СВО-лул Аьрасатнал Виричу НурмахIаммад ХIажимахIаммадовлул ниттил Сапижат Мазаевал бувсунни, Мордовиянавасса гуманитар гьивулущал Мамедкъалалив бившиву. Ванил барчаллагь увкунни Мордовиянал муфтий Аьбдулмалик Асаиновлухь, 25 машина хъиривну учIаврихлу.
Ттуршуннийн бивсса волонтертал бувкIун бур Поволжьелия шаймунил кумаг буван. ХIачIайсса щин, дуки-хIачIия, оьрчIансса ссайгъатру бивкIун бур вайннахь.
«Бала бакIрачIан бувкIсса чIумалвагу оьрчIру аьтIун битан къабучIиссар, оьрчIру ххари банмур чIяруя хъамаллурахь», – тIий бур Сапижат.
Бивну бур вай «Русский крест» фондрал наставник Умар Кремлевлул къатта пишкаш бувсса тренер барча увангу, кумаг буллай унува цIунцIия хьуну дунияллия лавгсса волонтер Артём Михрабовлул нитти-буттачIан жижара бувангу.
«Артёмлул нитти-буттан хIажливсса путевкарду пишкаш дурссар, Кремлевлул къатта пишкаш бувсса тренернал къатта лакьаврий, мордовцынал цащалва лавсун бувкIсса къазандалуву пулавгу бувну, самовардануву чяйгу дурну, хъамалу бувссар, ца кулпат кунма, урцIух лагма лавгун.
Хъирив кьинисса аьрххи Хасавюртуллал райондалийн бия, тикку щинаву ливчIсса шяраваллал агьлу ци тагьарданий бурив ккаккан. Кьянкьану учин хьунссар, шяраваллурдура щинаву лирчIсса бала бакIрачIан бучIарчангу, Аьрасатнал билаятрал илданул ккаккан бувшиву кьини дуркминначIа бацIайшиву», – увкунни Сапижат Мазаевал.
