Ларгсса бигьалагай кьини МахIачкъалалив «Аьрасат-ттул тарихри» тIисса паркраву хьунни 19-мур ттуршукулий, Дагъусттаннай дакъагу, республикалул кьатIувсса билаятирттайгу цIа машгьурну диркIсса тIарикьатрал щайх, имам Шамиллул устаз, яла хъунама маслихIатчи Гъази-Гъумучиял Жамалуттиннул «Этика, угодная Творцу» тIисса луттирал презентация. Исламрал аьлимтурал бувсмунийн бувну, щайх Жамалуттиннул кIунттила дурксса чичрурдаву «Адаб ул-мазия» («Зал рязи хьунсса аьдлу-низам») тIисса ва трактат, ккаллину дур ца яла кьимат лахъмунин.
Презентациялийн бавтIцириннавух бия динчитал, аьлимтал-востоковедтал, рувхIаний идарарттал вакилтал, студентътал ва жяматийсса ишккаккулт.
Республикалул Муфтиятрал элмулул отделданул каялувчи МухIаммад ХIажиевлул балжину бувсуна ва лу итабакьин хIадур буллай дурсса даврия.
«Муфтиятрал каялувшиндарайну редактортурал хъуннасса даву дурссар, итабакьиннин цал текст цачIу бивхьуну ххал бивгьуссар канихчичрурдал вариантирттащал ва копиярдащал. Канихчичрурдал вариантругу тамансса дуссар. Лу хьхьичIва-хьхьичI дунияллийн бувкссар аьрабнал билаятрай. Ялар му Дагъусттаннай ва Аьрасатнал цайми регионнай машгьур хьуссагу. Оьрус мазрайсса луттираха зий барзру хьуссар, хъинну ялув бавцIуну таржума бан багьлагьисса даву дуну тIий: ссупий терминну бувчIин буллалисса, накьшибанди щайхтурал дахIаврил ххал къаруцанну бувчIин бавуртту дуван багьлагьисса, мукунма авторнал биография мяълумну чичин, элмийсса бувчIинбавуртту дуван».
ЦТО-лийсса Муфтиятрал вакил МухIаммад Майрановлул увкуна:
«Уттинин ва луттирал куртIсса мяъна-мурад лаласун хъанай бия так ххуйну аьраб маз кIулсса инсантураща. Утти, Муфтиятрал отделданул хIарачатрайну, оьрус мазрайн ххуйну таржума бунни. Гъира бунаща буккин хъанай бур. Ва лу бувккуманал чара бакъа цалла рувхIанийсса дуниялгу авадан дуллалиссар, исламрал хIакъиравусса кIулшивурттугу куртIгу, цIакьгу дуллалиссар».
Философиялул элмурдал доктор, Дагъусттаннал Гуманитар институтрал теологиялул кафедралул хъунмур Асият Буттаевал лахъсса кьимат бивщуна хъунисса аьлимтурал давуртту машгьур дуллалисса ххуллий Муфтиятрал дуллалисса даврин.
«Жунма, Совет Союзрай яхъанахъисса инсантуран, къакIула Башларов цурив, Гъази-Гъумучиял Жамалуттин цурив. Дагъусттаннай, хаснува Лаккуй, мудангу бивкIун бур гьарца чулухунмай итххявхсса аьлимтал. ХIакьину Муфтиятрал хIарачатрайну вана дунияллийн бувккун тIарикьатрая, мунил мурадрая ва адабирттая бусласисса лу», – увкунни ванил.
Махъру лавхъунни МахIачкъала шагьрулул Депутатътурал мажлисрал хъунама Марис Илиясовлул, республикалул экономикалул министрнал маслихIатчи ХIажи ХIажиевлул, СВО-лул Аьрасатнал цалчинма Виричу НурмахIаммад ХIажимахIаммадовлул нину, 54-мур школалул директор Сапижат Мазаевал, Зунттал округрайсса Муфтиятрал вакил АьлиасхIаб Разакьовлул, Сайпуллагь-Кьади Башларовлул цIанийсса мизитрал имам МухIаммад Ссаламовлул. Вайннал цала ихтилатирттаву кIицI лавгунни щайх Жамалуттин чIявусса мазру кIулсса, аьраб, парс, татар мазурдицIун, сайки циняв дагъусттан мазру кIулсса, хъуннасса сий дусса ивкIшиву, шама имамнал, Шамиллул, Гъази-МахIаммадлул ва ХIамзат-баглул, насихIатчинугу ивкIшиву, ванал луттирал презентациягу хIакьинусса тарихраву агьамсса ишну хъанахъишиву.
Шаназарда тираж дусса лу презентациялийн бувкIцириннайх бачIлай бия. Бусан ливчIунни презентациялийн чIявусса агьлу бавтIун бивкIшиву. Ва иширавагу чIалай бушиву щайх Жамалуттиннул аьпалул хIурмат лахъну бушиву.
ПатIимат Рамазанова
