Февральданул 21-нний щаллагу дуниялий кIицI лагай Ниттил мазрал кьини. Ва кьинилун хас дурсса ххаллилсса байран хьунни Расул ХIамзатовлул цIанийсса Национал библиотекалуву.
Шикку гьуртту хьунни Дагъусттаннал халкьуннал шаэр СабихIат МахIаммадова, ДР-лул Миллатрал политикалул ва диндалул иширттал министерствалул отделданул хъунмур Хасайбат Валиева, ХI. ЦIадассал цIанийсса Мазрал, литературалул ва искусствалул институтрал фольклорданул отделданул хъунама АгъарахIим Султанмурадов, филологиялул элмурдал доктор МахIаммад МахIаммадов, Лакку мазрал дарсирдал учительтурал ассоциациялул хъунмур ПатIимат Аьлиева, Дагъусттаннал паччахIлугърал университетрал преподаватель Людмила Буркова ва шикку дуклакисса Китайнава, ХIабашнава, Алжирнава, Ливиянава ва цаймигу билаятирттаясса студентътал.
Дайдихьулий ихтилат бувна байрандалул сиптачи, Национал библиотекалул директорнал хъиривмур Сарат Жабраиловал.
– ХIакьину жура кIицI лаглагисса кьини хъанахъиссар мазрал ва литературалул учительтурал, аьлимтурал, библиотекалул, миллатрал прессалул зузалтрал, маз ябаврил цIаний захIмат бихьлахьисса цинявппагу патриотътурал байранну. Жунма чIалай бур цIанасса ппурттуву ниттил маз ябаву мюрщи миллатирттал яла агьаммур масъалану бушиву. Гьарицагу миллат ххирасса, му яхьуну ччисса инсаннал хIарачат буллан аьркинссар цала мазгу, миллатрал культура ва аьдат-эбадатругу ядан, – увкунни ванил.
Гьай-гьай, маз буруччавриву нитти-бутталгу, учительтуралгу бияла хъунмассар. Махъсса шиннардий республикалий лахъа-хъунну кIицI лаглай дур Ниттил мазрал кьинилул байран. Лакку маз лахьхьияра, ябувара тIий, мазран хас дурсса байранну дуллай, мунийну къалахьхьайссар. Маз гьарцагу инсаннал цала аькьлу-кIулшилун, дакIнин лахьхьин ччай бикIан аьркинссар. ХIакьину маз ябан аьркинссар хьхьичIва-хьхьичI жула дакIнил.
Ва кьинисса мажлисрай гьуртту хьуминнал ниттил маз ябаву, буруччаву мурадрай леххаву тIутIисса, асар хьунсса ихтилатру бунни. Хъирив дуклаки оьрчIал дурккунни лакку мазрайсса назмурду, увкунни балайрду. Цала-цала мазурдийсса назмурду дурккунни чил билаятирттаясса студентътуралгу.
Имара Саидова
