Шикку ххал бивгьунни Аьра­сатнал Чичултрал союзравун цIусса члентал кьамул баврил масъалартту, гьашину юбилейрду хъанахъисса чичултран хас дурсса мероприятияртту ва цаймигу агьамсса масъалартту. ХIукму бунни Аьрасатнал Чичултрал союзравун кьамул буван Ися МахIаммадов, КьурбанпатIимат Штанчаева ва Шалласу Шалласуев.
Халкьуннал чичу Мирза Давыдовлул ва чичулт ХIасан КIуруховлул, Валерий Амировлул юбилейрду хIисаврайсса ци мероприятияртту дувантIий буссарив бувсунни лакрал секциялул каялувчи Супиян Оьмаровлул.

Мирза Давыдовлул гьаз бунни лакку мазрайсса журналлал подписка дурми чансса бушиврул, районнал хъуниминнайн, школарттайн бувккун, подписка гьаз дувансса чаран лякъин аьркиншиврул масъала. Супиян Оьмаровлул маслихIат бунни журналлал, кказитрал хъуними редактортуращал, корреспондентътуращал лакрал шяраваллавун биян подписка дайдирхьусса ппурттуву, ялунмай ва иширахагу уртакьну зун.

Бувсунни ванал, Дагъус­ттаннал Чичултрал союзран 90 шин хъанай духьувкун, ва юбилейрайнгу цукунсса давуртту дуван хIадур хьуну буссарив. Аьрасатнал Чичултрал союзрал справочник цIу буккан буллай бушиву, союзрал гьану бивзминнаяту кказит-журналлай чичлай бушиву, Поэзиялул театрданувугу, Союзравугу дуклаки оьрчIащалсса хьунабакьавуртту, творчествалул мажлисру ва цаймигу мероприятияртту дуллай бушиву. КIицI лавгунни халкьуннал цалчинми шаэртал Аьбдулла МахIаммадовлун ва Сулайман Стальскийн 155 шинал юбилейрду дувантIишиву, 150 шинал юбилей дувантIишиву Дагъусттаннал литературалул классик МахIмудлун. Апанни Къапиевлул 115 шинал юбилейран хасну итабакьинтIий бур ваналгу, Наталия Къапиевалгу оьрмулул ва даврил ххуллия бусласисса буклет, Лакрал театрданул республикалул шагьрурдай ва районнай ккаккан бувантIий бур «Невыплаканные слёзы» спектакль, Аьлибек Тахо-Годил цIанийсса Национал музейралгу Апанни Къапиевлул творчествалун хас бувсса ккуркки стол бувантIий бур. Ссуттил дувантIий бур шаэрнал творчествалун хас дурсса вечергу.
Лакрал литературалийн ва культуралийн багьлагьисса цайми масъаларттугу гьаз бунни.

ПатIимат Рамазанова