КIинттул чIумал микI бавкьусса хIавзирдай, бярув баччибакъулшиву дурну, мюхчан къавхьусса инсантуран апатIру хъанай бур.
[pullquote]Оькьлакьисса инсаннан
цалчинсса кумаг баву
1. НигьачIаву дакъасса кIанттурдайн увцуну, гъили лаган ан аьркинссар.
2. Лажин лувну кIура аен увну, бакI яларай рутан ан аьркинссар.
3. КьацI марцI бан аьркинссар хьюмушивруцIа.
Хъугьу тIий, кIарчI учин ччай ухьурча, ссихIирал ххуллурдава ва лякьлува циняв щин дуккан дан аьркинссар. Пульс бишлай бакъахьурча, къюкIлил массаж ва искусственное дыхание дан аьркинссар. Цалчинсса кумаг бувну махъ, апатI хьума азарханалийн иян ан аьркинссар.
[/pullquote]
ДакIний битан аьркинссар щин дарцIусса щала кIанттурдайх микI цакуцну къабакьайшиву. Ца чулух микI кьянкьану бухьурча, гамур чулух му бигьану гъагъан бюхъайссар. Мунияту микI бавкьусса кIанттурдай личIлулну бикIаван аьркинссар.
1. ЦукунчIав къабучIиссар щинайх бавкьусса микIирайн цIансса ягу дарщу-дарккусса, зат ххуйну къачIалачIисса чIумал буккан.
2. КъабучIиссар, ччан щилай, микIирал кьянкьашиву ххал дуллан. Ччан щуну чансса дунугу щин дуккарча, микI кьянкьа къавхьуссар, цукунчIав къабучIиссар мунийх занан. Мугьлат бакъа нигьачIаву дусса кIанттурдая зува бувкIсса ххуллийх махъунмай, зуманив бачин, аьркинссар хIаллих, ччех бигьлагьисса шаттирдай, ччанну микIирая гьаз къабувну, цивппагу хъачIунттал утташиврий тIитIин бувну.
3. Чара бакъа микIирайх лахъан багьлай бухьурча, бувтсса ххуллийх бачин аьркинссар. Мукунсса кIанттурду бакъахьурча, микIирайн лахъаннин, ча, цукун бачинссарив пикри бан аьркинссар.
4. Балики цаппара инсантал архIал най бухьурча, цанная ца 5-6 метралул манзилданий бачин аьркинссар.
5. МикI бавкьусса хIавзлийн, бярув нанисса чIумал, зущалва ласун аьркинссар 20-25 метра дусса цIакьсса хьхьа, ца чулух хIатI ва кIусса зат ларчIсса. КIушиврул кумаг бантIиссар хIинча оькьлакьиманачIан рутан, хIатIлицIун лавчIун, оьвкьманаща бигьану уккан хьунтIиссар.
6. ЦукунчIав къабучIиссар, архIал хъуними бакъанма, мюрщисса оьрчIру микI бавкьусса кIанайн балугъ бугьан ягу кканккай бигьлан итабакьин.
7. ЧIявуну микIирал бавкьусса кIанттурдай инсаннан апатI хъанай бур хIарчIун икIаву сававну. Мукунсса тагьарданий инсан нигьачIаврия пикри буллан къаикIайссар ва, ца къахьунмур хьусса чIумал, ххассал хьун бюхъу чанну икIайссар.