«Дагестан» РИА-лул редакциялий хьунни «Мурадирал елка» тIисса щалагу Аьрасатнал ихIсандалул акциялун хас дурсса пресс-конференция. Дагъусттаннай ва акция цукун гьантIиссарив бувсунни ДР-лул бакIчинал кумагчи, «Движение первых» тIисса жагьилтурал ккурандалул Дагъусттанналмур отделениялул каялувчи Людмила Саидовал.

«Мурадирал елка» акция Аьрасатнаву буллай байбивхьуссар 2018-ку шиная шинмай. Ва базилухь ва байбивхьуссар ноябрьданул 15-нний ва къуртал хьунт1ий бур февральданул 28-нний 2025-ку шинал.
Людмила Саидовал дакIнин бувтунни, акциялул лагрулий чIа учин ккаккан бувну бушиву шанма журалул мурадрава ца: миннува ца дикIан тIий дур бахшиш-сюрприз. Цувгу искусственныйсса интеллектрал кумаграйхчин, оьрчIал гъира-гьавас гьануну лавсун, язи дугьан тIий дур мурад щаллу буллалиманал цалла. Цалчинмур журалул мурад чIа куманан булун ккаккан бувну бур луттирду, музыкалул ярагъ, спортрал кьай-кьуй ва форма.
КIилчинмур журалул мурад чIа тIима оьрчIаща бюхъан тIий бур цанма ччисса пишалул хIал ккаккан. Масалдаран, «Ттун ччай бур поездрал машинист хьун» тIисса мурад чIа тIисса оьрчIаща бюхъан тIий бур поездрай аьрххилий лавгун, цума-унугу ца машгьурсса инсаннащал хьунаакьин.
Мурадру чIа тIиминнал аьрзри кьамул буллай бур декабрьданул 25-ннийн.
«Ччива цинявппагу мурадру ЦIусса шинавун барт бигьин, амма мурадру чIа тIисса оьрчIал аьдад хъуннасса духьувкун, ЦIусса шинавунин щаллу бан къахьунссар, мунийн бувну, пикри хьунни чIун лахъи дуккан дуван.
Акция хьунтIий дур кIира форматрай: онлайн ва офлайн.
Людмила Саидовал бувсунни ва базилухь «Мурадирал елкарду» бивхьуну бикIан тIий бушиву «Россия – моя история» тарихрал паркраву ва Оьруснал драмтеатрданул жанахIраву бакъасса, Спортрал ва физкультуралул министерствалий ва цаймигу ведомстварттай.
Онлайн-форматрай мурад чIа учин бюхъан тIий бур Елкажеланий.рф. сайтрай.

Зулайхат Тахакьаева