Лавгмур номерданий бувсъсса куццуй, ттигъанну жул зузалтрал аьрххи хьуссия Лакрал райондалул азарханалийн. 

Бюхъугу, кIулшивугу
ларайсса хIакин

Азарханалувун буххавривун жун цалчин хьунаавкьуна МахIачкъалалив муххал ххуллул азарханалийгу зий, Мединститутравугу виваллил цIуцIавурттал кафедралий дарсру дихьлахьисса, жула бусравсса хIакин-хъуначу Апаннинал арс ХIажиев ХIажи.
Бувсунни цува гьарца гъинттул учIайсса ушиву буттал шяравун Хьурив игьалаган. Ва базилухь увкIун ур АьбдурахIин Дибировичлухьхьун аьла-ссалам булун.
– Шикку увххун най унува цалчин итталун дагьлай дур шагьрулул азарханардавунияр ларайсса санитар тагьар. Капельница дихьлай унува хьунаавкьунни Каспийскалиясса къяничу, болгаркалул ка кьуркьуну увкIсса. Мукунсса ишру ччя-ччяни хьунабакьай, амма хъунмурчIин, кьувкьуну бикIай бурчу ягу биши. Танал тIурча, кьувкьуну бия тунну ва хьхьа. АьбдурахIин Дибировичлул сававсса канил дарзуну, танал ка сахла дан бювхъуну бур, кIисри зий бур. Ларайсса пишакаршиву дакъасса хирургнаща ва захIматсса операция магьирну бан къабюхъантIиссия.

– На увкIра туннурдавун дарув бутIин. Вай даруртту азарханардай бакъассар. Дуссар анжагъ букайсса ва ххалаххив байсса дарурттал дузалшинна. Оьттувун бутIайсса даруртту багьлул ххирасса бушиврийн бувну, жунма ласун багьайссар, ОМС-рал итадакьлакьисса арцу диял хъанай дакъар.

ХIакьину, гьарца аралуву кунна, медициналувугу тIалавну дур «узкая специализация». Масалдаран, ортопедия – му дур ттурчIардил цIуцIавуртту хъин дувайсса специализация. ЦIана гьарца ттурчIал цина хасъсса пишакар ур. Жула хирург АьбдурахIин Дибирович ур гьарза-гьартасса кIулшиву дусса, гьарца цIуцIаврил хасият кIулсса хирург. Тамансса шиннардий Москавлив хьхьичIунсса азарханарттай зий ивкIсса хIакиннал бюхъу ва кIулшиву ларайссар. КутIасса чIумул мутталий ванаща бювхъунни райондалул цIуллу-сагъшиву дуруччаврил даража лавай бан. Шиккун къашайшалт букIлай бур ЦIахъардал махIлалиягу, Ахъушиял райондалиягу.
АьбдурахIин Дибировичлул мурад буссия шикку районнал дянивсса Гериатриялул центр тIитIинсса, амма так ванан ччай му жучIава тIитIин къахьунссар. БикIан аьркинни ХIукуматрал хIукму.

 

ХхюцIалла шин оьрчIал цIуллушиврул ялув
Лакрал райондалул азарханалул участковый педиатр ПатIимат Магьдиева ва азарханалий зий гьашину там хъанай дур 50 шин. Инсаннал бачIи оьр­муксса мутта. Ванил захIматрал луттирай дур дикIаннарагу ца чичру.
– 1976 шинал Дагъусттаннал паччахIлугърал мединститутгу къуртал бувну, август зуруй зун бувкIун бур Лакрал райондалийн. Зий бивкIун бур ординаторну, ацIнияхъайсса шинну дурну дур райондалул педиатрну зий. Ванил биялалий дур Гъумуча Буршайн дияннинсса участок: Ххюлуссун, ЧIурттащи, КIулушацIи, Читтур, Гъумуксса кIивагу детсад ва школа. Аьмну мяйттуршлий кIия оьрчI.
– Махъсса шиннардий цавагу иш къавхьунни оьрчI бивкIусса. Му нитти-буттал къулагъасралгу, жул бюхъулулгу, Аллагьнал цIимилулгу иш бухьунссар. Къашайшивуртту дур аьвкъу-гъили шаву, ангина, анемия.

Бигьасса шартIру
даврийнсса тирхханнур

ХхюцIалуннийн диявайсса шинну шавай дур МахIаммадова Гьапа Сулайманнул душ азарханалий зий. Ва зун бувкIун бур Муса Аьбдуллаевич хъунама хIакинну зий ивкIсса чIумал. ТIайла бувккун бивкIун бур ГьунчIукьатIув ФАП-рай зун. «Колхозрал роддомру» чайсса бивкIун бур тай шиннардий вайннуйн. КIанттайва лащаршиву дан багьайва тIий бур. Ца шинава кьамул бувну бур оьрчIал отделениялийн, яла зий бивкIун бур хирургиялий.
– ЗахIматсса шартIру ккарксса жун, хIакьинусса шартIирдай зун хъунмасса талихIри. Планеркалийн чIал къахьун, лечлай Хьурив лагайссияв. АьбдурахIин Дибировичлун хъунмасса барчаллагь азарханалул шартIру къулай дан бувсса захIматрахлу, – тIий бур Гьапа.

Лайкьссар жула пишакартал вихшалдаран

Къушиева Гулижан Бадавинал душ, гинекологиялул отделениялул каялувчи. Зий бур 2015 шиная шинмай.
ЦIу бутIуй ва зун бухлай бивкIун бур «Земский доктор» программалийхчил. Амма та шинал жула республикалий ва программа дукьан дурну дия. Мунихгу къабурувгун, Гулижан бавцIуну бур шиккува зун. Каялувшинна, коллектив, сакиншиннадарал даву ххуйсса даражалий дирхьуну чIалай. Ванил биялалий хъин дуллай бур оьрчI бакъашиврул, патологиялул цIуцIавуртту.
– Жула хъаннил консультациялий сияхIрайсса хъаннил оьрчI байссар шиккува. Анавархъиндарай «кесарево сечение» операция бан багьлай бухьурча, шиккува байссар, АьбдурахIин Дибировичлул цалагу байссар. Операциялухун багьансса иш ччянива чIалай бухьурча, жу ми тIайла буккайссар МахIачкъалалийн.
Пандемиялул чIумал щала республикалий «ЯтIул зонарду» сакин бувну бивкIсса ппурттуву, тамансса сменардай зий бивкIра миккугу. Ахирданий оьвчаву дан ччива райондалул оьрчI бай оьрмулувусса хъаннийн. Жула хIакинтурайн вихшала дакъа, кIихIуллану бухьурча, дакI дарцIуну тIий бура, жучIарагу ссалчIав яларайсса шартIру дакъассар. Шагьрурдал роддомирттай дусса оборудованиялул лащу-щаллусса хасъсса палатартту буссар. ДакI дарцIуну бюхъайссар шиккува бацIан. Агарда, оьрчI лякьлувусса чIун захIматну най духьурча, жу ччянира икьрал дайссар шагьрулийн тIайла буккан.

Къашайшалтрал
пикрирду

Болгаркалул ка кьуркьусса МахIадов Оьмар НухIкьадинал арс, Къяннал шяраватусса музыкант хъунмасса талихIран ккалли буллай ур апатI хьусса чIумал кулпат чIарав лякъаву. Ганил анавархъиндарай хьхьа бавхIуну, оьлицIал шаврия хха­ссал хьуну ур. Куявнал машина канилу буну, чIумуй иян ан бювхъуну бур.
Оьмарова Светлана Алхаслул душ азарханалийн бувкIун бур МахIачкъалалия, направление цамур азарханалийн диркIхьурчагу.
– Ттун кIулссия шикку ххуйсса шартIру ва коллектив бушиву. Шикку хъин хъанай уссия ттул лас. Гьутрурдал ракрай операция бан ччай акъая, мунийн бувну мунал цIуллу-сагъшиврул ялув бацIан багьлай бия. Ччаннай ацIан увуна. На хъинну рязину ливчIунав. Ттуйрагу вара цIуцIаву ялун лирчукун, нагу бувкIра шикку хъин хъанан. Рязину бура бучIаврия.

Зулайхат Тахакьаева