НухI АхIмадовлул аьпалул ула тIиртIунни

Вай гьантрай Каспийскалий хьунни личIи-личIисса давур­ттай зий, шагьрулул иширттаву хъунмасса захIмат бивхьусса, чIярусса шиннардий Каспийскаллал администрациялул бакIчинал хъиривчуну ивкIсса ххаллилсса лаккучу НухI АхIмадовлул аьпалун ула тIитIлатIисса мажлис. Шикку гьуртту хьунни Каспийскаллал администрациялул, личIи-личIисса ведомстварттал ва организациярттал вакилтал.

НухI ХIажиевич дакIнин утлатисса, ванал захIматран лавайсса кьимат бишлаши­сса ихтилатру бувна хьхьичIва Каспийскаллал администрациялул бакIчину бивкIсса Хури Пирсаидовал, Каспийскаллал администрациялул бакIчинал хъиривчу ХIусайн Ункиловлул, Каспийскаллал Депутатътурал мажлисрал председатель Аза Аьлиевал, Дагъусттаннал Культуралул зузалтрал профсоюзрал хъунмур, философиялул элмурдал доктор Марзижат Буттаевал, НухIлул душнил, «Золотой ключик» тIисса оьрчIал багърал хъунмур  Муслимат Султановал.
Ихтилатру къуртал хьуну махъ шадлугърал даражалий тIиртIуна  ула. Къуллугъчинал аьпалун минутрайсса пахъ багьавугу дурну, дирхьуна тIутIив.
АхIмадов НухI ХIажинал арс увну ур 1949-ку шинал ноябрь зурул 7-нний ЦIущардал шяраву. 1967-ку шинал Каспийскаллал 3-мур школагу къуртал бувну, Ленинградуллал Кораблестроительный институтрал Каспийскалийсса филиалданувун увххун ур.
Ца шинава, хьхьурайсса отделениялийн переводгу ларсун, зун ивкIун ур «Дагдизель» заводрай. Зий ивкIун ур, фрезеровщикная айивхьуну, 8-мур цехрал хъунаманайн ияннин. 1982-ку шинал хьуну ур Каспийскаллал Горисполкомрал комбинатрал хъунама. 1988-ку шинал ивтун ур  ЖКХ-лул производствалул объединениялул  хъунама инженерну. Ца-кIира шинава – Каспийскаллал Халкьуннал депутатътурал шагьрулул советрал исполкомрал председательнал хъиривчуну.
1990-2020-ку шиннардий НухI ХIажиевич ивкIун ур Каспийскаллал администрациялул хъунаманал хъиривчуну.
2000-ку шинал ванан дуллуну дур Ккуллал райондалул «ХIурматлувсса гражданин» тIисса цIа, лахъан увну ур ХIурматрал луттирайнгу.
ЛичIи-личIисса жаваблувсса къуллугъирттай зий бивхьусса захIматрахлу ва лайкь хьуну ур паччахIлугърал наградарттан: Дагъусттаннал Госсоветрал ХIурматрал грамоталун, Аьрасатнал флотран 300 шин шаврил медальданун. НухI ХIажиевич ур Аьрасатнал ЖКХ-лул ва Дагъусттаннал Социал сфералул лайкь хьусса зузала.
Андриана Аьбдуллаева