Дагъусттаннал цIа дурксса гужлув, Гинесслул рекордирттал луттирал рекордсмен Оьмар ХIанапиевлул ният дур гьашинусса шинал ахирданийннин дишин мукьра дунияллул рекорд.

Ноябрьданул 3-нний ванал пикри бур цала ккарччал цIакьлил хIал кIул баншиврул, цIуницIагу самолет ккарччах ххюрхху дан. Мунияр ххишалагу, шинал ахирданийннин гужлувнал ният дур хъунмасса хьхьирил жами ва локомотив сукку буван.
Ноябрьданул 1-нний МахIачкъалалив «Труд» стадиондалий хьунтIисса Кьиблалул Аьрасатнал миллатирттал культуралул ва спортрал фестивальданий Оьмар ХIанапиевлул уттигу ца рекорд дишинсса пикри бур. Ванал цалсса бувсун бакъар ссайну махIаттал буван ччай уссарив Дагъусттаннал ялапарлувтал, гужлувнал му кьюлтI бувну бур.

Оьрмулул 62 шинавусса рекордсменнал уттинингу тамансса хьхьичIуннайшивуртту хьун дурссар. Ванал ккарччах 12 метралул манзилданий ххюрхху бувссар кIушиврул 140 тонна дусса тепловоз, мукунна 7 метралул манзилданий ххюрхху дурссар самолет ТУ-134, 567 тонна кIушиврул дусса хьхьирил жами тIурча, кIункIу бувссар 15 метралул манзилданий.