Аьрасатнал Ттугълил кьини «Вершина вкуса» гастрономиялул фестивальданул лагрулий МахIачкъалалив Родопский бульварданий сакин бувну бия СВО-рай гьуртту хъанахъиминнал оьрчIансса ихIсандалул акция.

Фестиваль лакьлакьисса кьини «Сквер», «Хот-Дог № 1», «Чудо чуду» тIисса хьхьичIунсса рестораннал хасъсса аьралий операциялий гьуртту хъанахъиминнал оьрчIансса миллатрал дукра даврил мастер-классру бунни. Миннуй гьуртту хьунни 100-нниха ливчусса оьрчIру. Республикалул хьхьичIунсса цIигьуртурал дур­сса дукралул тIин ххал баврицIун, оьрчIру цивппагу гьуртту хьунни дукра давриву.
Мероприятие сакин дурну дия МахIачкъала шагьрулул администрациялул республикалул цаппарасса ведомстварттащал ва «Дагестан» РИА-лущал цачIуну.
«Дагестан» РИА-лул директор МахIаммад МахIаммадовлул кIицI лавгунни, фестиваль дансса пикрилия бусайхту, МахIачкъала шагьрулул бакIчинал дакIнийн бувтшиву хIакьинусса кьини хасъсса аьралий операциялий талатисса жула уссурваврал кулпатирттахгу къулагъас дуван аьркиншиву.
– Жунгу хIукму хьунни жула вирттаврал оьрчIан укунсса акция бан, вайннангу цуя-ца дагъусттанчув цала кулпатирттая ятну акъашиву асар хьуншиврул. ОьрчIал ца пиш 10 укунсса фестивальданул багьассар, – увкунни МахIаммад МахIаммадовлул.
Мероприятиелул программа хIадур дурну дия оьрчIаща куннащал кув кIул хьун, пишакартурал каялувшиндаралу дукрарду дуллан, бялахъан, ретро кабриолетрачIа ва «Великолепный век» сериалданул зумуну янна лархсса «Падишах» ресторандалул зузалтращал суратру рищун бюхъан­сса куццуй.
Му бакъассагу, МахIачкъала шагьрулул Культуралул управлениелул оьрчIал филармониялул хъамаллуран сакин дурну дия концерт. Ахирданий оьрчIан дуллуна хъамакъабитулунсса бахшишру, ххал дуруна мультфильм, бувккуна Расул ХIамзатовлул шеърирду.

Зулайхат Тахакьаевал