Оьрму ккавксса, кIулсса инсантурах вичIи дишин та-бухьурчагу гъира бикIай. Мукунма Каспийск шагьрулул хьхьирицIсса паркравун заназисса лакку хъаннихгу. ЦIусса шинал хьхьичI гьантрай вайннащалсса хьунабакьаврий хьунни Лакку ккурчIайн, «Илчи» кказитрайн, ЦIушинайн багьайсса ихтилатру.
Оьрму, чIун най, оьрчIругу цалва-цалва кюрттай щябивтун, ичIаллил къайгъурдугу чан хьуну, тархъансса чIунгу ххи хьусса хъами цачIун хьуну, Каспийск шагьрулий «Лакку ккурчIа» сакин бувссар ванияр мадарасса шиннардил хьхьичI. Сайки гьарца кьини цIан-чаннаву хьхьиричIан паркравунгу буклай, бивкIу-буккулийгу, ххари-хъиншивурттайгу цачIу, цIакьсса дусшиву дачин дурну буссар жула хъами. Махъ, вайнная эбрат ларсун, цайми миллатирттал хъамигу укунма батIлан бивкIссар. Вай хъаннил ккуран, личIи-личIисса багьанттайн бувну, хьхьичIранияр диялну ххялтIа дурккун дур, кув хъами аьпалухьхьун лавгун, кув – кьатIу-шав буккан бюхълай бакъану, кув – ва шагьрулия цайми кIанттурдайн бивзун.
ХIакьинусса кьини паркравун хьхьирицIун гьарца кIюрххил буккайссар: ГьунчIукьатIрал шяравасса Аьйша Штанчаева ва Сабират ТIагьирова, Уручуллал шяравасса Гумсият ХIажиева, КIувратусса Гулжагьан Гьарунова, СумбатIлиясса Зоя ХIажиева. Вай бур Хъун дяъви байбишиннин хьхьичI ва байбивхьуну махъ бувсса, дяъвилул захIматсса шиннардийн оьрчIшиву тIайла дарцIусса, ци-цигу бувхIусса, амма лакъавхIусса хъами.
Барчаллагьрай буру
– Жу паркравусса чIумал жухь аьла-ссалам буллай бикIай чIявусса инсантал, вайннавух – Хъусращиял шяравасса Жабир Абакаровгу. Ваналмур ссалам булаву ляличIийссара дикIай, жул, бугьарасса хъаннил, хIурмат хъунмасса бур ваначIа. Жабирдул жу цимилагу бувцуссару ресторандалувун, дурссар жун хъин-хъинсса бахшишру. Укунсса зат хъамакъабитайссар, – тIий бур вай.
Вай «Илчи» кказитрал ччяния шийнмайвасса буккултгу бур.
– Ттун «Илчи» кказит най бунава ххира хьуссия. Ттула уссу, аьпа биву, Амин Аьбдуллаев тикку зун ивкIукуннив – хъиннува, – буслай бур кказит-журналлу бахлахисса киоскрай чIярусса шиннардий зий бивкIсса, «Илчи» кказит машгьур бавриву, буккултрачIан биян бавриву къачIивисса захIмат бивхьусса Сабират. – ДакIнийхтунусса барчаллагьрай бура ттунна «Илчи» кказитрал ва лакку мазрайсса журналлал щаллусса шинайнсса подписка дурсса Ккуллал шяравасса Алексей ХIажиевлуйн. Ттун укуннагу «Илчи» кказитрал шинайсса подписка дурссия Маммаева Динара Сиражуттиннул душнил. На вай кказит-журналлу ттущала паркравусса хъаннийхгу бачIара. Куннал куннахьхьун буллай, бусраврай буккару, – тIий бур Сабират.
Шикку Зоя мукIру хьунни цищава лакку мазрай буккин ххуйну къашайшиву, Лакку ккурчIай кказит буккин къакIулминнангу, къашайминнангу Сабиратлул буккайшиву.
«Илчи» кказитрай ккалан яла ци ххирар, ххишалану щия ва ссая чивчуну ччива тIисса суалданухьхьун вай тIий бур:
– Жу кказит канил бугьайхтува бургару жижарарду бумур лажиндарах, цанна итадаркьусса чIун къуртал хьуну, аьпалувух бивхьуминная чивчумуних. Хъирив ххал дувару жула лакрацIун дархIуми макьалартту. Гъирарай дуккару маслихIатру ва лакрал учаларду бумур лажин. Ххишалану чичлай ччива зунттал захIматчитурая, жулла-жулла шяраваллал инсантурая, – тIий бур вай.
Ттисса жагьилтурая
ЦIанасса жагьилтурая ихтилат багьувкун, «Лакку ккурчIай» укун тIий бур: – Жулва бур ххуйсса, хIакъачIлачIисса, диндалухун багьсса жагьилтал. Бур чIумуха лавхьхьуну анаварсса, най дунара гьарца зат щаллу хьуну ччиссагу, хаснува душру. ХьхьичIва ниттихъал, душру щар буллалийни, бувчIин бувайссия ласкъатта бухIан, буруччин къабигьашиву, му канихьсса кIири бувсса къяцIлуха лащан буллай. Ниттихъул бикIайссия душваврахь яхI буван аьркинссар, ласнал лавай бацIан, ласналминнал хIурмат буван аьркинссар тIий. Утти бур цал душ яхI буллан, ва-та бухIлан щар къубуллуссар тIиссагума. Муниятур цIана чIявусса кулпатру лиллалиссагу. Ччива жагьилтал хьхьичIва кунма тарбия буллай, хъуниминнал хIурмат буну, душру – ласкъатлуву ссавур дуну, яхI бувну, жула зунттал душваврал тIул-тIабиаьтран лавхьхьуну къуццу тIий, цалва къатта цалва буручлай.
ЦIусса шинал байрандалия
Ялун нанисса ЦIусса шинал байрандалия тIий, вай буслай бур ва байрандалух Совет заманнай цивппа ссавур дакъа ялугьлай бикIайссияв, ЦIусса шинащал цалва оьрмулувун цимурца цIусса духхансса кунма чIалай бикIайва тIий. ДакIнийн дичлай бур ЦIусса шинал байрандалийн дуллай бивкIсса концертру, чагъардания пирпиллу, цайми-цаймигу куцру кьукьлай, елкалий лачIунсса игрушкарду дуллай бивкIсса чIунну.
– Хъунмасса къахьурчангу, чIивисса елкагу бишайссия, лагма лавгун, оьрчIи-чIюлу бувайссия. ЧIюлу бувсса елка лакку щаххулттуха лавхьхьуну чIалай бикIайва. Ва байрангу дикIайва уссур-ссу, чIахху-чIарахми циняв цачIун батIинсса, лагма лагансса ца ххишаласса сававну. Жу цIанагу мюрщи оьрчIру кунма ялугьлан бикIару цIушинал байрандалух.
Я Аллагь, ялунсса шинал дуниял паракьат хьуннав, дяъвилул чIу бухлаганнав. Жагьилтал цалва кулпатирттавун зана бивкIун, нину-ппу ххари буваннав. Вари жулва щалвавагу мурад цIусса шинацIун бахIлахIисса, – тIий бур вай.
Бадрижамал Аьлиева
