«Дагестан» РИА-лий хьунни Дагъусттаннал аьралий комиссар АьбдурахIман Мурадхановлул ссуттилсса призыврал хIакъиравусса брифинг.

Шикку гьуртту хьунни аьралий къуллугърайн хIадур баврил ва призыврал отделданул хъунама ХIусайн ОьмархIажиевгу. Аьралий комиссарнал кIицI лавгунни гьашинусса призыврал ляличIишиву: муницIун дархIусса мероприятияртту щаллусса шинай най диркIшиву, призывниктал сияхIрай бишаву ва миннащалсса дахIавугу цифровой форматрайсса диркIшиву. 2025-ку шиналсса Аьрасатнал президентнал хIукмулийн бувну, Дагъусттанная аьралуннаву къуллугъ бан буцин ккаккан бувну бур сайки 3 азаруннийн бивсса аьралитал. Призывралсса буллан сакин бувну бур 53 призыврал комиссия. Миннаву бур аьралитурал цIуллу-сагъшиврул тагьар ххал дуллалисса 500-нния ливчусса хIакинтал ва медициналул зузалт. Аьрасатнал законодательствалийн бувну, аьралуннаву къуллугъ бан чIун дирсса жагьилтураща утти бюхълай бур шинал лажиндарай бан медициналул комиссия. Ва цIушиннарайн бувну, призыврал пуктирдал данмур архIалну тапшур дан бюхълай бур, призывниктураща авара къавхьуну щаллу дан бюхълай бур аьралуннавун гьаннин дан аьркинмур. ЦIанасса чIумуйнин аьралуннавун буцин ккаккан бувминнал 50% бувцуну бур. Призыврал комиссиялул хIукму шинал лажиндарай зий бунугу, аьралуннавун тIайла буккаврил чIун даххана къархьуссар. ХьхьичIва кунма, жагьилтал тIайла буккайссар къуллугъ буллан шинай кIийлва: апрель зурул 1-нния июльданул 15-ннийн бияннин ва октябрь зурул 1-нния декабрьданул 31-ннийн бияннин. Даххана къархьуссар къуллугъ баврил чIунгу. Жагьилтал къуллугъ буллантIиссар хьхьичIва кунма ца шинай. Призыврал мероприятиярттугу дуллалиссар нукIура кунна аьралий сияхIрал Реестр ишла дурну. Реестр ишла дурну щаллу дурсса повестка гьан дуршиву чичайссар «Госуслуги» порталданийсса личный кабинетравун. Ва система къулайсса дур къуллугъ барил чIун махъун щун даврингу. Военкоматрайн къабувкIнува, 3 азарунния ливчусса жагьилтал цавай мурахас бувну бур аьралий къуллугърая, цавайннал чIун махъун дуртун дур. «Госуслугардайхчин» булун бюхълай бур аьралий сияхIрай ишинсса ягу укьансса аьрза. Реестр зий ца шинал лажиндарай 4 азарунния ливчусса мукунсса аьрзарду ххал бивгьуну бур. Ва системалия хъуннасса бигьашиву дур инсантуран.
Апрель-июль зурдардийсса призыврал хIасиллу дуллай, АьбдурахIман Мурадхановлул кIицI лавгунни призыврал чулуха хьхьичIун ливчусса аьралий комиссариатру. Миннувух ЦIуссалакрал районгу дур.
Октябрь-декабрь зурдардий аьралуннаву къуллугъ бан буцлан тIий бур 1996-2008-ку шиннардий бувсса жагьилтал. Агана жагьилнаща ци бунугу багьана-сававрттайн бувну, гьан уллалисса чIумал гьан къахьурча, га хъиривмур призыврай тIайла уккайссар. Призыврая мурахас буллалиссар хушрайсса формированиярттаву бивкIсса ва ряхва зуруяр ххишаласса чIумуй аьра­лий иширттаву гьуртту хьусса инсантал. Мукунма Донецкаллал ва Луганскаллал республикардай къуллугъ буллай бивкIми. Циняв призывниктал къуллугъ бан тIайла буккантIиссар Аьрасатнал аьрщарайсса соединениярттал дислокациялул пунктирдайн ва Ярагъуннил гужирдал аьралий частирдавун. Призыврай къуллугъ бан бувцусса аьра­литал хасъсса аьралий операциялийн къабуцайссар.
Призывниктурайн гьан дай­ссар электрон повесткартту. Ага­на ба­гьана бакъана кьува гьантлул дянив военкоматрайн къабучIарча, ми буцинсса чаран лякъинтIиссар. Аьралий коммиссарнал мукунма кIицI лавгунни къуллугъ бувсса аьралитал чIумуй итабакьинтIишиву шаппай.
Андриана Аьбдуллаева