Октябрьданул 21-нний кIицI лагайсса Дагъусттаннал халкьу­ннал культуралул ва ниттил мазурдил кьини барча дуллай, республикалул бакIчи Федор Щукиннул кIицI лавгуна 37 оьрчIал багъраву ниттил мазру лахьхьин буллалисса пилотный проект бартдигьавриха зий байбивхьушиву.

Бувсунни ванал Дагъусттаннал халкьуннал мазурдийн текстру таржума буллалисса бот хIасул дуршиву ва хIадур бувсса призведенияртту «Яндекс» компаниялул «Переводчик» сервисрал ишла буллантIишиву. Гьаннайсса, республикалул бакIчинал даражалий гьаз бунни ниттил мазру лахьхьаврил ххуллийсса чаранну хьун аьркинсса агьамсса масъала.
Октябрьданул 26-нний тIурчарив, ХIукуматрал заседаниялий ххал диргьунни 2026 шиналсса паччахIлугърал аттестациялул хIасиллу. КIулшиву дулаврил ва элмулул министр (врио) ЯхIия Бучаевлул кIицI лавгунни, гьашинусса выпускниктурахь диркIшиву ниттил мазрал ва литературалул ГИА дулунсса ихтияр, амма ОГЭ-рдай гьуртту хъанахъими вай предметру язи дугьан хьхьичIунмай хъанай бакъашиву.

Премьер-министр МахIаммад Рамазановлул тапшур бунни ми экзаменнну дулун къаччишиврул сававртту кIул дуван. Му бакъассагу, ванал кIицI лавгунни дуклаки оьрчIаву ниттил мазру лахьлансса гъира гьаз буваншиврул, хасну ми дарсирдах къулагъас хъун дувансса школарду ккаккан буван. Яни «опорнайсса школардал сеть» хIасул дуван.
«Цаппара муниципалитетирттай хасну ниттил мазрурдил дарсирдах бунияласса къулагъас дикIансса школарду личIи буван­сса чаран ккаккан багьлай бур, ниттил мазру лахьхьин баврил методикалул хьхьичIунми кьйдардая буслан, вебинарду дуллан, тIивтIу дарсру дихьлан, му чулинмайсса опытрая мюнпат ласлан», – увкунни ванал. Гьаннайсса, республикалул хъуниминнал даражалий вай масъалартту гьаз баврил, ххуйчулийннайсса дахханашивуртту хъанай дайдишингу бюхъайхха тIисса вихшала рутлай дур жувунна.

ПатIимат Рамазанова