Лакку маз Дагъусттаннал миллатирттаву яла аваданми мазурдил цар учирча, цучIав махIаттал къахьунтIиссар. Агарда миннуву яла аваданмурди учирча, бюхъай ялагу махIаттал хьун ягу миккугу махIаттал къахьун. Амма аваданшиврул ци бави, ни­ттил маз кIулшиврул чулуха иш къулай бакъа бухьувкун.

[dropcap]Л[/dropcap]акку маз кIулшиврул цIа­насса тагьарданул хIакъираву ца-кIива агьамсса масъала кIицI банна. Цалчинсса масъала хъанай бур Лакку мазрал ва оьрус мазрал словарь. Му словарь утти­гъанну бувну бацIан бунни цимирагу шинай муниха зий ивкIсса жула машгьурсса лингвист, филологиялул элмурдал доктор, профессор Эса Халидович Аьбдуллаевлул. Жува хъинну багу-багьавай пахрулий бу­ссару ва аьлимчуная. Му словарь чIал къавхьуну дунияллийн буккантIиссар.
Амма ванал хъиривсса никираву вари учинсса цучIав чIалай акъар. Хъинну чанну бур лакку мазрал элмулухун багьсса специалистал. ДакIний бур, ца чIумал, аьпабиву, профессор Нурислам Жидалаевлул увкуна: «Жул Мазрал, литературалул ва магьирлугърал элму-ахттаршиннарал институтраву мяйя филологиялул элмурдал доктор уссар. Вайксса щилчIав бакъассар», – тIисса махъру. ЦIанасса ппур­ттуву кIицI ан бюхълай бур, жува гъалгъа буллалисса Эса Аьбдуллаев акъа, анжагъ Аьлил-ХIажи Аьбдуллаев ва Сулайман АхIмадов. Хъирив наниссагу цучIав чIалай акъар. Яр, туну, бивчIан битантIиссарив жува жула ниттил маз, жулла литература, Сурхай-ханнал, Хан-Муртазялил, Къячахъал Оьмаханнул, Къаяев Аьлил (Ссивирлив лакку мазрай энциклопедия чивчусса), шама Муркъилийнахъал элмулул кьутIбинал* Юсуплул, ХIамзатлул, ХIажинал, мукунма Закухъал Курдил, Авданнахъал Саидлул, Саэдов Гьаруннул, Аминов МахIаммад-Загьидлул, Мудунов Акабардул, Башаев МахIаммадлул ва цаймигу цIанихсса чичултрал бюхттул бувсса маз?!
Пашманну дакIнийн дагьлай дур 1952-ку шин, шама ххаллилну Гъумучиял школа бувккусса чIаважагьил, лакку мазрахсса ччаврил дакI гьаваслан хьуну, лавгун Ттуплислив, тийх бувккуну Ттуплисуллал университет, лархьхьуну хъунасса аьлимчу, академик Степан Чикобавал лингвистикалул школалий элмугу, дурур­ччуну мазрал элмурдал диссертациярттугу, хьуну филологиялул элмурдал докторталгу, шамунналлагу лакку мазрал элму бюхттул дуллай, оьрму гьан бувшиву. Бакъассарив ххишала мукунма улча ххирасса, ниттил мазрах аьшукьсса жагьилтал? Гьич къавихра. Ба­къассарив нину-ппу багьайссаксса ччаву дихьлай цала оьрчIаву? Му бю­хъай. Цари миннахь ниттил мазрал дарсру дихьлахьими? Бухлавгссарив Акниев Шагьимарданхъул, Аьлиев Минкаилхъул, Мудунов Абакархъул? Цуксса кьурчIинугу, иш мукун хъанай чIалай бур.
Цинявннан ччай бур цала оьрчIру хъуни къуллугъир­ттай щябивкIун, хъуни харжру ласлай. Ваниннин ххюра шинал хьхьичI тарихрал элмурдал доктор АхIмад Кьурбановлул увкунни (ва цувагу шагьрулийри хъуна хьусса, гьа!), нава Дагъусттаннал университетрал историялул факультетрал деканнал хъиривчуну ухьувкун, ттуща гьунар бусса лакку оьрчIан кумаг бан бюхълай бурча, баян бакьай Лаккуй­сса школалул директортурайн, гьан бара, ттул цIа дургьуну, жагьилтал ши­ккун, университетравун, куну. Нагу му тавакъю тIайла бувкссия цила мурадирттайн. Амма мурадрив ссайнчIав къабувкнува ливчIуна.
Гьарца шинал итабакьай Дагъусттаннал паччахIлугърал университетралгу, Дагъусттаннал паччахIлугърал педагогикалул университетралгу лакку мазрал дарс дишайсса специалистал. Амма миннан лакку маз кIулшиврул даража ттун хъинну лащинну чIалан бикIай. Миннан «ххаллилсса» тIисса мукъул мяъна дурчIлай дур анжагъ «къудурсса», «дакI хъунасса» тIисса мяъналий. «Каялувчи» тIисса махъ бувчIлайвагу ба­къар. ЧIал къавхьуну лакку мазрал дарсру дихьлансса ихтияр дуллалисса дипломру булунтIисса специалистуран кIулну бакъар вай махъру: бара, барашин, лагъ, каялувшиву (мукъуй махъ бивхьуну, оьрус мазрайсса «руководство» тIисса мукъуя бувсса калька!), хIучча, исват бан, исватшин, тасттикь бан, язими (гьарца чичул, шаэрнал луттирай бу­сса махъ!), язи бугьан, аькьил, умуд, тарбия (!) ва м.ц. Ци учин бюхъайссар ниттил маз ябаврил хIакъираву жущавагу, ва даражалий ла­кку маз лахьхьин буллалисса ла­кку мазрал учительтуращагу?! Жула ялун наниминнайн тарбия къакIулсса, умуд ба­къасса варистал учин багьлай бур. Амма варистал тIисса махъгурхха ттизаманнул дуклаки оьрчIан (next поколениелун!) къакIулсса! «Илчи» лакку кказитрай тIурча, цимирагу шинай «Варистал» тIисса рубрика дачин дурну ду­ссия. ЧIалачIиссаксса, лакрал ца бакъа-бакъасса республикан кказитрал му рубрика дачин дуллалиминнащагу, районнай­сса чIаважагьилтуращал хьунабавкьуну, му рубрикалул гьанна миннал дакIурдивун бичин бювхъуну бакъар.
Лакку маз лахьхьин баврил масъала оьккину бушиврия­сса аьрзарду чIявусса бивщуссар лакку кказитрай. Хъуннасса ле­ххаву рутлай икIайссия профе­ссор Н. С. Жидалаев. Микку ихтилат бикIайва лакку маз ичIува (шаппа) ишла къабуллалаврияту, «ЦIахъардал къуманива ялавай лакку маз къааьркин­ссар» тIий, нитти-буттал оьрчIру тарбия буллай, ниттил маз хъамабитан буллалаврияту. Амма лакку маз ичIуванияргу ххуйну ла­хьхьин байсса школалуллихха! Ци тагьар дур школалий лакку маз лахьхьин баврил?
Нава ГТРК-лул Лакрал радиолий зузисса чIумал, на дачин дурссия лакку мазрал литературалул конкурс. (Му конкурс дачин дансса багьанану хьуна жагьилсса шаэртал, чичулт лакрал бакъашиву.) Школалул адресрай чагъар гьан барча, ччитул кIуллуйн, кIуллул магърайн куну, чагъаргу зана къабикIай ххуллийх лавгун, къуртал шайшиву чIалай, на, шаннагу лакрал райондалийсса школалул директортурал цIарду кIул дурну, гьарца директорнал адресрай цанма-цанма цIа ку­сса чагъар чивчуссия. Бюхъай, мукунсса ургъил Лакрал радиолул редакциялул чулуха буллай бунавхьур, жавабран мура личIлулшиву директортуралгу дуллай бивкIун бикIан – барчаллагь цайн! – хъинну чIявусса чагъарду бувкIуна, дуклаки оьрчIал назмурду дусса, цал-цал хавардугу чивчусса. Хаснура ххуйсса назмурду дуркIуна Гъумучиял, Ккуллал, Ккурккуллал, Хъусращиял, КIундиннал, Хъунайннал ва цаймигу школардаяту. Дуклаки оьрчIал наз­мурду, хаварду ххал бигьин жу радиолий бувссия лакрал чичултраяту сакин бувсса жюри. («ЧIавалачин» журналданулгу, хъуннасса чIарав бацIаву дурну, ми цинярда назмурду рирщуна.) Му бакъассагу, чансса каши дусса лакрал къуллугъчитурахь увкуну, 100-300 къурушрансса премия сакин дурссия. Яла, лавгун та чIумал Республикалул Инкассациялул хъунаману зузисса ттула хъинсса дус ХIусайн НураттиновичлучIан, машина була куну (цIуллу аннав цув, тачIав, я машина бакъар ягу бензин бакъар куну, инкар къабувну, мудангу щаллу увссара ганал), гьарца школалийн бияй­ссияв оьрчIансса передачар­ттал редактор Мисиду Давыдоващал архIал ва ххув хьуми оьрчI-душру школалул коллективрал хьхьичI бацIан бувну, барчаллагь куну, барча бувну, му хъун дакъасса, амма дуклаки оьрчIан оьрмулухун дакIний личIансса премиягу, ГТРК-лул мугьру бивщусса грамотагу дулайссия. Мукунсса конкурсру жу дурссия цаппара шиннардий.
Лакрал дуссар ххаллил­сса хасият – иш захIматнийн багьувкун, ляличIисса гьунар ккаккан бувну, щища-бунугу бан къашайсса хIарачат бувну, цала цивппа буруччайсса. Мукун буслай бур лакрал таварих. ЦIанакулсса лакку миллатрансса нигьачIаву ляличIинура оькки­ссар. На му лащан давияв 1239-1240-ку шинал мангъул Гъази-Гъумукун ххявхсса заманалуха. Та дяъвилий, чичрурдал бусаврийн бувну, лакрал миллат­раяту 1033 чув ливчIун ивкIун ур. Цаппара кказитбуккултран жула паракьатсса, дяъвирдая архаинсса замана, миллат бухлаган бавай ливчIсса та дяъвилул мусиватраха лащан баву къакъулай бизанссар. Мукунминнан хавар бакъар дяъви цакуну ликкайсса бала-мусиват бушиву, цIана лакрайн дирмунийн «ххярктIи азар» («ползучая болезнь») учай. Мукунсса азарданул, хIалли-хIаллих, чIава-чIава тIий, цIуллу чурх бугьай­ссар, мунил миллат цуппава бухлаган байссар.
Ттуларив умуд бур уттигу жула миллатрал, жула арамтуннал ва хъаннил цала ниттил маз буруччин хIарачат бантIишиврийн.
Сулайман Мусаев

* кьутIби – полюс; мукун учайссар хъинну дурккусса аьлим­чунайн.