Мартрал 4-нний ДР-лул премьер-министр Аьбдулмуслим Аьбдулмуслимовлул каялувшиврий хьусса ДР-лул Оператив штабрал батIаврий ххал диргьунни цIанасса ппурттувусса социал-экономикалул тагьар ва багьри баххана шаврицIунсса масъалартту.
ДР-лул шяраваллил хозяйствалул ва бакIлахъиялул министр Баттал Батталовлул бусаврийну, му идаралул зузалтрал нюжмардий цал, мартрал 1-нния шийнмай нюжмардий кIийлва ххал бигьлай бур республикалул базардаву дукиялул сурсатирттал багьри цукун ва циван баххана хъанай буссарив. Мунал тIимунийну, борщливун ишла дайсса ахънилссаннул багьри мартрал 2-нний укунсса бивкIун бур:
нувщи – 1 кило опталий 35-45 къуруш, розницалий 48-50 къуруш,
чIикIунтIа – опталий 33-35 къуруш, розницалий 45 къуруш,
къур – опталий 33-35 къуруш, розницалий 43-45 къуруш,
калан – опталий 40-42 къуруш, розницалий 55-58 къуруш,
чимус – опталий 14-17 къуруш, розницалий 28-30 къуруш.
Миннул буслай бур бакIлахъиялул заллухъруннал ахънилсса даххайсса душиву базардаву маша буллалиминнан розницалийнияр сайки 1,5-ла кьюркьуну.
Баттал Батталовлул бувсмунийн бувну, дикIул багьрал тагьар личIину даххана хъанай дакъар. Яттил дикI опталий дахлай бур 350-400 къурушран, розницалий 410-420 къурушран. Оьлил дикIул багьа бур опталий 350-370, розницалий 390-410 къурушран кило.
Министрнал кIицI бунни мукунма качар-писукIрал багьа чансса лахъ хьуну бушиву.
МунацIун авкьунни ДР-лул промышленностьрал ва машлул министр Низам Халиловгу. Мунал тIимунийну, заводрая итабакьайсса писукIрал багьа цIана бур 52-54 къуруш. Розницалий писукIрал багьа лахъ хьуну бур 5-10%. Шанма гьантлул дянив лахъ хьуну бур иникIмалул багьа. 1200 къурушран бивкIсса 50 килорал дарваг хьуну бур 1380 къурушран.
«Мартрал 1-нния махъ СМИ-лий чичлай бур ччатIул багьа лахъ хьунтIий бур тIий. Мунийн бувну, ДР-лул Минторграл масъала дузал бувссар цалва пекарнирду бусса, хъунисса машлул объектирдащал кьутIи дурну, муния махъ ччатIул багьа лахъ къавхьунни. Амма, агарда иникIма ттигу ххира хьурча, ччатIул багьагу лахъ хьун бюхъайссар», – кунни Низам Халиловлул.
Аьбдулмуслим Аьбдулмуслимовлул тапшур бунни мартрал 20 -нния махъ дузал дуван ярмукIартту Дагъусттаннал циняв муниципалитетирттай. Микку ккаккан бунни бакIлахъия дахлан розницалияр ялавайсса багьрах.
