Сентябрь зурул 7-нний Оьруснал театрданул чIивимур залдануву дия Республикалул Чичултрал союзрал 90 шинал юбилейрал ва Расул ХIамзатовлул «КIяла Кьурукьирттал» ирглийсса фестивальданул дайдихьу дуллалисса шадлугъ.

«Илчилул» редакциялул чулуха барча буллай буру ПатIи­мат Рамазанова. Буккултрал ванил творчествалун лахъсса кьимат бищаврихлу ва лайкь хьунни Халкьуннал шаэрнал цIанин. Уттиния тихунмайгу цIу-цIусса луттирду итабакьлай, миллат ххари буллансса цIуллушиву дулуннав, дуллалимуницIун Занналгу кабакьиннав.

Ваний гьуртту хьуна Да­гъусттаннал ХIукуматрал хъунама Аьбдулмуслим Аьбдулмуслимов, Аьрасатнал Чичултрал союзрал хъунама Николай Иванов, республикалул культуралул министр Зарема Буттаева ва Дагъусттаннал Чичултрал союзрал председатель Марина Колюбакина. Мероприятие дайдишин хьхьичI премьер-министрнал ххал дурна чичултрал союзрал юбилейран ва чичултран, Сулайман Стальскийн, Апанни Къапиевлун ва Аьбдулла МахIаммадовлун хас дурсса суратирттал выставка.

Дагъусттаннал бакIчи Сергей Меликовлул цIанияту бавтIцири барча буллай, премьер-министрнал кIицI лавгуна республикалул чичултрал идара хIасул баву Дагъусттаннал культуралуву агьамсса иш хьушиву, республикалул чичултрал произведенияртту оьрус мазрайн таржума буллай байбивхьушиву. «Дагъусттаннал литературалул мархри куртIссар ва хъунисса хьхьичIуннайшивуртту дурссар. Чичултрал творчествалуву мудангу гьануми диркIссар ва дуссар патриотизм, цIакьсса граждан тарап дугьаву. Тамансса чичултрал Буттал кIанттул цIанийсса Хъун дяъвилий жанну харж дурссар», – увкуна ванал. Республикалул хьхьичIунсса чичултран ванал дуллуна паччахIлугърал наградарттугу. Вайннавух бия лакгу. «За доблестный труд» медаль дуллуна Дагъусттаннал халкьуннал чичу, «ЧIавалачин» журналданул редактор Мирза Давыдовлун.

«Илчилул» отделданул редактор ПатIимат Рамазанован дуллуна Дагъусттаннал халкьуннал шаэрнал цIа. Расул ХIамзатовлул цIанийсса медаль дуллуна Аьрасатнал Чичултрал союзрал хъунама Николай Ивановлунгу. Ванал Дагъусттаннайн «Литературалул Прометей» увкуна. «ХIакьину жул санаъ вихар, Дагъусттан. Вил зунттал дакъар мяш шайсса хасият, ми бюхттулну бавцIуну бур, цалва кьимат кIулну. Вил ужагърал хъамаллурая цичIар ххира къадай, ххуллулссагу, хъамалгу мудан гъилину кьамулгу, хъамалугу бувай. Вил арсурваврал ва душваврал дур кIирисса къюкIру. Ина Данко бура. Ина Орфей бура, вил оьрчIру дунияллийн буклай бунутIий макьаннащал, дуаьрдащал.

Ина щалва Аьрасатнан маз бувчIайсса Прометей бура. Мудан бюхттулнийн хъита тIисса», – увкуна ванал. Чичулт барча буллай, республикалул культуралул министр Зарема Буттаевал барчаллагь увкуна творчествалул союзирттал даврин кабакьу буллалисса республикалул хъунама Сергей Меликовлухь ва премьер-министр Аьбдулмуслим Аьбдулмуслимовлухь, Да­гъусттаннал вихшаласса дус Николай Ивановлухь, шиная шинайн цIакь хъанахъисса дусшиврул ламурдахлу. Дагъусттаннал Чичултрал союзрал председатель Марина АхIмадова-Колюбакинал кIицI лавгуна, таний аьрай чичлачисса чичулт кунма, хIакьинугу СВО-лий назмурду чичлай бушиву, Аьрасатнал СВО-лийсса цалчинма Виричу НурмахIаммад ХIажимахIаммадовгу Ватандалул цIаний жан харж дурну махъ Аьрасатнал Чичултрал союзравун кьамул увшиву. Бувсуна жагьилсса чичултраву бушиву бу­ттал кIану ххирасса, литературалул бакIщаращул, мархрал кьадру бусса, Дагъусттаннах ччаву цIакьсса инсантал. Барча бавурттал хъирив дия концертрал программа. Лакрал театрданул артистка Саният Рамазановалгу увкуна хъамал ххари бансса ххуй­сса балай.