Декабрьданул 22-нний лакрал культуралул кюрттаран ккаллисса «Инт» кафелуву хьунни миллатрал бучIантIимунил буруккинттарайсса ва му ххуллий шаймур буллалисса «Ниттил маз» тIисса ккурандалул вакилтурал хьунабакьаву.
«Ниттил маз» ккуран хIасул дурну дур Гьущатусса Пазруллагьлул арс ХIасанов КьурбанмахIаммадлул. Ккурандалувун бухлай бур 100-нния ливчусса вакилтал. Ниттил маз ххирасса ва му ябуван къисттасса инсанталгу лагма лаган бувну, ванал мазрацIун бавхIусса масъалартту ххал бигьлансса, лахьхьин ччинан лакку маз лахьлансса, кIулминналгу кIулшивуртту куртI дуллансса ккуран хIасул дурну дур. Ва ккурандалул гьурттучиталгу щалва Дагъусттаннайгу, цайми регионнайгу яхъанахъисса бур. Интернетрал каши ишла дурну, дахIавугу дур.
БатIаврий ихтилатру хьунни лакку маз буруччавриясса, хъамабитан къабитавриясса, гьарца лаккучунал ца язимур ххазина – лакку маз ябаву ва магьир буллалаву хъунмур буржну хъанахъавриясса.
Руслан Къардашов
