* * *
Президент Владимир Путиннул тапшур бунни цIусса байран цIакь дуван – Аьрасатнал халкьуннал мазурдил кьини, цувгу кIицI лаглан сентябрьданул 8-нний, Дагъусттаннал халкьуннал шаэр Расул ХIамзатов дунияллийн увксса кьини.
* * *
Федерациялул Советрал председатель Валентина Матвиенкол баян бунни земский программартту спортравугу, почталул давривугу ва шяраваллил кIанттай зузалт биял къахъанахъисса цайми-цайми кIанттурдайгу зузи дуван аьркиншиву. КIулсса куццуй, жучIара щурущи дурну дуссар «Земский доктор», «Земский фельдшер», «Земский учитель» программартту. Гьашину зузи дурссар «Земский работник культуры» тIисса проектгу.
* * *
Аьрасатнал Федерациялул ПаччахIлугърал Думалул кьамул дурсса ва Президентнал къулбас дурсса закондалийн бувну, ва шинал сентябрьданул 1-нния тиннай БАДирттал (биологически активные добавки) даражалул, вай ишла баврил ва регистрациялул ялув бацIлантIиссар.
* * *
КIулсса куццуй, Аь. Тахо-Годил цIанийсса Национал музейрал 100 шинал юбилей хъанахъиссар гьашину. Ванил лагрулий Дагъусттан Республикалул ХIукуматрал председатель Аьбдулмуслим Аьбдулмуслимовлул музейрал зузалтран дуллунни хIукуматрал наградартту.
* * *
Республикалул оьрчIал нервно-психический цIуллу-сагъшиву дуруччаврил центрданий тIивтIунни оьрчIру тIуркIу тIунсса цIусса площадка. Вания шикку хъин хъанахъисса мюрщи къашайшалтран ва вайннал нитти-буттан кумаг хьунтIиссар.
Площадка хьунни «Главрыба» тIисса цIанилусса экотуркомплексрал чулухасса бахшишну.
* * *
Минеральные Воды шагьрулий нанисса дунияллул халкьуннал дянивсса «Сады России-2025» выставкалий гьуртту хъанай бур Дагъусттаннаясса делегациягу. Сайки 50 инсанная сакин хьусса делегациялий каялувшиву дуллай ур Дагъусттан Республикалул шяраваллил хозяйствалул министрнал цалчинма хъиривчу Шарип Шарипов.
* * *
Жулла республикалий июньдалул 2-нния тиннай дайдирхьунни оьрчIал цIуллу-сагъшиву цIакь даврил кампания, яни тIивтIунни гъинтнил каникуллал чIумал оьрчIру бигьалаглансса 260 лагерь. Вайннува 21 лагерь бур шагьрулул кьатIув. Республикалул хъуншагьрулул 11 школалул базалий зузи бувну бур дяхттасса лагерьду.
Ва гъинттул республикалул лагерьдай 40 азарунния ливчусса оьрчIру бигьалагантIиссар. Лагерьдайнсса украсса путевкарду хьхьичIра-хьхьичI дуллалиссар СВО-рал гьурттучитурал ва захIматсса тагьарданий ливчIсса кулпатирттавасса оьрчIан. Ва ялагу, жучIава бигьалагантIиссар Аьрасатнал цIусса регионнаясса сайки 2 азаруннийн бивсса оьрчIру.
* * *
Июньдалул 10-13-нний Ираннаву Тегеран шагьрулий «Фестиваль Российской культуры в Иране» цIанилусса проектрай гьуртту хьунтIиссар къавтIаврил «Лезгинка» ансамбльгу.
* * *
Ва нюжмардий жулла республикалий дайдихьлахьиссар фольклорданул ва аслийсса культуралул дунияллул халкьуннал дянивсса «Горцы» фестиваль.
* * *
МахIачкъалалив Р. ХIамзатовлул цIанийсса Национал библиотекалий июньдалул 20-22-нний хьунтIиссар кофелул фестиваль.
ХIадур бувссар
Бадрижамал Аьлиевал
