КIунурдая – сурат, чIурдая – балай. Вай гьунардал заллу, Дагъусттаннал халкьуннал артистка, ДР-лул иску­сствардал лайкь хьусса иш­ккакку Жанна Кьурбановал, цилла творчествалувусса вай кIирагу искусство, кIивагу чул цачIун бувну, «Накьичирттайнусса балай» («Песнь в узорах») тIисса концертгу, щаршсса суратирттал выставкагу дунни октябрьданул 23-нний Дусшиврул къатлуву.

«Ккаккан бюхъайсса балайрдугу, баян бюхъайсса суратругу» («Песни, которые можно увидеть, картины, которые можно услышать»). Вай махъру язи бувгьуну бия Жаннал цилла ирглийсса концертрацIун ва выставкалуцIун. Ялун буруган, кIунурдай щаршсса суратралгу, дакIнива нанисса балайлулгу дянив аьмсса цичIар дакъар. Амма, пикри буварчан, вай кIинниннагу аьркинни хъуннасса ссавур, мюршсса чIявусса бутIрая ца хъуннасса зат щаллу дувансса бюхъу, личIи-личIисса чIурдугу, рангругу кунницIун кув дакьин дурну, ца капливун дирчуну, вайннуя ца цурдалусса хъуннасса зат щаллу дувансса гьунар. Цалчинмуниву – чIурдугу, махъругу, кIилчинмуниву – ххаллугу, хIатIругу, вай кунницIун кув базлазимургу – Жанна ва ванил хасият, дунияллухсса ляличIисса бургаву.

ЧIярумур чIумал сахIналий тамашачитуран Жанна анжагъ балайчи кунма чIаларчангу, ва хьхьуну вайннаща бювхъунни ванил вай кIивагу гьунарданий цал архIал тамаша буван. СахIналия баллалисса балайрдал мукъурттийну, музыкалийну, театрданул жанахIравусса суратирттайну тамашачитал зана хъанай бия чуврив архну ливчIсса, хъамабитала хьусса кIанттурдайн, дакIнил куртIниву лабивкIсса асардачIан. ХьхьичIва зун­ттал хъаннил каруннил дуллалимунищал архIал балайгу най бивкIссархха, давугу, балайгу мудан чIаххуввархха бивкIсса, дакI ххаришиврул хьхьири кунна гьартанийгу, къума ратIнияргу къуманийгу, ичIувагу, къурувгу. Укун, зунттал хъамитайпалун лайкьну най бур Жаннагу оьрмулувух. Гьарца балайлулгу, гьарца суратралгу бур цила-цила кьадар, цила-цила тарих.

Ва хьхьуну Жаннал Дусшиврул къатлул сахIналия тамашачитуращалсса дахIавугу щаллу дурну дия кIива мазрай – музыкалул ва щаршсса суратир­ттал. Гьарца балайлувугу, гьарца суратравугу – аьзизсса ватандалул чIу, буттал аьрщарахсса ччаву, къюву, халкьуннал аьдатру, ттаттахъал, бавахъал аьпа. Проектрал хъунмур мурадгу – балайлущагу, художествалул живописьращагу ца пространствалий ялапар хъанан шайшиву ккаккан баву.

Жанна вай кIирагу касму-сянатрахун чIивиниява багьну бунугу, суратру щащаву бакIрайра хоббину диркIун дур. ЧIумувун Жаннан бувчIуну бур вайннува ца дуну вамур дакъа цищава бацIан къашайшиву.
– Балай сакин шайссар буттал кIанттухсса ччаврия, дакIнивусса буруккинттая, асардая, сурат – мукъурттийну бусан къашаймуния, мудан итталу­сса сипатирттая, мунияту ттун хъуннасса агьамшиву дия тамашачитуран цал балайрду баяврил, яла ми гихунмай суратир­ттайгу ххал шаврил, – тIий бур Жанна концертрая махъ.

Концертрал цIану хьусса «Песнь в узорах» мукъурттил мяъна цIакь дуллалисса, концертрал ца кульминация кунмасса номерну хьунни ванияр 25 шинал хьхьичI Жаннал мандолинный альбомран куну рирщусса сурат, цувгу ва шинал январьдания шиннай октябрьданийннин щашлай, концертрайннин щаллу дурсса. Ваний мандолинагу канихьну щябивкIун бур Жанна. КIунурдай ххаллая щаршсса ва сурат сахIналийн дучIан дурну, вара образраву сахIналий щябивкIун, кIунттил кIунурдугу бувгьуну, щашлай, Супиян Оьмаровлул мукъурттийсса мандолиналухасса балай щаллу бувунни Жаннал.

Балайрдал лях-карах сахIналий буллалисса ихтилатругу бия ванивусса цимивагу гьунарданиясса, ванил творчествалул ляличIишивриясса. Дагъусттан Республикалул халкьуннал артистка, Дагъусттан Республикалул искусствардал лайкь хьусса ишккакку, Аьрасатнал Театрал ишккаккултрал союзрал член, Аьрасатнал Пишакарсса художниктурал ­союзрал член Кьурбанова Жанна ХIабибуллагьлул душ, балайчи, музыкант, художник, педагог. Ва хъанай бур жулла республикалийсса, хIатта щалла дунияллийссагума, буссавагу ца художник кIунурдай суратру щашлашисса.

 Ва жанргу бур ванил цила ляхъан бувсса. Б. Мурадовал цIанийсса Дагъусттаннал Культуралул ва искусствардал колледж, хъирив Дагъусттаннал паччахIлугърал педагогический институтрал музыкалул факультетгу був­ккуну, Жанна 1995-ку шиная 2000-ку шинайн бияннин зий бивкIун бур буттал шяраву­сса, Ккулувсса, оьрчIал багъраву музыкальный каялувчину. Муния махъ арулла шин дурну дур Дагъусттан Республикалул Тахо-Годил цIанийсса Национальный музейраву художник-реставраторну зий. 2007-ку шиная шинмай Жанна зий бур МахIачкъалаллал оьрчIал искусствардал 4-мур школалий преподавательну, ванищала архIал Дагъусттаннал паччахIлугърал опералул ва балетрал театрданул хорданул артистканугу.

«Щунудагъ» фестивальданий Жанна шамийла (2002, 2008, 2010-ку шиннардий) лайкь хьуссар «Лучший исполнитель народных песен под собстве­нный аккомпанемент» цIанин. 2001-ку шинал бувкссар Жаннал щаллу буллалисса халкьуннал балайрдал цалчинсса альбом. 2007-ку шинал Дагъусттан Республикалул Художниктурал союзрал выставкарду дувай залдануву хьуссар ванил циллалу­сса цалчинсса выставка. 2009-ку шинал «Россия» кинотеатрдануву ванил ккаккан дурссар ци­лла цалчинсса сольный концерт. Гания шинмайгу Жанна цимилгу бувкссар жулла республикалулгу, билаятралгу, чилми билаятиртталгу сахIнардайн. 2016-ку шинал Жаннал Къазахъисттаннай Актау шагьрулий кка­ккан дурссар концертрал программа ва дурссар суратирттал выставка. Ванил выставкарду мукунна хьуссар Москавлив, Санкт-Петербурглив, Пятигорскалий, Сочилий ва цаймигу шагьрурдай. Ванил творчествалул ххуллул дазул кьатIувмур географиягу къачIивисса бур: Пизалий (Италия) ва най буна кIира номинациялий ххув хьуссар («Халкьуннал вокал» ва «Декоративно-прикладное искусство»). Таллиннай (Эстония) «Халкьуннал вокал» номинациялий хьуссар 1-мур даражалул лауреат.

Ванил биографиялувасса ярг-яргсса цаймигу затру баллай бия ва хьхьуну сахIналия. Жаннал концертрай хъамалну сахIналийн бувккунни Дагъус­ттаннал цIанихсса балайчиталгу, мукунма ванил ппу ва нинугу. ЧIявуя ва барча буван буклакимигу. Концерт дачин дурну бия ДР-лул культуралул лайкь хьусса зузала Супиян Оьмаров ва АьФ-лул культуралул лайкь хьусса зузала ПатIимат Абакарова.

Концертрайн ва выставкалийн хIадур хъанахъисса чIумал цила чIарав бавцIусса, кабакьу бувсса гьарцагу инсаннайн барчаллагьрай бур Жанна Кьурбанова. Жуварив ялугьланну ванил цIу-цIусса балайрдах ва суратирттах.