Аьлишал кумаграцIух,
Душруми – мюрщи кару
ДуцIлай ххалал аьрава.
Щюллисса нахIу ххулув
ОьрчIалли хIадур бувсса.
Барчаллагьру, бахшишру
Вайналли хIалал дурсса.

Ажари

Зунзулчаннал ажари
Зунттахату личайхту,
Жул ппалату ажари
Э-оь-оь тIий байбишай.
Э-оь-оь! Гьаз хьияра,
Дуллусса дарс лахьхьияра!
Лахьхьияра!
ЧантI увкуна Шамил
Ажарттул чIуний:
– Нарив къаизайсса?
Чани хьуну дур!
КьабикIу, ажарий,
Паракьат хьу тти,
Лу канил бувгьунни
Шамиллул утти.

Бургъил нур

ХIаллих бахьлавгунни
Зунттухун баргъгу,
Бувккунни ххяллава
Дякъил хIукъугу.
Бартукьравун бавкьун
ЧIиви Паригу,
ЧIуллух щядиркIунни
Хъунна-бавагу.
– Бавай, баргъ цибуври? –
АьтIий бур Пари.
– Зунттухун лавгунни, –
Буслай дур къари.
БучIантIиссар гьунттий
Баргъ, цIунил пар тIий,
Циван бура ина
Аьсивну аьтIий?

ТIутIи

Ларсун бувкIуна ТIутIи
ЯтIулсса хъункIул тIутIи,
Тяхъа бувккуна БатIи,
Ххал хьуну дуснахь тIутIи.
– ТIутIий, тIутIи ча риттав? –
ЦIувххуна БатIил ТIутIихь.
– Вай дур хьуну жул хъюву,
Хъюлчай тIий дур ахъуву.
На цIана шаппай гьанна,
Гьанна лавсун бучIанна,
Зул ахъувугу, БатIий,
Ххяххаван ятIул тIутIив.