Дагъусттаннал халкьуннал культуралул ва мазурдил кьини республикалул циняв шагьрурдай ва районнай чирчунни аьдатравун дагьсса миллатирттал мазурдийсса диктант.

Ва кьини Педуниверситетраву байрандалун хас дурсса хъуннасса шадлугъ дия. ТIивтIуну бия авадансса ссупра, най дия концертрал программа. Диктант чичин бувкIми хIурматрай цала-цала аудиториярдавун тIайла буклай бия миллатрал янналувусса Педуниверситетрал студентътал. АцIния шанма миллатрал мазрайсса диктант чирчунни Педагогикалул университетрал Дагъусттаннал филологиялул факультетрай.

Ва кьинисса мажлисрай гьуртту хьунни Дагъусттаннал миллатрал политикалул ва диннал иширттал министр Тамерлан АбутIалимов ва министерствалул вакилтал, Педуниверситетрал аьлимтал ва студентътал. Лакку мазрайсса диктант дурккунни филологиялул элмурдал доктор Хизри Илиясовлул. Диктант чичин бувкIун бия 16 инсан. Миннавух бия Дагъусттаннал халкьуннал артистка Саният Рамазанова, филологиялул элмурдал кандидат, Дагъусттаннал педуниверситетрал байбихьулул классирттал факультетрал кафедралул доцент Элен Сантуева, «Илчи» кказитрал отделданул редактор Андриана Аьбдуллаева, Педуниверситетрал чил билаятирттал мазурдил факультетрал преподаватель Нарисат Узунова. Гайми студентътал бия. Диктантрал текст Дагъусттаннал халкьуннал шаэр Мирза Давыдовлул произведениялува лавсун бия.