Ларгсса нюжмардий Дагъусттаннайн увкIунни Аьрасатнал халкьуннал артист Владимир Машков. Вагу ларгсса шинал ивтссар Аьрасатнал Театрал ишккаккултрал союзрал хъунаману.
Артистнащалсса хьунабакьаву хьунни Культуралул министерствалий, министр Зарема Буттаеващал. Муния махъ Оьруснал театрдануву хьунни республикалул магьирлугърал ишккаккултращалсса хьунабакьавугу.
Владимир Машковлул ихтилат байбивхьуна Дагъусттаннайн учIайхту цала дакIниву хIасул хьусса асардая. ДакIнийн увтуна Расул ХIамзатов, цала буттал, актер Лев Петровичлул, гьалмахчуя тIий. Къутта кьяпувусса зунтталчувнал сиппатгу Машковлун дакIний лирчIун дур оьрчIнияцIара. Муния махъ бувсуна цаятува, творчествалул ххуллия, цалчинсса шаттирду ласласийни хьунадаркьусса захIматшивурттая, машгьурсса насихIатчитурая.
Авадансса бур машгьурсса актёрнал, режиссёрнал, сценаристнал, продюсернал оьрмулул ххуллу. Ихтилат бия Аьрасатнал мюрщи миллатирттал магьирлугъ дуруччин кабакьу буллалисса миллатрал театрду хьхьичIунмай шаврия, хIакьину театрдан пишакарсса кадрарду биял хъанай бакъашиврия.
КIицI ларгуна Аьрасатнал Театрал ишккаккултрал союзрал регионал отделениярттай хьусса дахханашиннарду. Ххи хьуну дур Донецкаллал ва Луганскаллал республикарттайсса отделенияртту. МаслихIат бувна жагьилтуращалсса даву гужлан дуван.
– Жула даврил хьхьичI бивхьуну бикIан аьркинссар сахIналул усттартал гьунар бусса оьрчIащал зузи бансса мурадру. Ттун ччива гьарцагу региондалул отделениялий жула даву гихуннай дачин дуван бюхъу бусса жагьилтурал отделенияртту хIасул дуван, – увкуна Машковлул.
Ихтилат бия жагьилсса пишакартал цаймигу творческий пишардайн кIункIу баврия. Му ххуллий билаятрал Президентнал сипталий 2025 шинал зузи дан тIий дур программа «Земский работник культуры».
Ахирданий, артистнахь барчаллагь тIий, Дагъусттаннаясса хъамакъабитулун лавххуна ванайн варси ва къутта кьяпа. Пишкаш бувна Расул ХIамзатовлул луттирду.
Владимир Машковлул, дагъусттанлувтурахь дакI тIиртIуну кьамул аврихлу барчаллагьгу куну, махъ буллуна кIура аен, дагъусттаннал бюхттулсса зунттаву «аьвххуну гьаншиврул».
Зулайхат Тахакьаева
