ЧIярусса жяматийсса ва ихIсандалул давурттацIун, М.Илиясовал цIанийсса «Дараччи» фондрал лагма лаган бунни билаятрал личIи-личIисса шагьрурдай ялапар хъанахъисса ххаллилсса лаккудушру. Ва клуб сававну кIул хьура нагу Москавливсса «Дараччи» ккурандалувусса ЧIурттащиял шяравасса Шовлукь Илиясоващал.
Нава ванищал гъанну кIул хьуннингу, ттун Шовлукьлуя чIявуну баяйва ванищал хIала-гьурттусса ккурандалул душваврая. Баяйва ванил инсаншиврия, чумартшиврия, сахаватлувшиврия. Инсаннал дакI цукунсса дуссарив, дагьанттуву кунна, ганал симандалий чIалан дикIай. Шовлукь дакI-аьмал хъинсса инсан бушиву бусай тIааьнсса пиш чан къашайсса ванил симандалул. Бур ва махъ-ихтилатрангу тIааьнсса, тIуллугу уздансса, бакIралгу ххуйсса.
Шовлукьлул оьрму личIи-личIисса кIанттурдай, чил миллатирттал дянив лавгун бур. Бувну бур ва 1957-ку шинал Азирбижаннаву, Куба тIисса шагьрулий, ХIасаннул ва Жариятлул хъунмасса кулпатраву. Шовлукь бакъассагу, мукьва оьрчI цаймигу бивкIун бур вайннал. Ттунма хIисав хьусса зат: чIявусса оьрчIру бусса кулпатирттаву мудан ххуйсса тарбия дикIай. Ххювагу оьрчIан ххаллилсса тарбиягу дуллуну, цала-цала оьрмулул ххуллийн бивчуну бур нитти-буттал. ХIасан ва Жарият цивппагу канил кушулул усттартал бивкIун бур. Мунияту ичIаллил тагьаргу тачIаврагу оьккину къадиркIун дур.
– Буттал байва авурсса буттукьри. ОьрчIний на мудан тамаша буллан бикIайссияв буттал буттукьрай усттарну дихьлахьисса накьичрай, буруглан бикIайссияв ганал бурухлахисса ссуникIурттул кьяпрах. Мусил кару дусса ия. Дайва арцу-мусил затругу: кIисри, вичIилусру, канишру. Ниттил щащайва ппалул каршив, кьяпри, – дакIнин бутлай бур Шовлукь.
Шовлукьлун 7 шин хьусса чIумал вайннал кулпат бивзун бур Къабардин-Балкьарнавун, Нальчик шагьрулийн. Шикку ларгун дур ванил оьрчIшиву ва жагьилшиву. Школагу Шовлукьлул Нальчикрай къуртал бувну бур. Дуккавриву ва жяматийсса давурттаву хьхьичIунсса душ бивкIун бур. Бюхъу-хъит бусса Шовлукьлуйн тапшур байсса бивкIун бур комсоргнал, пионервожатыйнал бигарду. Ва мудан гьуртту шайсса бивкIун бур ГТО-лул соревнованиярттай.
Школа къуртал бувну махъ бувххун бур Потребкооперациялул техникумравун, лахху-ликкиялул, дуки-хIачIиялул ва мусил кьай-кьуйлул гьартасса профильданул товаровед шайсса отделениялийн. Му къуртал бувну махъ кIира шинай Нальчикрай товароведну зий бивкIун бур.
1979-ку шинал Туркманисттаннал шагьрулий Ашхабадрай ялапар хъанахъисса цила шяравучу Надирдун щар хьуну бур. Вайннал шанма душ бур. Вай циняв цала-цала кулпатирттащал Москавлив ялапар хъанай бур. Щар хьуну махъ Шовлукь зун бивкIун бур Ашхабадрай, цал Туркманисттаннал Машлул министерствалучIасса товароведну, яла Ювелирторграй, багьлул ххирасса кьай кьамул дайсса товароведну. Вай давурттай цила пишакаршиврул даража ва бажар бушиву ккаккан бан бювхъусса Шовлукь 1996-ку шинал «Янтарь» тIисса мусил ттучандалул директорну бивтун бур. Ца шинаварив ванийн мукунмасса цамургу («Сапфир» тIисса) ттучан тапшур бувну бур. Учин бучIир, Ашхабадрайсса арцу-муси Шовлукьлул канихь диркIун дур куну. БувчIлачIисса зат бур, укунсса ттучанну щийн-бунугу тапшур къабайшиву. Вайннул хъунмур хьун хъуннасса жаваблувшинна, пишалул кIулшивуртту ва бюхъу-бажар аьркинссар. Вай давурттай Шовлукь зий бивкIун бур 2016-ку шинайн бияннин, сайки 20 шинай. Туркманисттаннай гьан дурсса шинну ва хIакьинусса кьинигу тIааьнну дакIнин дичлай бур.
ХьхьичIва Дянивмур Азиянал республикардайх чIявусса лак бикIайва. Ми иш бавчуну, кIанттул инсантурачIагу хIурматрай бикIайва.
– Туркманисттаннай ца хъунмасса, бавкьусса кулпат куннасса лакрал диаспора дуссия. Ччя-ччяни батIайссияв, кунначIан кув хъамалу занай, хъатIай-хъиншивурттай, Зумаритавал ва цаймигу байраннай цачIу бикIайссияв, цахъи жагьилми ччя-ччяни оьрмулул бугьараминначIан бияйссияв. Пашмансса иширттайгу куннал чIарав кув бацIайссияв. Туркманнаву чIявусса лак бия: чIурттащи, тIулизун, халакки, ххюлуссун, шавкIул, ваччи ва цаймигу лакрал шяраваллал агьлу. ТуркманначIа жула халкьуннал хIурмат бия. Тай цивппагу дакIру тIиртIусса, аьмал хъинсса, ялун увкIнал хIурмат бусса агьлу бия, – буслай бур Шовлукь.
2016-ку шинал вайннал кулпат бивзун бур Москавлийн. КIира шинава Шовлукь бувххун бур цила шяравудуш Гульшан Хасаевал каялувшиннаралусса «Дараччи» ихIсандалул фондрал Москавливсса филиалданувун.
Муния шихуннай «Дараччи» фондрал, Арсен Буйдалаевичлул каялувшиннаралусса «Дагестан» МЦК-лул дуллалисса царагу мероприятие дакъар, ччарча ихIсандалул акциярду, ччарча личIи-личIисса вечерду, Шовлукь гьуртту къавхьусса, арцуйнусса кумаг къабувсса. Фондрал ва МЦК-лул вакилтуращал ва цимилагу бивну бур хасъсса аьралий операциялий щавурду дирну госпитальлайн багьсса жула аьралийтурачIан. Гьуртту хьуну бур хьхьичI ххуттай талатиминнан гуманитар кумагру гьан буллалисса акциярдавух.
– Шовлукь чумартсса, ка тIиртIусса, дуллалимур дугърину дайсса инсан бур, – тIий, буслай бур ванищал хIала-гьурттуну зузими.
– На хьхьичIва-хьхьичI инсаннан кьимат бищара, ганал буттал кIанттухсса ургаврих, цала мархращалсса дахIаврих бурувгун. Шовлукь бувну, хъунма хьуну Нальчикрай бунугу, щар хьуну махъ Ашхабадрай, махъсса шиннардий Москавлив ялапар хъанай бунугу, тачIав Дагъусттанная арх бувцун бакъая, Дагъусттаннащалсса дахIаву хьхьара хьун къабавцIуна. Буттал шяравун ЧIурттахьхьунгу ччя-ччяни бучIайссар. Наварив Шовлукьлущал гъанну кIул хьуссара ва «Дараччи» клубравун кьамул бувну махъ. Ва бур аьмал-хIал бавкьусса, дакI аьчухсса, инсаннан кумаг бан чялишсса. Вай ванил хасиятругу хъиннура ялун лирчунни фондрал давурттаву. «Дараччи» клубрал ххуйшиву мугу дур, шивусса душру, цавай ссурвал кунма, ца кулпат кунма, гьарица ишираву цачIу буссар. Вай циняв билаятрал Хъун шагьрулийсса Дагъусттаннал вакилталли, ца мурадрай щурущисса. Хъунмасса шагьрулий лак цачIун буллалисса, лагма лаган буллалисса. Ва дунияллий халкьуннан мюнпатсса ци дан шайрив ккаклакисса. Шовлукьгу ва кулпатраву хьхьичI ххуттай буссар, цила хъиншиврийну, мюхтажнан ка-кумаг бан, инсаннаха аякьа дан хIадуршиврийну, – тIий бур М.Илиясовал цIанийсса «Дараччи» ихIсандалул фондрал президент Гульшан Хасаева.
– Шовлукь чIявусса инсантурал хъатIи-хъиншивурттай, бивкIу-буккурдай ва цаймигу иширттаву ххуйну чIарав бавцIусса инсанни. Та заманнай, муси къадириллалисса чIумал, мусил ттучандалул хъунмурну зузисса Шовлукьлул чIявусса шяраваллил инсантуран ташулун дишинсса муси ларсун гьан дайссия. Мусил ттучандалий зий бунутIий ва дакI хъинсса бунутIий чIурттащиял жула дянив ванийн «мусил Шура», «мусил Шовлукь» учайссия. Инсаншиврул бутIа буллусса, цIими бусса, дан-дитан кIулсса, чIануйн багьсса инсан буссар. Ва къаша-шавайнал ялунгу бияйссар, захIматшиврувун агьнал чIаравгу бацIайссар. ЧIурттащиян ва ххирассар ва бусравссар. На нава хъунмасса хIаллай шанийн багьну буссияв. Шовлукь бурган бувкIун, дуниял ттунна дуллуссаксса хьунна. Ми цила буллалисса хъинбаларду ттуршлийну зана хьуннав, я Аллагь, – тIий бур ванил шяравудуш АьтIикат.
Жугу буру виха дуаьлий, хIурмат бусса Шовлукь ХIасановна.
ЦIуллушиву дулуннав, бюхълай личIаннав.
Андриана Аьбдуллаева
