Гьарцагу дуккаврил шинал ахир выпускной классирттал оьрчIангу, вайннал нитти-буттангу дур, анжагъ шиннардий дуллай, лахьлай бивкIмунил хIасиллу дуллалисса чIун дакъассагу, нервардал системалул кьянкьашиврунсса, нитти-буттал ва оьрчIал дянивсса арардансса экзаменнал чIунгу. Шикку, маслихIат хIисаврайсса дикIу, дакIнин бутаву хIисаврайсса дикIу, ца-кIира калимагу дучIину лякъинссар тIиссару.
Экзаменнайн хIадур хъанахъисса чIумалсса асарду миксса чIявусса бикIайхха, цумунилсса бувантIиссарив къакIулну, бакI къагъ лавгун, оьрчIругу, нину-ппугу царагу дуван къахъанай личIай. Мунияту гьарцаннан, цалчинма-цалчин, паракьат хьун, цала цува кIунттил угьан аьркинссар. ХIарачат бикIан аьркинссар цана цува психолог хьунсса, цала цува паракьат увансса.
* * *
Экзаменнал хьхьичI яла агьамшиву думи шартIирдавух бур цила чIумуйсса шану лахъавугу, багьайкунсса дукра дукавугу. Цила чIумуй лавхъсса шануя кумаг шайссар лахьлай бивкIмур, кIулмур цила кIанайн зана шаврин, память, личIлулшиву цIу дуккаврин.
Ва ппурттувусса дуки-хIачIиялуву хаснура дикIан аьркинссар гьивхь, хIурунис, банан, балугъ, кураг ва цаймигу мюнпатсса сурсатру.
* * *
Экзаменнайн хIадур хъанай буруча куну, щалла чIунгу, гужгу ва иширан харж мабулларду. Лякъира чIун зунна ххирамуниха зунсса (спорт, творчество, сайр), куннал куннащалсса ихтилатирттансса, дустуращалсса хьунабакьавринсса. БакI бигьалаганмунихгу, аьчух букканмунихгу къулагъас дикIан аьркинссар экзаменну ххуйну дулуншиврул.
* * *
Экзаменну дуллалисса чIумал, нерварду паракьат дуван тIий, чIявуну шай ва ххуллий ишла бувайсса даруртту канакисса ишру. Хасъсса пишакартурал тIутIимунийн бувну, гай яла ххуймири, зарал бакъамири тIисса дарурттугума къабувкуну хъинну бур, цанчирчан, вайннул, дакI паракьат дуварчангу, ня зузаву, нярал даву яларай дувайсса дур, ххишалдаран шанугу бахчин буллай.
* * *
Экзаменну дуллалисса ппурттуву нитти-буттаща буван шайсса яла хъинмур зат – му, цивппагу паракьат хьуну, оьрчIругу паракьат бувавур, оьрчIал дакI давур.
* * *
ДакIний битира, ГИА оьрчIал оьрмулуву агьамшиву дусса мутта, шачIану бунугу, оьрмулул мяъна-мурад бакъашиву. Экзамен оьккину дулурчангу, дурагу къадулурчангу, мудангу цамур ххуллу-хха, буванмур, битанмур лякъинтIишиву.
ОьрчIащалсса ихтилатраву ишла мабувари, экзамен къадулурчан, хIухчуну, дояркану, хIаят дахьуну гьантIиссара тIисса журалийсса калимартту.
* * *
ДакIний битира, экзаменну хIакьину-гьунттий гьантIиссар, къуртал хьунтIиссар, оьрчIащалсса арардурив оьрмулухунссар. Пикри къабувну, сситтувух, хатIалий увкусса ца мукъулгу оьрмулухунсса щаву дувайссар.
* * *
Мудангу, хаснуварив экзаменнал чIумал, оьрчIан ккаккан буллали зува ганал гужирай, гьунарданий, бюхъулий дакI дарцIуну бушиву.
* * *
ОьрчIан кIулну бикIан аьркинссар цува нитти-буттан, кулпатравуминнан, ОГЭ-лул, ЕГЭ-лул хIасиллах къабурувгун, ххирану ушиву, кьиматрай ушиву.
* * *
Нитти-буттал вас-ццах оьрчIайнгу бияйссар. Мунияту, экзаменнал чIумалгу шарда дикIан аьркинссар паракьатсса, дакI цIимилийсса тагьар. ОьрчIан кIулну, бувчIлай ва щуркIал хъанай бикIан аьркинссар, иш цукун багьарчангу, шаппа цивппа мюхчанну бушиву, цала чIарав мудангу бацIантIишиву, дакIниймур бувчIинтIишиву. ИчIува экзаменная хъанахъисса ихтилатру къабикIан аьркинссар оьрчIавун нигь, ццах, нач, тахсир бушиву ва цаймигу къаххуйсса асарду бичлачисса.
* * *
ОьрчIащал буллан аьркинссар, агана экзамен дулун къахьурчан, ягу аьркинссаксса баллу ласун къахьурчан, му дулунсса кIилчинсса кьаст дуванссар, цамур колледжравун ягу вузравун ухханссара, гьашину къахьурчан, ялуннин ухханссара тIисса мяъна-мурадрайсса ихтилатру.
* * *
Ваналсса укунсса, таналсса тукунсса тIий, тачIав зулва оьрчIан цайми оьрчIру эбратран мабуцларду, цайминнаха лащан мабулларду. Ванийну, оьрчIал дакI гъагъан дуварчан, гъира лещан буварчан бакъа, цичIав ххуйсса къахьунтIиссар.
Зулами оьрчIаву лякъира ххуймур, хъинмур, цIа дуванмур. Ванийну оьрчIал дакI хьунтIиссар, гихунай ачинсса гъира-гьавас ххи хьунтIиссар.
ХIадур бувссар
Бадрижамал Аьлиевал
