Ларгсса ххуллункьини МахIачкъалалив «Парадайз» ресторандалувун бавтIун бия «Илчилул» отделданул редактор, Дагъусттаннал культуралул лайкь хьусса зузала Зулайхат Тахакьаевал юбилей барча дуван.

БавтIцириннаву бия «Илчилул» ва Лакрал театрданул коллективру, Мариян Илиясовал цIанийсса «Дараччи» фондрал ва «Сила Матерей» ккурандалул душру, Зулайхатлул гьунарданул кьимат кIулми, ванил хIурмат буми.

Зулайхат барча буллалисса, чIярусса шиннардий дакI тIайлану бивхьусса захIматрахлу барчаллагь тIисса ихтилат бувна Лакрал райондалул бакIчину зий ивкIсса Юсуп МахIаммадовлул. Ванал кIицI лавгуна, цува хъунаману зузисса ппурттуву райондалул оьрмулуву хъанахъисса иширттая балжину агьалинахь буслай, агьамсса масъалартту гьаз буллай бивкIшиву Зулайхат.

Барча бувна цIанакул Лакрал райондалул бакIчину зузисса Зураб Куччаевлулгу.
Дагъусттаннал Жяматийсса палаталул хъунаманал хъиривчу Ссапарбаг Аьбдуллаевлул, гьунар бусса журналист бушивруцIун, Зулайхат ас-ламус бусса, хьхьичIун бурувгсса, ­хъунанал хIурмат бан, мюрщинаха аякьа дуван кIулсса аслийсса зунттал душ бушиврий чIурчIав дурна.
Дагъусттаннал Халкьуннал Мажлисрал информациялул-аналитикалул отделданул хъунмур Наида Кьурбановалгу кIицI лавгуна Зулайхат даврил мухIлу-хIин ххуйну кIулсса, гьунар бусса журналист, Ватангу, миллатрал маз ва культурагу ххирасса инсан бушиву.

«Дараччи» фондрал цIанияту барча буллай, Дагъусттаннал магьирлугърал лайкь хьусса зузала, балетмейстер Тарият Къапиевал кIицI лавгуна Зулайхатлул бушиву цамургу гьунар: профессионал къавтIалтраяр ххуйну къавтIун бизайсса. ТIутIимур мяйжан буван кунма, кIивагу архIал бувккун , аьсатIиннал къавтIаврийну хIайран бувна яла циняв.
Дагъусттаннал Журналистътурал союзрал председательнал хъиривчу Байрам Аьбдуллаевлул Аьрасатнал Журналистътурал союзрал чулухасса ХIурматрал грамота дуллуна Зулайхатлун.

«Зулайхат «Илчилул» бутIар, театрданул тIурча – дакIри», — увкуна Лакрал театрданул даврия буслай, чичлай биялсса захIмат бивхьушиву кIицI лаглай театрданул директор МахIаммад ХIусайновлул ва Аьрасатнал лайкь хьусса артист Аслан МахIаммадовлул.
«Илчи» кказит къабивкIссания, къабикIантIиссия «Зулайхат Тахакьаевагу» учай Зулайхатлул миллатрал кказитрал цила оьрмулуву агьамсса кIану бугьлай бушиврий чIурчIав дуллай. ­Зулайхатлул «Илчилулмур» даву гьаз давривугу биялсса бутIа бивхьушиврий чIурчIав дурна хъунама редактор Руслан Къардашовлул, Дагъусттаннал халкьуннал шаэр Руслан Башаевлул ва цаймигу даврил уртакьтурал.

Къуллугърал бурж лажин кIялану биттур буллалисса, цилла даву дагьайкун дуллалисса, дунияллухсса ябитавугу, чичрулул стильгу личIисса – укунсса мяъна-мурадрайсса ва вайннучIан гъансса калимартту чIяруя.
Шяраваллил агьулданул, мачча-гъаннал цIанияту Зулайхатлул цIа-кьини хъун дуван бавтIцириннахь барчаллагь тIисса ихтилат бувна ванил маччащар, химиялул элмурдал кандидат Сарижат Ттаттаевал.

Дагъусттаннал халкьуннал артистътал ХIажиаьли ХIажиаьлиевлул, Шамсуттин Къаплановлул, Луиза Шагьдиловал, Саният Рамазановал, Юлиана МахIаммадовал, Дагъусттаннал лайкь хьусса артистка Нурианна Къаллаева хIалану гьунар бусса цаймигу артистътурал чIюлу бувна мажлис.
ЦIу буну, усттарну ва пасихIну мажлис бачин бувну ия Лакрал театрданул гьунар бусса режиссер ва артист Руслан Ларин.
ТIутIавун бахьлаган бувну, ххуйсса махъру лахълай, бусравну, ххирану бушиву буслай, тIааьнну ларгуна жул Зулайхат лахъа-хъун буллалисса шадлугъ.
Уттиния тинмайгу дуллалимуниву тIайлабацIу баннав, цIуллуну битаннав ина, жул ххирасса Зулайхат!

ПатIимат Рамазанова