Профессор АхIмад Хасаевлул 90 шинал юбилейран хасну
Вай гьантрай 90 шин хьунтIиссия республикалул яла хьхьичIунми хIакинтураву ца ххуттайсса профессорнан, аьлимчувнан ва преподавательнан, дакI мяш хьунсса бюхъулул ва гьунарданул заллу, Щайхлул арс АхIмад Хасаевлун.
Ва дунияллия лавгун махъгу гьар шинах дувай ванан хас дурсса республикалул лагрулийсса элмийсса конференцияртту – «Хасаевские чтения». Дунни гьашинугу декабрь зурул 26-нний, А.В. Вишневскийл цIанийсса Республикалул клиникалул азарханалий, 1-мур госпиталь терапиялул кафедралий. Ванил сиптачиталну бур аьлимчув цува сайки оьрмулухун зий ивкIсса Дагъусттаннал паччах1лугърал медициналул университет, ЦIуллу-сагъшиву дуруччаврил министерство ва Дагъусттаннал Терапевтътурал элмийсса ккуран. Сакиншинначитурал комитетравугу бур ДГМУ-лул ректор, профессор Висампаша Ханалиев, Дагъусттаннал терапевтътурал элмийсса ккурандалул каялувчи, профессор Сулайман Маммаев ва ДГМУ-лул проректор Наида Маллаева, медициналул элмурдал кандидат, доцент Сажид Загълиев ва медициналул элмурдал кандидат, кафедралул ассистент Эльвира Касаева.
Конференциялул программалий докладру бунни аьлимтурал-преподавательтурал. Балжину бувсунни АхIмад Хасаевлул оьрмулул ва даврил ххуллия.
Симандалий нур дирзнасса профессор АхIмад Хасаев халкьуннал дянив хIурмат бусса, дакI марцIну зузисса ия, архIал зий бивкIсса уртакьтурал, хIакинтурал, къашайшалтрал, хъин хьуминнал ва ганал оьрмулул ххуллий хьунаавкьусса гьарнал дакIурдиву абадлий личIантIиссар ванал цIа, тIисса бия гьануми ихтилатру.
Ва конференциялул хъунмур хъар цайнна ларсъсса Сулайман Маммаевлул бувсуна АхIмад Хасаев хIакьсса хIакин, аякьалийсса насихIатчи, бюхъу ххисса каялувчи ивкIшиву.
– Аьпалухьхьун лавгсса ттул буттал, Нураттин Маммаевлул, ца яла хьхьичIунсса дусну икIайва АхIмад Щайхович Хасаев, мунийн бувну, нагу мунайн «буттауссу АхIмад» бакъа къаучайссия. Мунал чулийнмайсса хIурмат ттуву хъиннува ххишала хьуна яла: нава Дагмедакадемиялул студент хьусса чIумалгу, 1-мур госпиталь терапиялул кафедралий цачIу зун бивкIсса ппурттувугу. Жун, студентътуран, мунаву най дунура хIисав хьуна хIакьсса хIакиннал хасият, къашавайминнахсса ляличIиссава ургъил ва цIими. Му хасиятрал биялсса бутIагу мунаву хIасул хьун бувну бухьунссия Хасаевлул тарбиячи ва насихIатчи, Дагъусттаннал терапиялул патриарх Хайруттин Эфендиевич ХIажиевлул. Иш так ца тарбиялувугу бакъахьунссарча, бухьунссар, цалчинма-цалчин, инсан цува гиччава най унува мяърипатрал ва ас-намусрал увччусса ушивруву. Муния махъ, Москавливсса дуккавугу дурну, зана хьуну мукьах, профессор АхIмад Хасаевлул на увцунав госпитальный терапиялул кафедралийн – цал доцентну, яла профессорну. Микку ацIра шинал мутталий Хасаев уссия ттул насихIатчину – медициналулгу, педагогикалулгу, оьрмулулгу, ттун ваная лавхьхьуна къашайшалащал ихтилат бан, кардиологиялул личIи-личIисса захIматсса патологиялул тагьар дурчIин. Хаснура кIицI лаган ччива Хасаевлул лекциярду ккалаккаврил усттаршиву – буккайва, махъру ца-ца багьан бувну, дакIний личIанну. Оьрмулул ххуллу-ххуттаву тIурча – аькьилсса занакьулушин, аьчухшиву, цинявннащалсса хIал бакьаву, тямадашиврул гьунар, – куна, цала лавхъсса мукъуву Сулайман Маммаевлул.
Ванал увкумуницIун ххи буванна: АхIмад Хасаев гьарцагу чулуха чантI увкусса, ххуйну Дагъусттаннал тарих, литература, культура кIулсса ия, хIакьсса интеллигентгу, язисса зунтталчувгу ия.
ПатIимат Рамазанова
