Февральданул 21-нний кIицI лагайсса Ниттил мазрал кьинилун хасъсса «Лакку маз миллатрал рухIри» тIисса цIанилусса шадлугъ хьунни Гъумучиял оьрчIал библиотекалий.

Халкьуннал мазгу аьрщир
Бувгьумур гьанна шайсса…
Ю. Хаппалаев

Библиотекалул хъунмур Зарема Исяевал ва хъунмур библиограф Сувар Дибировал хIадур бувну бия миллатрал культура, багьу-бизу чIалачIи буллалисса мурцIу ва лакрал шаэртурал ва чичултрал луттирдал выставка.
Ниттил мазрал кьинилун хас дурсса шадлугърал сиптачигу, ва дачин дурмургу бия ЦБС-рал директор Мариян Аьшаева. Ванил бувсуна ва Кьинилул тарихрая, 2000-ку шиная байбивхьуну кIицI лаглагисса ва байрандалух чIяву миллатру бусса, культура авадансса жулла республикалий дусса личIиссара къулагъасрая. КIицI лавгуна ниттил мазурдил, литературалул учительтуран, лингвистътуран, чичултран, библиотекартуран, филологиялул факультетирттай дарсру дихьлахьисса преподавательтуран ва студентътуран ва ялунссаннун пишакаршиврул байрангу хъанахъишиву.

Махъру лавхъуна Лакрал райондалул Культуралул, спортрал, туризмалул ва ЦБС-рал управлениялул директор Ансар Къажлаевлул, Культуралул Центрданул художествалул каялувчи АьлихIажи Щамхаловлул ва вава идаралул зузала Нажвадин Халиловлул. Вайннал ихтилатру бия ниттил маз кIулну бикIаврил агьамшивриясса. Вава мяъна-мурадрайсса бия ва кьини шикку хьусса цинявппагу ихтилатру.

Гъумучиял дянивмур даражалул школалул дуклаки душру Алина МахIаммадовал, Мариян Аьлишаевал, Амина ЧIаматIовал, Залму Кьурбановал, Амина Аьшаевал, Амина ва Наргиз Ибрагьимовахъал дурккуна ватандалухасса, ниттил мазрахасса назмурду.

Лахълахъисса мукъурттил лях-карах балайрду увкуна Нажвадин Халиловлул, АьлихIажи Щамхаловлул, Мариян Жамалуттиновал ва Гъумучиял М. Дандамаевал цIанийсса искусствардал школалул тарбиялув Милана Аьбдуллаевал.

Шиккува кIицI лаган, культуралул акциярдал «Родная речь» тIисса цIанилусса Республикалул флешмобравухгу гьуртту хьунни Гъумучиял оьрчIал библиотека.

Бадрижамал Аьлиева