Дагъусттаннал бакIчи Сергей Меликовлул дакIнин бивчунни пишалул бурж бартбигьлай жанну дуллусса журналистътал.
– Ва сияхIрай ацIрахъул цIарду дур. Жунма тачIав хъамакъабитантIиссар, 1990-2000-ку шиннардий Дагъусттаннал Миллатрал политикалул ва диннал иширттал министерствалий каялувшиву дуллай бивкIсса МахIаммад-СалихI Гусаев ва Заур Арухов. Вай жаваблувсса къуллугъирттай, хьхьичI ххуттай бавцIуну тIиссакссагу, республикалул СМИ-лул зузалтращал цачIу талай буссия экстремизмалул ва сепаратизмалул пикрирду ппив буллалиминнащал, кьянкьану бавцIуну буссия Аьрасатнал паччахIлугърал цашиврул, дакьаврил ва аслахIшиврул цIаний.
Информациялул дяъвилийсса ххувшаврил цIаний вайннал цала жанну кьурван дунни, – увкунни Дагъусттаннал бакIчинал.
Ванал мукуна дакIнин увтунни 2011-ку шинал лавмартнал канил оьрмулуцIа увсса, региондалий информациялул политика дузал даврихлу жаваблувсса Гьарун Кьурбанов.
Сергей Меликовлул кIицI лавгунни журналистътал хIакьинугу оьрмулун нигьачIаву дусса тагьарданий зий бушиву, ми щалагу дунияллийсса кIирисса точкардай, мукунма хасъсса аьралий операциялий цала пишалул буржру бартбигьлай бушиву.
– Дагъусттаннал кьянкьасса, тIайласса, аьчухсса военкортал хIакьинусса кьинигу буслай бур жухьва тIайламур, аьч буллай бур хъанахъимур. Абадлий дакIний бикIантIиссар пишалул бурж дакI марцIну бартбигьлай жанну дуллусса журналистътал, оператортал, корреспондентътал, – увкунни ванал.
ДакIнин бутан, декабрь зурул 15-нний кIицI лагайссар пишалул ххуллий жанну дуллусса журналистътал дакIнин бичайсса кьини. Ва кьини цIакь дурссар 1991-ку шинал Аьрасатнал Журналистътурал союзрал сипталий, кIирисса точкардай ва паракьатсса чIумал пишалул бурж дакI тIайлану бартбигьлай жанну дуллусса прессалул зузалт, миннал чувшиву хъамакъаритаву мурадрай.
