ОьрчIру буруччаврил кьинилун хасну райондалул Магьирлугърал къатлуву хъинну лавайсса даражалий хьунни М. Дандамаевал цIанийсса Гъумучиял ОьрчIал магьирлугърал школалул шинал хIасиллу дуллалисса концерт. Хъинну яргсса ва авадансса программа хIадур дурну дия школалул тарбиячитурал ва педагогтурал оьрчIащал цачIуну.
Гъумучиял магьирлугърал школалул цIа райондалул агьалинан кIулссар ва бусравссар, царагу мероприятие къашайссар райондалий вайннал тарбиялувтал гьуртту бакъа. Републикалул лагрулийсса конкурсирттайгу гьар шинал бугьайссар хьхьичIунсса кIантту.
Школалий каялувшиву дуллай бур сентябрьданий «Земский работник культуры» программалул лагрулий зун бувкIсса жагьилсса ва цила даврих гъира бусса Залихха Акаева.
Мероприятиялул бусравсса хъамалну бия райондалул бакIчи Зураб Куччаев, идарарттал каялувчитал. Шиккува кIицI бан, школалий дуклакисса шиннардий цува цал Пионертурал къатлувун, яла ОьрчIал творчествалул къатлувун занай, магьирлугърая за бувчIусса, миллатрал магьирлугърал кьимат кIулсса Зураб Куччаевлул райондалул бакIчину авцIусса гьантрайва оьрчIал магьирлугърал школалул къатлул давугу къулагъасралун ларсуна.
Школа хъинну ялув бавцIуну хIадур хьуну бия концертрайн. Хъунма махъ къахьунссар, магьирлугърал усттартурал даражалуяр ссалчIав къаяларайсса программа дия учирча. Му тасттикь бантIиссар зал бувцIусса тамашачитуралгу. ТIиртIуна концерт лакрал гимну хьусса МухIуттин Чариновлул мукъурттийсса «Лакку кIану» балайлийну (хор хIадур дурну дия Султан ХIусмановлул). Балай гимну кьамул дурсса Шагьимардан Акниевлул макьандалийну бакъа, кIилчинмур вариантну хьусса Камалуттин КьурбанмахIаммадовлулмур макьандалийну тIий бия.
Концерт Аьрасатнал Халкьуннал цашиврул шинал лагрулий хъанай духьувкун, хъиривсса номер бия Ккавкказ миллатирттал къавтIавуртту цачIун дурсса. Муния махъ цалчинмур блок хас бувну бия хасъсса аьралий операциялул темалун. Шивун бухлай бия балайлул ва къавтIавурттал цачIусса композицияртту, балайрду, шеърирду ва инсценировкартту. Тамашачитал барчаллагьрай кьамул буллай бия цаннияр ца усттарсса номерду: лакрал аслийсса къавтIаву «Къиссу», оьрчIал щаллу дурсса чачаннал къавтIаву, душварал щаллу дурсса яруссаннал ва индиянал къавтIавуртту (индиянал къавтIаву республикалул конкурсрай лайкь хьуссар кIилчинмур кIанттун).
КъавтIавуртту хIадур дурну дия Аджана Мусаевал, Шахрезада Мудуновал ва Аьбдулжалил Сулаймановлул. Увкунни лакку мазрайсса ва оьрус мазрайсса балайрдугу (каялувчи Султан ХIусманов, Карин Мудунов). Хасъсса бутIа бия халкьуннал инструментирттай руцаврил: къумуз, дачIу, гармун ва личIину дачIучитурал (каялувчитал Амир Сулайманов, ХIасанхIусайн МахIаммадов). Ккаккан бувуна «Кьяца ва шанма гада» тIисса магьлувасса парча (театрал крожокрал каялувчи Жамила Карнаева). Къуртал дуруна концерт Шагьимардан Акниевлул «Абадул абад дяъви бухлаганнав» тIисса балайлул хорданийну (каялувчи Султан ХIусманов).
Гьарца номер хIисавравун лавсун, жюрилул бивщусса кьиматирттайн бувну, цалчинмур кIану бувгьунни Аджана Мусаевал, кIилчинмур кIану – Султан ХIусмановлул, шамилчинмур – Шахрезада Мудуновал, Аьбдулжалил Сулаймановлул ва Жамила Карнаевал. Вайннан райондалул бакIчинал чулуха буллунни дипломру ва арцуйнусса бахшишру. Барчаллагьрал чагъарду буллунни школалул методистътуран Зарема Рашкъуеван ва ПатIимат Парамазован, Султанат Чаматован (бисерданий щащаврил кружок), Лида Мусаеван (мусил гулавати щащаврил кружок ), Мариян Ханован (сурат дишаврил кружок).
Концертрал лагрулий клубрал жанахIраву дирхьуну дия оьрчIал канил давурттал ккаккия.
Ахирданий Зураб Куччаевлул, цинявппа педагогтал сахIналийн буккан бувну, гьарцаннахь бакIра-бакIрах барчаллагь увкуна оьрчIру магьирлугърах ччаву дуну тарбия баврил, вайннаву гьунарду итххяххан баврил ххуллий буллалисса захIматрахлу.
«Ххирасса дустал! ХIакьинусса ва яргсса мажлисрал жунма исват бунни гьунардал ва хIарачатрал инсантал цачIун байсса бушиву. Хъунмасса барчаллагь тIий ура магьирлугърал школалул щалвагу коллективрахь хъун хъанахъисса никирахсса аякьалухлу, буххаву дакъасса даврихлу. Зухь, оьрчIрув, учин ччива, хIайран буллалияра жу зула гьунардайну! ЧIа тIий ура зун хъуни-хъунисса хьхьичIуннайшивуртту. Зул тIайлабацIуртту райондалул хьхьичIуннайшивур, миллатрал пахрур», – увкуна ванал.
Чаннасса ва ххарисса асарду кьабивтунни оьрчIал гьунардал тамашалийн бувкIминнал дакIурдиву. ТIайлабацIу баннав оьрчIангу, вайннаву гьунарду аьч баврил ххуллий зий, захIмат буллалиминнангу.
Зулайхат Тахакьаева
