Цума-цанналгу бикIай жува мудангу кIункIу тIисса инсантал: мачча-гъанми, дустал, уртакьтал, шяраваллил агьлу. Бур ттулгу оьрчIшиврул, жагьилшиврул шиннардия букъацайсса, дакIнин ххирасса инсантал – школалий архIал дуклай бивкIми.
ХIайп, бакъар лакку мазраву ца мукъуйну архIал дуклай бивкIми ккаккан байсса махъ. Уттигъанну яруссаннал кказитрай, таржума дурсса ттулла макьала ккалай, тамаша бивзунни однокурсницайн «курсцояй» увкуну бушиву. Гьаннайсса, школалий архIал дуклай бивкIмунийн «классцояй», цинявннайн «классцоял» учайшиву.
Найбунува бусанна, жу школалий гьану бивзсса дусшиву хIура дуккан къариртшиву, ялунгума, шиная-шинайн тIиссакссагу, цIакь дуршиву. Чара бакъа шинай кIийла-шамийла цачIун батIаврийну. Ххаришивурттугу, кьурчIишивурттугу цачIу-чIарав кIидачIлай бушиврийну. ХIатта оьрчIал ташурду буваврийнугума.
Хьунабавкьуру уттигъаннугу Каспийскалив, «Каспий» тIисса банкетру бай залдануву, школа къуртал бувну 40 шин ларгшиву ва цалчинмур классравун лавгун 50 шин хьушиву кIицI лаган. ТIайлабацIу хьунни усттарну мажлис бачин буван Москавлия Малик Халимбагов учIаву.
«Дирисса бущилий, хъинну анаварну ларгунни чIярусса шинну, амма, чIярусса шиннардил хьхьичI кунма, ца хъунмасса нахIусса кулпат кунма, жува цачIу буссару, ххаришивуртту ва кьурчIишивуртту кIидачIлай, куннащал кув хьунабакьлай, бухлай-буклай. Жулва оьрчIал, наслулул хьхьичIуншивурттая ххари хъанай. На хъинну ххарину ура щалва билаятрайх кIама бивщусса оьрчIру ва душру хIакьину ца урцIух ккуркки лагаврия», – увкунни ванал, хъиндайдихьу дуллай.
«Хъунигу хьуну, хъунив хъанахъаврил дазуйнгу бивну бунугу, ттун зул цинявннал чаннасса симанну гара школалий кунна ххиранугу дур, зул кIяла чIарарду авурну чIалай дур, хъинчулийсса дакъа дакIнийнбичавурттугу дакъар», – увкунни Асият Дукиевал.
Къабувсун битан къахьунссар, Асият ЦIувкIрав, хъуннабавал аьпалун тIий, цIусса къатри дуллай бушивугу, хъирив кьинигу ва усттартуран аьркинмунищал Лаккуйн най бивкIшиву.
Дарс дихьлай бивкIсса учительтурая, ми тачIав дакIния къабуккайшиврия, гьарца чулуха итххявхсса бушивруцIун, буниялттунгу хъинну бавкьусса класс бивкIшиврия бия гьарнал зумувсса ихтилат.
Мажлис чIюлу бувна жула шяравучув, балайчи, музыкант Шарапи Ажубовлул ва Каспийскаллал музыкалул ва хореографиялул гимназиялий концертмейстерну зузисса, цувагу ЧIятусса Кьурбанов АьбдулхIамидлул. Гармонист ва мандолина бищу цачIун бияйхту, кIиягу балайрду учаврил гьунардугу бусса, мероприятие цуксса сантирай най диркIссарив бувчIлай бурхха.
Мажлис байбишайхтува, бувчIунни жува уттигу мюрщинува бушиву, гьарца мукъул бакIрах гурсса хъяхъавугу дуллай, школ заманнул ишру дакIнийн бутлай, буниялттунгу хъуни хьун бувашиву.
Видеосвязьрайн буккан буварду цIанакул Москавлив яхъанахъисса жулва классрук Сайдуева Написат. Сбербанкрай зузисса Бакриева Булбуллул бакIра-бакIрах дурккунни дарсру дирхьусса учительтурал цIарду. Цаягу лях гьан къаивтун. ЛивтIуминнал аьпа учарду, уттаваминнан цIуллушиву ва лахъисса оьрму чIа тIутIисса дуаьрду дуварду. ДакIнийн бичарду дунияллия лавгсса одноклассникталгу. Нитти-буттахъул, шяраваллил агьлу. Буккарду шеърирду, лакку мазрайгу, оьрус мазрайгу.
Школа къуртал бувну 40 шинава ашкара хьунни уттинин ттунма кIулнувагу къабивкIсса гьунарду бивкIшиву вайннаву, сайки цинявннал увкунни лакку балайрду. Кьурбанов Аьлил цалва мукъурттийсса балайрду кунни жу хIайран буванну. ЧIу, такьва сахIналийн къауккаврия хIайп учинсса. Бивзру къавтIун. ДакIнийн бутарду школалий жущалва хьусса хIазсса ишру.
Ялун бурган оьваннасса дялахъру кунна чIаларчагу, укунсса хьунабакьаврил дуссар чIярусса ххуйшивуртту. Жулва школа, учительтал дакIний бушиву чIалачIи баврицIун, жула миллатрал культура, фольклор кIулнугу, ххиранугу душиву ккаккан бавугу. АрхIал дуклай бивкIминнал тIутIисса сайки циняв балайрду бия буттахъал балайрду, макьаннугу – буттахъалми. Буллалисса гъалгъагу марцIну лакку мазрайсса. Мероприятияртту лакку мазрай душиврия ххари хьун багьлагьисса чIунну дуркIун духьувкун. Куннал куннал чулухунмайсса хIурмат, гъилишиву ккаккан дуллалисса.
Хьхьудяризаннин лахъи лавгсса ва мажлис жун тачIав хъамакъабитансса хьунни. ДакIнихтуну барчаллагьрай бура ва батIаврил сакиншинначитурайн, муданмасса активистътурайн. Барчаллагьрай бура Курскаллал областьрая бувкIсса Аьйшат Кьурбановайн, Москавлия увкIсса Малик Халимбаговлуйн, Санкт-Петербурглия бувкIсса Зина Абасовайн (цуппагу, шаппай буххансса мугьлатвагу бакъа, аэропортрая найбунува бувкIсса), Гъумучату – Сарижат ХIусмановайн ва Тамара Жамаловайн. Хаснува дуки-хIачIиялулсса баврил хъар цийнна ларсъсса Садияна Сайдуевайн, «Каспий» залданул заллу МахIаммад Аминовлуйн. Цинявгу цIуллуну, оьрчIал оьрчIал ххари буллай битаннав! Ттинияр тинмайгу ванияр ххуйнугу, хъиннугу, ххалли-ххаллилсса иширттай батIлай ккакканнав.
Жул дуссар цамургу цIакь хьусса аьдат, гьар шинах гъинттул шяравугу батIайсса. Чара бакъа школалийнгу бивну, партардах щябикIайсса, цума-унугу учительнахь ца дарс дишакьай тIисса тавакъю бувайсса. Гьаннайсса, оьрчIшиврул, школ заманнул лахIзарду ца дарсирайссавагу зана битайсса. ХIатталлив лавгун, лавгнал хIурматгу бувайсса. Ва, яла-яларив, Лакку кIанттухсса ччаву ядуллалисса, шяраваллил оьрмулул иширттавухгу чялишну хIала буххайсса. ГьантIиссару ЦIувкIравнгу цачIунмай хьун, иншаАллагь!
ПатIимат Рамазанова
