МахIачкъалалив, Р.ХIам­затовлул цIанийсса Национал библиотекалуву хьунни унгу-унгусса литературалул байран. Ва кьини кIира агьамсса аьдатравун дагьсса литературалул конкурсирттал хIасиллайн бувну, ххув хьуминнан ва хьхьичIунсса кIанттурду бувгьуминнан наградартту дуллай бия.

Дагъусттаннал литературалул классик, чичу, шаэр, таржумачи, аьралий корреспондент Апанни Къапиевлул цIанийсса «Резьба по камню» тIисса Дунияллул халкьуннал дянивсса таржумачитурал конкурс гьашину ряххилчинни хьусса. Къабардин-Балкьарнал, Къарачай-Чаргаснал, Къалмукьнал республикалул халкьуннал шаэр СалихI Гуртуевлул цIанийсса «Есть родина, а значит, счастье есть» тIисса граждан поэзиялул конкурс мяйлчинсса дия. Вай кIирагу творчествалул проектирдал мурад бур хьхьичIунсса, гьунар бусса Аьрасатнал автортал лагма лаган баву, миллатрал литературалун кабакьу баву ва шаэртурал таржумалул искусство машгьур даву. Творчествалул байрандалул сакиншинначитал хьунни Аьрасатнал Чичултрал союзрал Дагъусттаннал отделение ва Ккавкказуллал Чичултрал клуб.

Аьдатравун багьсса куццуй, мероприятие дайдирхьунни Культуралул министерствалул хьхьичI дацIан дурсса Апанни Къапиевлул гьайкалдануцI тIутIив дишаврийну. Дачин дурну бия мероприятие машгьурсса шаэр, таржумачи, публицист Миясат Муслимова. Цила ихтилатраву ванил кIицI лавгунни культуралул ххазинасса ирсирал бияла хъунмасса бушиву миллатру гъан бавриву ва инсаннаву яла ххаллилми хасиятру тарбия давриву.

КIирагу конкурсрай гьуртту хьуну бия Аьрасатнал личIи-личIисса шагьрурдаясса шаэртал, чичулт. Ва кьини ихтилатру бувсса цинявппагу кIицI лаглай бия Дагъусттаннал халкьуннал хъамал ххирашиву, чумартшиву, чувшиву. Ихтилат къуртал буллай, гьарнал хъинну бюхханну бувккунни цала чивчусса ва таржума бувсса шеърирду. ЧIявуми барчаллагьрай бия Миясат Щайховнайн, вай конкурсру дайгу дирхьуну, дузрайн дуккан дан хъунмасса захIмат бихьлай тIий, Аьрасатнал архсса мюрщи шагьрурдайсса ва щархъавусса автортал чIявучин кIул буллай тIий.

Мероприятиялийн тIайла бавцIуну бия туристътал хIисаврай Дагъусттаннайн бувкIсса Аьрасатнал шагьрулиясса жагьилсса кулпатгу. Ми ххарину бия цащава хар-хавар бакъа укунсса байрандалий гьуртту хьун бюхъаврия. Гьурттучитуравух ия урцIалку шиннардий Архангельскаллал ОМОН-ву Дагъусттаннай къуллугъ буллай ивкIсса, таний ЦIуссалакрал райондалийсса иширттаву гьуртту хьусса Юрий Халтурин.

Аьрасатнал художествалул таржумалул школалул ирс ябаву мурадрайсса конкурсрайн бувкIун бия Аьрасатнал миллатирттал мазурдия таржума бувсса шеърирду. Сий дусса жюрилул хIасиллайн бувну, цалчинсса кIану бувгьунни Челябинскаллал областьрайсса Озерск тIисса шагьрулиясса Александр Шубиннул, аьсатIиннал, лакрал ва башкирнал поэзиялул таржумардахлу. Ванал таржума бувну бия лакрал шаэр Мирза МахIанмадовлул шеърирду. КIилчинмур кIану буллунни Кострома шагьрулиясса Евгения Зиминан, лазгиял ва азирбижаннал поэзиялул таржумарттахлу. Шамилчинсса кIану бия Роза Агоевахь, табасараннал, яруссаннал, къабардиннал, аьсатIиннал ва абхазнал поэзия таржума баврихлу.
СалихI Гуртуевлул цIанийсса граждан поэзиялул конкурсран ванал шеърилувасса мукъурттийсса «Есть родина, а значит, счастье есть» тIисса цIа дур. Ванил мурад бур граждан лирика машгьур даву, ватандалухсса, мунил тарихрахсса ва аьдатирттахсса ччаву майшан чаву. Конкурсрайн бувкIун бур Аьрасатнал личIи-личIисса регионнаясса, мукунма Англиянавасса, Испаннавасса, Абхазиянавасса, Белоруссиянавасса автортурал шеърирду, аьмну 140 даву.
Цалчинсса кIану лайкь бунни Грознайлиясса Инга Хаяурил, кIилчинсса – Москавуллал областьрайсса Пушкино шагьрулиясса Татьяна Селезневал, шамилчинсса – Геленджикраясса Юрий Халтуриннул ( Юрий Аганин) ва Екатеринбурграясса Инна Сигуровал.
КIирагу конкурсрай ххув хьуминнан ва призертуран буллунни дипломру ва арцуйнусса бахшишру. Дия жюрилул цалла цIания дуллалисса грамотарттугу.
Мероприятиялул лагрулий хьунни Апанни Къапиевлул бахшиш хIисаврайсса луттирал презентациягу.
Мероприятиялул хIасиллу дуллай, Миясат Муслимовал дакIнийхтуну барчаллагь увкунни призовой фонд цала бакIрайн лавсъсса ЗиябуттинХIажимирзаевлухь, мукунма конкурс дузрайн дуккан дан кумаг бувсса меценатътал Аьли Аьбдуллаевлухь ва ванал арснахь. Вайннан дуллунни ХIурматрал грамотартту ва бахшиш бунни Апанни Къапиевлул луттирду.
Андриана Аьбдуллаева