Ттигъанну Оьруснал театрданул Хъунмур залдануву лайкьсса даражалий хьунни Дагъусттаннал халкьуннал артистка Луиза Шахдиловал концерт. Ваних лакрал агьали ссавур дакъа ялугьлай буссия шинал лажиндарай. ДакIний бухьунссар, дукIу Луизал юбилейрал мажлисрайн, куннал кув ккуччу буллай, театрданул нузкьунттура гъагълай най бивкIсса агьали республикалул магьирлугърал тарихраву хьхьичIунсса ва яргсса кIану бугьлагьисса, илданул дянив кьимат бюхттулсса актриса барча бан.

Ва базилухьгу исват хьунни Луизал балайрдахсса мякь лихлай бакъашиву ванил творчество ххираминнаву. Тамашачитуран бавунни Луизал цIуссагу, хьхьичIва ххира хьуссагу балайрду. Щаллу дунни Арслан Шахмардановлущалсса, Саният Рамазановащалсса, Руслан Лариннущалсса, Адам Гайдаевлущалсса, Ингушнал Халкьуннал артистка Луиза Эльжуркаеващалсса, даргиял балайчи Шамил ХIажиевлущалсса дуэтру. Луизал балайрдал мажлис чIюлу бунни Дагъусттаннал халкьуннал артистътал АхIмад АхIмадовлул ва Лариса ХIажиевал дуэтир­ттал. Балайрду увкунни Луизал даврилгу уртакьтал, миллатралгу бусравсса балайчитал Аьбдул Мурадовлул, Ибрагьим Рабадановлул, Дагъусттаннал халкьуннал артистка Жанна Кьурбановал. Концерт дачин дурну ия Рашид Багатаев.
Хьунни Украиннал аьрщарай нанисса хасъсса аьралий операциялий ватандалул ххуллий чувшиврий жанну дуллу­сса лакрал язисса арсваврал ниттихъан хас бувсса балайлул премьера. Ва балайлул махъру чивчуну бур Миясат Муслимовал Чувшиврул ордендалул кавалер, Аьрасатнал аьралий гужирдал чIавама сержант Алик Гъазиевлул ниттин хас бувну. Му­къурттинсса макьан чирчуну дур Амрет ХIусайнаевлул. Аранжировка – Дагъусттаннал лайкь хьусса артист Арслан Шахмардановлул. Луизаща бювхъунни арснацIа хьусса ниттил къюву, цила къюкIливухгу дуккан дурну, вичIидирхьуминнангу асар хьунну аьч дуван. Бюхханну увкунни цIанихсса балайчигу, актрисагу Людмила Гурченкол репертуарданувасса оьрус мазрайсса «Молитва» тIисса балайгу. Ванихун экрандалий най бия «Ни­ттил хъу» тIисса Ч. Айтматовлул пьесалиясса спектакльданувасса бутIри. Буниялттунгу, усттарну аьч дан бювхъунни Луизаща ва спектакльдануву дяъвилий арс ивкIусса ниттил къюву ва хIасрат. Украиннал аьрщарай нанисса хасъсса аьралий операциялий ватандалул ххуллий жанну харж дурсса вирттаврал аьпалун, Луизал тавакъюрайн бувну, залданувуцири, лавай бивзун, ца минутIрайсса пахъ багьуна.
Макь кьюлтI дан хъанай ба­къая вичIидирхьуми лавмарт­сса цIуцIаврил чIун дакъа жуятува личIи бувсса лак­рал балайчи Гурсалан ХIажи­махIам­мадовал аьпалун хас бувсса балай тIутIийнигу. Балайлул махъру чивчуну бур Аминат АхIмадовал.
СахIналий ккаккан бувна актрисал агьаммур роль дургьусса К. Мазаевлул «БурцIурдил хъатIи» спектакльданувасса бу­тIа.
Миллатрал магьирлугъ гьаз дуллалаврихлу барчаллагьрай­сса вичIидихьултрал миллатрал илданун багьавай ххирагу, бусравгу хьусса актриса ва балайчи тIутIавунгу багьлаган бувну, чIа тIий бия ванин творчествалуву цIу-цIусса тIайлабацIуртту.
Концертрая махъ, Луизагу кказитрайхчил барчаллагь тIий бур ва агьамсса кьини цила чIарав бацIан бувкIцириннахь.
– Ттул аьзизсса миллат, творчество ххирами! Барчаллагь зун ттул оьрмулуву хъуннасса агьамшиву дусса кьини чIарав бацIаврихлу. Гьарца кьини пашмансса хаварду ялун биллали­сса чIумал, ттул захIматралгу, творчествалулгу кьимат бищун, ттущал ххаришиву кIидачIин бучIаврихлу. Хасъсса аьралий операциягу къуртал хьуну, жула чиваркIгу сагъ-саламатну зана хьуну, агьалинал дакIругу паракьат хьусса кьини жуятура архну къалякъиннав!

Зулайхат Тахакьаева