Декабрь зурул 12-нний шанна шин хьунни ххаллилсса лаккучу, хIакьсса патриот, жул ххирасса ва хIурмат бусса коллега, ГьунчIукьатIрал шяравасса Амин Аьбдуллаев жуяту личIи хьуну. Муния мукьах царагу кьини къархьухьунссар жу Амин дакIнин къаувтсса.
Ва увкIссия «Илчи» кказитрал редакциялийн 2003-ку шинал. ЖучIан учIаннингу ванал лахъисса ва авадансса захIматрал ххуллу бивтун бия, мудан зий ивкIун ия жаваблувсса къуллугъирттай. Дагъусттаннал шяраваллил хозяйствалул институтгу бувккуну, агрономнал даврия колхозрал председательнал къуллугърайн ияннин, шяраваллил хозяйствалун хас дурну дия цала оьрмулул чIяруми шинну. Ккаккан бувну бия цува лавайсса даражалул пишакар ва гьунар бусса каялувчи ушиву. Редакциялийн ва увкIуна къажагьилсса оьрмулуву, амма жагьилминнавунияр хъунмасса гъирагу, гьавасгу буну. Амин най уна ххира хьуна щала коллективран. Къаххира хьунссагу акъая. Ва ия адаминайнусса тIуллу дусса, дакI-аьмал хъинсса, дугърисса, чувшиврул ва чумартшиврул бутIа буллусса, цаманал чIарав ацIан, ка-кумаг бан анаварсса инсан. Цанма бувсса чIиви-хъунсса хъинбалагу, дурсса хIалугу дакIний дикIайва ва буслан икIайва. Колхозрал давурттай къутаннайсса чIумал мудан хъуручI итабакьайссия тIий, ччя-ччяни барчаллагьрай дакIнин утлан икIайва таний Дагнефтепродуктрал хъунаманал хъиривчуну ивкIсса ттула ниттиуссу Давуд. – ЧIявуссаннан итабакьайссия, амма мукун барчаллагьрайсса цама къаувкссар, – учайва ниттиуссилгу. Бувмур кIулшиву, дакIний бушиву – мугу инсаннал мяърипатрал лишан духьунссар.
Коллективравусса гьарнах цан лархьхьусса къулагъас дан хIарачат байва Аминнул. Настроение дакъанал настроение гьаз дайва, цIуцIинан дарув булайва. Цаманал буруккин лалавсун, шайсса кумаг бан хIарачат буллан икIайва. МаслихIатрайну ва цала микку-тиккусса дахIавурттайну. Аминнун къаххирая мюрш тIуллу дусса инсантал. Цувагу ляличIинува сахаватлувсса, ка тIиртIусса ия. Ккашилнал лякьагу, мякьнал кьакьаригу кIулсса ия. Царагу байрандалий редакциялул душру чIири-хъунсса къулагъас къадурну къабитайва. Оьрмулул угьарасса унугу, гьарзатрал тIин кIулссагу ия. Даркьу-къадаркьуну лархмунил хIакъираву дакIнихтуну замечание дайва. Жунгу къаччан къабикIайва, ганал дакI тIайлашиву кIулну.
ЧIярусса мероприятиярттал сиптачину ва сакиншинначину уккайва. Циняв тяхъа-таза буккан бансса шартIру дузал дайва. ХIакьинусса кьинигу жу дакIнин бутлайна бикIару коллективрал Кисловодск шагьрулийнсса аьрххи. Ва аьрххигу вакссава дакIний личIансса къахьунссия Амин къаивкIссания. Махъ-ихтилатрангу аьчухсса ия, ххуйну балайгу учайва.
Амин даврий акъахьурча, ванал лахъсса чIу къабаллалисса, тIааьн дакъасса паракьатшиву дикIайва жул зивулий. Жула цIанихсса строитель ва альпинист Зиябуттиннул хъамалу оьвкуну, ГьунчIукьатIув лавгсса чIумал, жул душру Аминнуя ва Аминнуя гъалгъа тIутIиний, «Дараччи» фондрал вакил ПатIимат МухIадовна махIатталну цIухлай бия : «Цукссава ххуйсса иякьай му зул Амин, зу мунал цIа зумату щяв къадирхьуннихха» тIий.
Амин подпискалул отделданий каялувшиву дуллалисса чIумал чIаланну гьаз хьуна кказитрал тираж. Ванан кIула миллатрал кказитрал агьамшиву ва чара бакъашиву инсантурал няравун духхан дан. ХIакьинусса кьинигу, подпискалулшиврий щийн-бунугу буккарча, Амин учIайссия, хъинсса инсан икIайва тIий, дакIнин утлан бикIай. Щил-бунугу жижара лавсун бувкIсса чIумал редакциялийн, ца ттигу ттул подписчик ухлавгун ур, тIий, пашман шайва Амин. Ци давриха зурчагу, уххаву-авчIаву къакIулну, цала бигарду лажин кIялану бартбигьайва. Амин ия цува авцIусса кIану чIюлу буллалисса, барачат кунасса инсан.
Ва ия дазу-зума дакъа цала миллат ххирасса, мунил авадансса тарих кIулсса ва муния пахрулийсса патриот.
Ия гьарица чулуха гьунар бусса, оьрмулул шиннах къаурувгун бюхъу-хъит бусса. ИчIаллил къайгъурдал, даврил хъуннасса хъар лархъун ушивруцIун, цала цIуллу-сагъшиврул тагьардануцIун (Амин чаннал ссуссукьуну ия) ванал итабавкьуна биялсса луттирдугу: «ГьунчIукьатIрал шяраваллил тарих», «ГьунчIукьатIрал тухумру», «Аьпалул лу»(ГьунчIукьатIрал шяравасса Буттал кIанттул цIанийсса Хъунмасса дяъвилул ветерантураясса), «Искатели истины» (зунттал цалчинсса энергетиктураясса), «Мухаммед Дандамаев. Ученый с мировым именем» (цала шяравучу, тарихрал элмурдал доктор, профессор МухIаммад Дандамаевлуясса). Ва хъунмасса ххазинар ГьунчIукьатIрал ялун нанисса никиран ванал кьабивтсса. Вай луттирдал кьадру-кьимат ялу-ялун бувчIлантIиссар жяматран. Чичайва Аминнул шеърирдугу. Цала шяраваллил жяматрангу ва акъа къабучIисса, ка къаччуччин къяцIа кунасса инсан ия. ДакIний бур, ччянира ГьунчIукьатIрал жяматрал машан ларсун диркIсса МахIачкъалаливсса ГьунчIукьатIрал колхозрал хIаят щиннив цалалуш дан ччан бивкIун, Амин, цала оь-ттаркIгу зия дурну, цукун лечлай, суд-диваннайх уклай ивкIссарив му жяматрал канища къадуккан. Ва чялишну гьуртту шайва шяраву дуллалисса цинярдагу мероприятиярттай. ЧIярусса ххаллилсса давурттал сиптачигу цува икIайва. Ия тIайлашиву ххирасса, цала принципру дусса ва цала мукъул заллушиву дан кIулсса инсан. Укунсса инсан шяраву ляхъаву жяматран хъунмасса бахтти хьушиврун ккалли бан бучIиссар. «Илчи» кказитрал тарихраву Аминнул цала цIа бусраврай кьариртссар. Жун ва мудангу дакIний икIантIиссар.
Андриана Аьбдуллаева
