Вай гьантрай Дагъусттаннал Х1укуматрай хьунни дунияллул халкьуннал дянивсса тагьарданул иширттацIун дархIуну Республикалул экономика кьянкьану лядуккан даву мурадрай сакин бувсса Оператив штабрал цалчинсса батIаву.

Заседаниялул даву дачин дурну ия ДР-лул ХIукуматрал Председатель Аьбдулмуслим Аьбдулмуслимов. Оператив штаб сакин баврил мурад бия Дагъусттаннал региондалул харж дуллалимунил ва доходирттал ялув бацIаву, билаятрай хIасул хьусса тагьарданиву агьалинан ка-кумаг баву мурадрайсса чаранну лякъаву.
Оператив штабрал агьаммур направлениягу аграрный секторданул даврия хъар хъанай дур. Мукунма, Оператив штабрал хьхьичI бивхьусса агьамсса мурадирттава­сса бия инсантурал зузи кIанттурду ябаву, информациялул технологияртту хьхьичIуннай даву, дянивмур ва чIиримур бизнесран ка-кумаг баву.
Заседаниялул даврий гьуртту хьунни республикалул министерствардал ва ведомствардал каялувчитал.
Аьбдулмуслим Аьбдулмуслимовлул хьхьичIва-хьхьичI кIицI лавгунни Дагъусттаннай продуктылул дефицит къадикIантIишиву. Дунияллул халкьуннал дянив­сса санкцияртту баян буллалисса ппурттуву Дагъусттаннал республика дуки-хIачIиялул дузал дан­сса каши-кьудратрай душиву. Жула республикалий чансса бакъашиву ахънилсса, ахъулсса ва дикIул продукция дучIан давриха зузи­сса инсантал.
Дукиялул луртанная буслай, ДР-лул шяраваллил хозяйствалул ва продовольствиялул министр Баттал Батталовлул кIицI лавгунни ишбажаранчитурал багьри гьаз бувну бушиву, хаснува ттучаннай. Нюжмардул мутталий кIилийну, шамлийну гьаз бунни дикIул, качарданул, ахънилссаннул багьри. Яттил дикI оптовый багьлуй 350-380 къурушрайн дирну дур, розницалий, 410-420 къурушрайн. ЦIана жула республикалий ахъулссаннул ва ахънилссаннул луртанну дур 1 -6 зуруйн дияннинсса. Нувщул дур 3 азарда тонна, 4,5 тонна къурул, 6 азарда тонна гьивчул, бур дачIи шинай биянсса ппиринж.
ЦIана пикрилий бур нувщи бугьансса аьрщи гьарзану итадакьин. Мунийн бувну, жула регион дузал баву бакъассагу, республикалул кьатIувгу нувщи баххансса даража ххишала хьунтIишиву кIицI лавгунни Баттал Батталовлул.
«ЧIунни республикалул муниципалитетирттан нувщул, накIлил, нисирал, нагьлил ва дикIул продукция лядуккан давриха зун. Садикру, школартту ва цаймигу социал идарартту хайр бусса продукциялул дузал буллан», – увкунни Аьбдулмуслим Аьбдулмуслимовлул.
Дагъусттаннал промышленностьрал ва машлул министр Низам Халиловлул бусаврийн бувну, цIанасса ппурттуву республикалул хъунисса машлул сетирдай ца зуруйсса продуктылул луртан дур. Ваналгу кIицI лавгунни вай сетирдай качарданул ва иникIмалул багьри гьаз бувну бушиву.
Дагъусттаннал властьрал каялувчитурайн тапшур бунни ттучаннайсса ва базардавусса багьрал ялув бацIаву. Багьри гьаз къабаву мурадрай, баян бунни цаппара ишбажаранчитурансса хIаллихшиннарду – кредитный каникуллу. Масалдаран, чIиримур ва дянивмур бизнесран кумагрансса процентру ба­къасса ссудартту, займру ва льготартту дусса кредитру ва цаймигу хIаллихшиннарду душиву.
ДР-лул цалчинма вице-премьер Руслан Аьлиевлул бувсунни ши­ккун багьлагьишиву республикалийсса 30 азара инсан зузи­сса 67 идара. Вайннал давурттугу аьркинсса ка-кумаграл щаллу дуллантIишиву.
Республикалул финансирттал министр Юнус Саадуевлул бусаврийн бувну, муниципалитетирттаягу тIалав буллай бур бюджет сант дуну харж баврил ялув бацIаву ва резервный фонд сакин даву.
Совещаниялул даврил хIасиллу дуллай, кIицI лавгунни социал выплатарттал хIакъираву хIасул хъанахъисса тамансса суаллу. Аьбдулмуслим Аьбдулмуслимовлул бувсунни выплатарттайн цукунчIавсса санкциярттал щавщи биян къабантIишиву, ялунгума АьФ-лул Президент Владимир Путиннул агьалинан кумагран­сса цIусса выплатартту дулунсса хIукму бувшиву.