Вай гьантрай бувну бур Лакрал райондалийсса Хъуннащиял шяравасса ххаллилсса хъамитайпа, хъинсса нину Сиясат Аьшуева. Цинявппагу оьрчIру лагма лавгун, лахъа-хъунну кIицI дунни аьзизсса ниттил оьрмулул юбилей. Цила бивхьусса захIматрал кьадру-кьимат кIулсса оьрчIру тарбия бан бюхъаву – муниву бухьунссар ниттил талихI. Му духьунссар ниттихъал тирханну.

Сиясат бур ххаллилсса тухумрал, жяматран бусравсса нитти-буттал Тажуттиннул ва Аьйшатлул мукьва душнива хъунма-хъунмур. Гьарица чулуха итххявхсса, дуккавриву ва давриву хьхьичIунсса, дан-дитан кIулсса, цIу-цIампир бусса душ бивкIун бур ва гиччава най буна. Школалий марцIну ххювардай дуклакисса Сиясатлул сурат мудан хIурматрал улттуйн лархъун дикIайсса диркIун дур. Ва школалий дуклакисса шиннардий ивкIуну ур Совет Союзрал генералиссимус И.В.Сталин. ХьхьичIунсса ученица хIисаврай ванийн вихшала дурну дур школалул линейкалий пашмансса телеграмма дуккин. Душнивусса дуккаврил гьунар чIалай таний Хъурхъиял школалул директорну зузисса вайннал гъанчу ЖахIпара Хизиев ивкIун ур Сиясатлухь, школа къуртал бувну махъ, гихунмайгу дуклан аьркинссар, на кумаг банна буххан тIий. Битайссияв мукун ябацIансса душ, оьрмулул 19 шинаву щар хьуну бур. Куннил хъирив кув оьрчIругу хьуну, дуккинсса хиялгу щаллу къавхьуну ливчIун бур. Амма Сиясатлуща цила бюхъу-гьунар цамур ххуллий ккаккан бан бювхъуну бур.
Ларайсса кIулшивуртту къаласурчагу, вания ххаллилсса тарбиячи хьуну бур. Цила ласнащал Аьбдуллагьлущал дуккингу бувну, тIайласса оьрмулул ххуллийн бичин бювхъуну бур ххювагу оьрчI. Вайнная яхI-къирият дусса, мяърипатрал бувччусса, жяматраву сий дусса оьрчIру хьуну бур. Шиккува бусан, ва чIявучин ххуйну кIулсса медициналул элмурдал доктор, профессор Жаруллагь Аьшуевлул нинур. Къатлул бакI дургьусса Аьбдуллагьлуллив Сиясат цанна дирирсса лайлатул кьадрилун ккалли бай.
Мяйжаннугу, Сиясатлуя ванан дакI тIайласса оьрмулул дусгу, чул бищай кIанугу хьуну бур. Сайки 70-ннийн диявайсса шинну дур вайннал цачIу нахIу-хIалимну, цаннан ца бувчIлай оьрму бутлай. ЦIакьсса кулпатрал гьану бизан хъунмасса бияла хъамитайпалухь буссар. Шиккугу ккаккан дурну дур Сиясатлул цила усттаршиву. Бивзун бур цIакьсса, эбратрансса кулпатрал гьану.
Сиясатлун хас бувну, укунсса ххару чивчуну бур Ххадижат ЦIаххаевал:

Цинцилттай бивхьуну
буцин къахьунссар
Ниттихъал оьрчIаха
бувайсса захIмат,
Лахъисса шаттирдай
буккин къахьунссар
ОьрчIру хъуни буллай
битайсса манзил.

Буллу оьрмулухлу
барчаллагь, дадай,
Цалчинсса шаттирдах
барчаллагь, бавай,
Жул цIаний ина
був буруккинттахлу
Ттуршвагу барчаллагь,
жул аьзиз нинуй!

ДакIнийхтуну барчагу буллай, жугу чIа тIий буру Сиясатлун цIуллушиву, ххари-хъиншивуртту, гьарица ишираву тIайлабацIу. ОьрчIалгу, оьрчIал оьрчIалгу хъихъи бивтун, оьрмулул буччиннин битаннав.