Халкьуннал шаэр Расул ХIамзатовлун 101 шин хъанахъисса гьантрай Москавлив Дагъусттаннал постпредствалулгу дунни шаэрнан хас дурсса мероприятияртту.

Аьдатрайн бувну, чIявусса агьлу бавтIуна Яузский бульварданийсса шаэрнал гьайкалдануцI тIутIив дишин. Мукунна ца агьамсса даву хьуна Москавуллал 16-мур библиотекалун (Центр обменно-репозитарного хранения) Расул ХIамзатовлул цIа дизаву. Централ округрайсса ва библиотекалун шаэрнал цIа дизансса хIарачат бувмигу Москавуллал Культуралул департамент бур. Ва библиотекалуву халкьуннал шаэрнан хас бувсса кIану бур, миллатирттал колорит ккаккан дуллалисса суратру, лаххия дусса. Цала ихтилатраву Дагъусттаннал постпред Владислав Толстюклулгу кIицI лавгуна, ва библиотекалун Расул ХIамзатовлул цIа дизаврийну Дагъусттаннал культуралул ца кюру билаятрал хъуншагьрулий ххи хьушиву. Ва мероприятиялий гьуртту хьусса ПаччахIлугърал Думалул депутат Султан Х1амзаевлулгу кIицI лавгуна, Москавуллан 877 шин хъанахъисса кьини хъуншагьрулий шаэрнал цIа библиотекалун дизаву байран кьинилул бахшиш хьушиву.