Хъаннил байрандалул кьини ДР-лул захIматрал ва социал хьхьичIунмайшиврул министр АьвдурахIман МахIмудовлул барча бунни ахIвал-хIал кIюласса, чIявусса оьрчIру бусса ва тарбия бан оьрчIру бувцусса ниттихъул.

Мартрал байрандалущал барча бувсса, Каспийскалий ялапар хъанахъисса, Написат Аьбдуллаевал тарбия буллалисса мяйва оьрчIава шанма бур детдомрава бувцусса.
Написат буслай бур, оьрчIру цинма цавагу личIи бакъа ххирасса бушиву ва цукунчIав кувнная кув личIи къабайшиву. Ванил цила тарбия бан шанма оьрч1 буцавугу пахрулун дурсса даврин ккалли дуллай бакъар.
«ОьрчIру цумур-цагу хъамитайпалул талихIрал бакI­щаращину хъанахъишиву аьчухсса зат бур. Ттула мяйвагу оьрчIава ца оьрчI бакъасса кьини ттунна тачIав нясив къахьуннав тIий лабизлан бикIара хъунасса Заннайн. Хъаннил байрандалул кьини цинявппагу ниттихъан, душвавран ва ссурвавран чIа тIий бура цIакьсса цIуллушиву, дунияллий дакьаву, талихI-тирхханну».
АьвдурахIман МахIмудовлул дуллунни вайннал кулпатран бахшишру дусса ч1апри ва тIутIал кацIру. ЦIухху-бусу бунни социал къуллугъирттал чулуха кулпат цуксса дузалну ва аякьалий буссарив.
Шиккува кIицI лаган, ДР-лул КЦСОН-дал чялишсса давуртту дачин дурну бур ахIвал кIюласса, захIматсса тагьарданувун багьсса кулпатирттан кумаг баву мурадрай. ХIакьинусса кьини ДР-лул ЗахIматрал министерствалул социал къуллугъирттал зузалтрал аякьалийн лавсун ур захIматсса тагьарданувун агьсса 146 азара инсан.
Ва кьини мукунма барча бунни, бахшишру ва тIутIал кацIру буллунни ацIва оьрчI тарбия буллалисса Цибац Расулован, шанма оьрчI тарбия бан був­цусса Назлуханум Меликован, арулва оьрчI тарбия буллалисса Муъминат Гуденкан ва ацIва оьрчIал нину Оксана ЯхIияеван.
Цахара дурсса аякьа асар хьу­сса ниттихъал дакIнийхтунусса барчаллагь увкунни ЗахIматрал министерствалул каялувчитурахь.