Махъсса ппурттувусса цIю­рув­кьусса масъаларттавасса ца бур – бигьасса оьрмулул хъирив жагьилтал шяраваллава шагьрурдайн бизлазисса. Амма, чансса бакъар цивппа лявхъусса, хъуни хьусса минардайн зана хьуну, цанмагу, жяматрангу хайр-мюнпат буну зузиссагу.

Мукунминнавасса бур Хъусращиял шяравасса Барзаминнул душ Аьлиева Саидагу. Ва цуппагу, оьрмулул шиннардих къабурувгун, гьарзатраву итххявхсса, бюхъу бусса, заманалуцIун бавкьуну къуццу тIутIисса душ бур.

Школа къуртал бувну махъ Саидал бувккуну бур МахIачкъалаллал Автодорожный университетрал экономикалул факультет. ХьхьичIунсса хIасиллай дуклай бивкIсса студенткан вузравура даву дуллай бивкIун бур. Ванин тIурча, нясивну бухьунссия цила оьрмулул ва захIматрал ххуллу республикалул кьатIувгу ххал бигьинсса.
Саида Москавлив Росгосциркращал Аьрасатнал хъунисса шагьрурдайн гастрольлайнгу занай бивкIун бур. Шикку зий ивкIун ур ванил лас. ОьрчIругу мюрщину буну, шагьрурдая шагьрурдайн занай, мудан мина даххана дуллай, ялапар хьун бигьану къабивкIун бур. Ванин ччай бивкIун бур ца кIану, ца мина язи дургьуну, рахIатну ялапар хъанан.

Мукунсса минагу Саидан хьуну дур цуппа лявхъусса, хъунма хьусса Хъусращиял шяраву. «Нава бувсса кIанттай бучIигу лявкъунна», – тIий, хъярч буллай бур ­цуппагу.
Циркравусса даву кьаритансса хIукму бувну махъ вайннал кулпат бивзун бур Дарбантлив. Зун гъира-шавкь дусса, ххуйсса сиптарду бакIраву дусса душ шиккугу даву дакъа бацIайссияв. Дарбантлив бивзсса цалчинсса кьинива Саида кьамул бувну бур хьхьирил зуманивсса паркраву аквагримрай мюрщи оьрчIал симаннай суратру дихьлан. Ванил аквагримрай магьирну суратру дихьлан лавхьхьуну бивкIун бур ласнащал гастрольлайн заназисса ппурттуву. Усттарну суратру дихьлай тIий, ваничIан чIявусса оьрчIру бачайсса бивкIун бур.

Жула учайхха: «Ца гьунар буманаву, чIявусса цаймигу аьлтту шайссар» куну. Буттал шяравун бувкIун махъ ванил тIивтIуну бур ттучан. Яла, цаппара хIаллай пикри буллайгу бивкIун, байбивхьуну бур кофе дуллай. Ялагу, райондалул щархъаву дакъасса дахханашинна дансса хияллай бивкIун бур. Жагьилтурангу, хъуниминнангу ххирасса шаурма дувайсса кIану тIитIинсса хIукму бувну бур.

ХIакьину ванил цила бюхъугу, хIарачатгу, гьунаргу буттал шяраваллин хайр-мюнпат буну ишла буллай бур. ХIасил, шяравусса оьрму чантI учин баву бакъассагу, инсантал шяравунмай кIункIу буллай бур. Лакку билаятрайн, Хъусрахьхьун шаурма дукан, тIабиаьтрая неъмат ласун букIлай бур лагма щархъаясса, районнаясса бакъассагу, шагьрурдая бигьалаган бувкIсса инсанталгу. Шиккур дусса туристътурал ва ххуллулссаннал ликказангу. Цимирагу километралул манзилданийх зунттавун бувкIсса туристътурангу паччахI-ххуллуцI бивхьусса ккурчIав ххуйсса хъамалушинна шай.
КIицI лаган, Хъусращиял шяраву гъинттулгу, кIинттулгу «26 Бакинских комиссаров» тIисса, сийлувун багьсса ккурчIав жагьилмигу, хъунимигу куннащал кув хьунабакьлай, хавар-махъ бусласисса тIааьнсса хIалкьазия чан къашайссар.

Лархъунна дуссар лакку шаурма шахьлахьисса цIу-пуркIу. Яла марцIми ва нахIуми щаращал щиная дурсса кофелул ва чайлул тIингу ххал бара яла.
КIицI къабувну битан къахьунссар, Саида ва ванил нину-ппу ххишала бакъа сахаватлув­сса, хъамал ххирасса инсантал бушиву. Вайннал ужагърай хъамал бакъасса чIун чан къашай.

Ттула уссил оьрчI ччя-ччяни ачай биривсса гьантта буттал шяраву бутан. ЦIана шяраву ва учIаннин ялугьлагьисса дадагу дакъахьувкун, цащалла дукан-хIачIансса ласи тIий, аякьа дуллан бивкIукун: «Буттарссий, жу Лаккуй, жунма ххирасса ккурчIавгу щябивкIун, дустуращалгу хьунабавкьуну, Саидал шаурма дукантIиссар», – учай. Цикссагу бухьунссар, на кунмасса, укунсса шартIру шяраву сакин дурсса Саидайн дакIнийхтуну барчаллагьрай­сса.

Имара Саидова